Mutuli gwa kashatu
56
Ikitaabo kyoꞌkukwiza ikihango
(56–66)
Imilala yoshi igagashaanirwa
1 Nahano adetaga kwokuno:
«Ngola bu mùguluula.
Ku yukwo, mukizi twa ulubaaja ku njira íkwaniini, munabe mutungiini.
Kwokwo, lyo mubona kwo naani ndi mu gira íbikwaniini.
2 Yibyo nadeta, ahiriirwi ngiisi úgabigira,
anabe abifitiirwi kwo.
Anabe asimbahiri ulusiku lweꞌSabaato,
iri anayiyeka ukugira íbitali nga byo.»
3 Ibinyamahanga, iri byangaba keera byanyibiika kwo,
bitaki kwaniini ukukizi deta:
«Si Nahano atuhandwiri mu bandu baage!»
Umutungule, naye atadete:
«Si niehe ndyagagi nga kiti kyumu naaho!»
4 Si yabo batungule, Nahano adetaga hiꞌgulu lyabo kwokuno:
«Abatungule bakwaniini bakizi simbaha ulusiku lwani lweꞌSabaato,
banakizi gira ngiisi byo ndoziizi,
banabe basimbahiri ikihango kyani.
5 Abandu mwene yabo, ngakengeeza amaziina gaabo mu nyumba yani, kiri na ku bibambaazi.
Yago maziina gaabo gagalumbuuka,
ukuhima goꞌmundu úbusiri abatabana naꞌbanyere.
Ngamúyinika iziina írigayama ho, litanâye hotolwe.»
6 Ibinyamahanga nabyo, hali íbikanyibiika kwo, kwo bigakizi ngolera,
binabe binguuziri, iri binakizi nyikumba,
binabe bisimbahiri ulusiku lweꞌSabaato, buzira kuluhubira,
binabe bisimbahiri ikihango kyani.
7 Yibyo binyamahanga, ngabileeta ku mugazi gwani mweru,
na mbishambaaze mu nyumba yani yaꞌmahuuno.
Ikyanya bigatanga amatuulo goꞌkusiriiza lwoshi,
kuguma naꞌgandi matuulo, yibyo byoshi biganzimiisa.
Inyumba yani igakizi buuzibwa:
Nyumba yaꞌmahuuno imwaꞌbandu beꞌmilala yoshi.* 56.7 Mataayo 21.13; Mariko 11.17; Luka 19.46.
8 Balya Bahisiraheeri ábâli koli huuziri,
Nahano Rurema akoli gweti agabakuumania, iri anadetaga kwokuno:
«Ngaki kuumania abandi,
gira bayiji yibiika ku bandu bo keera nakuumania.»
Nahano ahiga kwo agaahana abimangizi baꞌBahisiraheeri
9 Mwe nyamiishwa mweshi!
Muba mutuuziri mu mbingiro, kandi iri i rubako, muyije.
Ee! Muyiji vwajagira abandu baani, Abahisiraheeri.
10 Si ibirongoozi byabo ziryagagi mbuuta, binali bizeeze!
Booshi bali nga tubwa tweꞌmishega, útutali mu moka.
Bali mu lembwa niꞌro naaho.
Banayamiri bali mu tendera, iri banaroroota.
11 Balyagagi nga tubwa útutali mu yiguta.
Kundu bali bangere, si bali bahwija.
Ngiisi muguma ali mu yilala mu byage-byage, iri anayikundirira.
12 Bali mu kizi kemana kwokuno: «Yijagi, tugendi looza idivaayi.
Tugendi laluka amaavu geꞌngangu.
Kwokwo kwo tugaagira, kiri na kusheezi.
Si kusheezi lyo tugashambaala ingingwe.»