55
Nahano ali mu haana ku busha
1 Ka mukoli nyotiirwi? Aaho! Muyiji nywa amagoloovi!
Kundu mwangaba mutahiiti ifwaranga,
muyiji gula idivaayi naꞌmata.
Emwe! Ndaazo fwaranga zo mugatanga!* 55.1 Bwigule 21.6; 22.17.
2 Kituma kiki mukiri mu tanga ifwaranga ku bitagaliibwa?
Na kituma kiki mukiri mu yitubanula ku bitagamùmala isabwe?
Aaho! Mundegage amatwiri, lyo mulya ibyokulya binunu,
halinde imitima yinyu ihesherwe.
3 Munyegeere, munanyuvwirize!
Ee! Mundegage amatwiri, lyo mulonga ukulama.
Nâli mali lagaania Dahudi, kwo ngamúgashaanira.
Kwokwo na naawe, tukola tuganywana ikihango kyeꞌmyakuula.† 55.3 Mikolezi 13.34.
4 Nꞌgayimika Dahudi kwo akizi ndangira ubumasi mu binyamahanga,
anabe mutwali woꞌkukizi birongoora.
5 Yibyo binyamahanga, kundu utabiyiji, ikyanya ugabitumira, binakuyitabe.
Ee! Bigayija ngana, bwo Nahano keera akakugingika.
Ye Rurema wawe, anali Mutaluule waꞌBahisiraheeri.
6 Ugirage umwete gwoꞌkulooza Nahano, ku kyanya akiri mu boneka.
Unamúhuune ubutabaazi, bwo akiri hoofi-hoofi.
7 Banangora-mabi batwikire ku mabi gaabo,
banayiyeke neꞌmitono yabo mibi.
Bagalukire Nahano, gira alonge kubakejeerera.
Ee! Ikyanya bagagalukira Rurema witu, agabakoga lwoshi-lwoshi.
8 Nahano adetaga kwokuno: «Imitono yani, itali yo yeꞌmwinyu.
Noꞌbulyo bwo muli mu kola mwo, butali bwo bweꞌmwani.
9 Nga kwiꞌgulu liri hala bweneene neꞌkihugo,
kwo na kwokwo ubulyo bwani, neꞌmitono yani, bisumbiri ibyeꞌmwinyu.
10 «Invula noꞌlugungu, biri mu kizi hona hiꞌgulu,
bitanali mu galukira ho, bítazi nywisa idaho.
Yiryo idaho linameze imbuto, zinakule,
zinaleete akafundo, zinayere.
Haaho, lyoꞌmuhiizi ali mu longa imbuto zoꞌkushubi yiji byala.
Neꞌzindi, anazigire mwoꞌmukate.‡ 55.10 2 Bakorindo 9.10.
11 Kwokwo, kwo biri na ku magambo gaani.
Yago magambo gaani, gatangangalukira mamaata.
Si gali mu koleesa ngiisi byo ndoziizi.
Ee! Ngiisi byo nꞌgagwanwa nagatuma,
byo na byebyo gali mu gira.»
12 Mugalyoka i Babeeri ku bushambaale, munarongoorwe mu kati koꞌmutuula.
Imigazi noꞌtugangazi bigakizi mùbandira akabuuli, iri binamùyimbira.
Kiri neꞌbiti byoshi bya mu mbingiro bigakizi mùkomera amagasha.
13 Ngiisi heꞌmigenge ishubi meziri,
hakola hagaamera ibiti byeꞌshindano.
Na ngiisi áhashubi meziri imihanda-njovu,
hakola hagaamera imihadasi.
Yibyo biti biija bigakizi tanga ubumasi hiꞌgulu lyoꞌbulangashane bwa Nahano.
Yubwo bumasi butanâye hotolwe, halinde imyaka neꞌmyakuula.