54
Rurema akuuziri abandu baage, Abahisiraheeri
1 Nahano adetaga kwokuno:
«E Yerusaleemu, ugirage ushambaale.
Kundu ulyagagi nga ngumba útazindi buta,
na kundu utazindi yuvwa umukero gwoꞌkubuta, haliko ubande akabuuli, awi yiyi yiyi!
Kundu uli ngoꞌmukazi úkakorora,
haliko we gaaba naꞌbaana bingi ukuhima nakiriri!*54.1 Bagalatiya 4.27.»
2 Ufinduulage iheema lyawe.
Uyushuule imirondo yalyo, halinde iyajabuke.
Utakolwe kwo wayihangirira. Si ulaahye imigozi yalyo.
Neꞌmisumaari yalyo, ugisindagire.
3 Buno, ukola ugatabika uluhande noꞌlundi.
Abaana ba mu kibusi kyawe, bakolaga bagahyana utwaya tweꞌbinyamahanga.
Na kundu utwaya twabo twâli sigiiragi mushaka,
si bakola bagayiji tutuula mwo.
4 Utayobohe, utanavunike indege!
Mukuba, utâye ki yagagale, kandi iri kugayirizibwa.
Kundu ukateezibwa ishoni mu busore bwawe,
yibyo byoshi, ukola ugabiyibagira.
Na kundu ukahonyolezibwa bweneene, mbu bwo ulyagagi namufwiri,
birya byoshi, utâye ki bikengeere.
5 Si Rurema ye kakulema, ye nakolaga yibalo.
Iziina lyage, ye Nahano woꞌbushobozi bwoshi!
Yoyo Mutaluule waꞌBahisiraheeri, ye mu kuguluula.
Ye nali mu buuzibwa Rurema waꞌMahanga gooshi.
6 Rurema adetaga kwokuno:
«Wâli riiri ngoꞌmukazi úkayangwa akiri musore,
halikago yiba anayiji múyimula, wanaba ukoli jengiirwi bweneene.
Kundu kwokwo, ndi mu shubi kuhamagala.
7 Yikyo kyanya nꞌgakujanda, zâli riiri siku ngerwa naaho.
Halikago ngola ngashubi kugalula, bwo ndi munandengeerwa bweneene.
8 Ku kirya kyanya, nâli shavwiri ngana-ngana!
Kyanatuma ngalahira kwo ndagaki kubanda kwiꞌsu.
Kundu kwokwo, urukundo lwani luyamiri ho imyaka neꞌmyakuula,
kyo kitumiri ngaki kukejeerera.
Kwokwo, kwo nie Nahano, Lukiza wawe ndesiri.
9 «Ku kyanya kya Nuhu, nꞌgabiikaga indahiro,
kwo ndâye ki bindikire ikihugo ku miiji goꞌmwijulire.
Kwo na kwokwo buno, ndi mu shubi biika indahiro,
kwo ndâye ki kurakarire, kandi iri kukukambira.†54.9 Ndondeko 9.8-17.»
10 Nahano adetaga kwokuno:
«Ngweti ngakuyuvwirwa indengeerwa.
Kwokwo, nakulagaania kwo kundu imigazi yanganyerera,
na kundu utugangazi twangajugumbana,
halikago ndâye kuhemukire.
Keera namùlagaania kwo mugalonga umutuula, gunayame ho.
Nie Nahano, nyamiri ndi mu mùyuvwirwa indengeerwa.
Kwokwo, kwo ndesiri.»
Nahano agashubi yubakulula i Yerusaleemu
11 «E Yerusaleemu, uli muhanya ngana.
Yoho wee! Ukola mu yehuulwa-yehuulwa neꞌkihuhuuta,
ndaanaye mundu úkakuholeeza.
Kundu kwokwo, ngola ngakuyubakulula naꞌmabuye geꞌkishingo bweneene.
Indaliro zaawe zigayubakwa naꞌmabuye miija geꞌsafiiri.‡54.11 Bwigule 21.18-21.
12 Inyingo zaawe kwo zishuumiri, ngaziyubakiisa amabuye ágakeyengiini goꞌmugushe.
Inyiivi ziꞌrembo lyawe, ngazilingaania naꞌgandi ágakeyengiini.
Kiri neꞌbibambaazi byawe, ngabibugiiriza kwaꞌmabuye geꞌkishingo.
13 Abaana baawe booshi, Nahano yenyene ye gabayigiriza,
halinde banakizi longa umutuula bweneene!§54.13 Yohana 6.45.
14 Ugakizi sikama mu bikwaniini,
halinde utaki hahazibwe naꞌbagoma.
Utanaki be noꞌlushunguti, mbu uyobohe ikindu kyoshi.
Ikyoba kigaamala.
15 Ndaabo bandu bo ngaatuma, mbu bayiji kuteera.
Na kundu bangayija, ugabaminika ngana-ngana!
16 Lolagi! Nie kabumba umutuzi weꞌbyuma.
Ali mu kizi yasa umuliro naꞌmakala, anatule ibilwaniiso.
Kwo na kwokwo, nie kabumba noꞌmushereeza,
gira akizi gendi shereezania.
17 Kundu bangatula ibyugi hiꞌgulu lyoꞌkukulwisa, ndaakwo bigakugira.
Neꞌkyanya bagakizi kubeeshera, ugakizi babeshuuza.
«Yubu bwo buhyane bwaꞌbakozi baani.
Ee! Nienyene nie gakuhimira!»
Kwokwo, kwo Nahano adesiri.