53
1 Irya ndumwa, ikyanya tukagimenyeesa, ka hali úkagiyemeera?
Neꞌkyanya ubushobozi bukayerekanwa, ka hali úkamenya kwo buli bweꞌmwa Nahano?*53.1-3 Yohana 12.38; Barumi 3.12; 10.16; 15.21.
2 Umukozi wa Nahano âli kizi kula imbere lyage ngiꞌshibwe,
anaba naaho ngoꞌmuzi úguli mu kula mwiꞌdaho írihangalusiri.
Ulya mukozi atâli buyahiri, atanâli kizi gingikwa, mbu lyaꞌbandu bamúsiima.
Ikyanya twâli kizi múlola kwo, ndaabyo twangamúsimiiri kwo.
3 Si abandu bâli kizi múshomba, iri banamúnegura.
Âli kizi jengeerwa, noꞌkukizi libuuka, anaba kyagaza imbere lyabo,
halinde banamúbona kwo atali kindu.
4 Ulya mukozi, ku kasiisa, akayabiira amalwazi giitu,
anabetula neꞌmizingeerwe yitu.
Haliko, ikyanya tukabona ngiisi kwo akola mu libuzibwa,
twanabona kwo Rurema ye wâli kizi múhana mu kumúkubula ingoni, iri anamúteeza ishoni.†53.4 Mataayo 8.17.
5 Ee! Akabezibwa inguma hiꞌgulu lyeꞌbyaha biitu.
Amabi giitu, go gâli tumiri agatitimbwa.
Yukwo kuhanwa kwage, kwo kukatuleetera umutuula.
Na mu yizo nguma zaage, mwo tukalongera ukukira.‡53.5 1 Peturu 2.24.
6 Tweshi, keera tukahabuka nga bibuzi.
Ngiisi muguma witu ali mu yigendera haage-haage.
Yago mabi giitu gooshi, Nahano ye kamúbetuza go.§53.6 1 Peturu 2.25.
7 Uyo mukozi akabonerwa, anakizi libuzibwa.
Kundu kwokwo, ndaabyo akadeta.
Anasholerwa nga kibuzi íkigagendi tongeerwa.
Kundu kwokwo, anahulika naaho
nga kweꞌkyanabuzi kiri mu hulika, ku kyanya kiri mu kemwa ubwoya.*53.7-8 Mikolezi 8.32-33.
Akanwa kaage kanakizi beera kabumbe.
8 Bakamúbirigisha, banamútwira ulubaaja.
Neꞌri hakazinda, banamúyita.
Uyo mukozi, ndaanaye mundu weꞌkibusi kyage úkamúhahala,
akanayitwa hiꞌgulu lyeꞌbyaha byaꞌbandu baani.
9 Ee! Ndaalyo igambo libi akagira,
ndaanalyo lyoꞌbulyalya írikalyoka mu kanwa kaage.
Kundu kwokwo, akaziikwa kuguma naꞌbanyazi.
Hanali haꞌbagale bakaziikwa.†53.9 1 Peturu 2.22.
10 Nahano ye kashungika kwo amúfute-fute, anakizi múlibuza,
halinde anamúyitiisa hiꞌgulu lyeꞌbyaha biitu.
Kundu kwokwo, ulya úkayitwa, ali mukozi wa Rurema,
aganaki lama, halinde anabone abandu beꞌbibusi byage.
Ngiisi byo Nahano âli mali gwanwa amúshungikira,
byo na byebyo uyo mukozi agaagira.
11 «Umukozi wani, kundu ali mwija ngana, haliko agalibuuka bweneene, mu kubetula ibyaha byaꞌbandu bingi,
halinde banabe bakoli kwaniini imbere lya Rurema.
Kwokwo, akabuli yiji shambaala.
12 Uyo mukozi akaharuurirwa kuguma naꞌbanyazi,
anayitanga ayitwe, gira lyo abetula ibyaha byaꞌbandu bingi.
Ee! Yabo booshi, anabahuunira kwo babikogwe.
Kyo kitumiri ngamúgingika nga musirikaani úwahima mwiꞌzibo,
analonge iminyago kuguma naꞌbakulu.‡53.12 Luka 22.37.»