59
Íbiri mu handula abandu na Rurema
1 Ku kasiisa, ukuboko kwa Nahano kutabuziri ubushobozi bwoꞌkumùkiza,
atanali bitwitwi mbu atamùyuvwirize.
2 Aaho! Kituma kiki Rurema winyu angamùyihandula kwo?
Mukuba mugweti mugayifunda mu byaha.
Byebyo, byo bitumiri akoli mùhinduliiri ingoto,
atanaki gweti agamùyuvwiriza.
3 Amaboko giinyu, si keera gakayitana,
ganakoli yulubiiri mu bindi íbitali nga byo!
Utunwa twinyu tuyamiri tuli mu deta ibinyoma,
tunali mu kizi ravwanga.
4 Kiri neꞌkyanya muli mu buulana, muli mu kizi beesha-beesha naaho.
Muli mu banganizania amagambo goꞌbusha-busha.
Munayamiri mushungisiri ukukola amabi, iri munagayushuula kwaꞌgandi.
5 Mulyagagi nga magi ágayaluka mweꞌbihoma.
Yago magi, iri mwangagalya, muli mu yami fwa.
Neꞌri gangabereka, gali mu vulumuka mweꞌbihoma.
Nga kwo nalutangulira ali mu luka ulutangula,
kwo na niinyu muli mu kizi besherana.
6 Inuzi za nalutangulira zitangahangwa mwoꞌmulondo,
naꞌbandu batangazikoleesa mu kuyibwika.
Kwo na kwokwo niinyu, ngiisi byo mugweti mugaagira, biryagagi bibi naaho,
munali mu komeresania.
7 Muyeshuhiri ukugendi kola amabi.
Munavwarusiri, kwo mugendi yita abandu bazira buhube.
Inzaliro ziinyu ziri mu lola ku mabi naaho.
Na ngiisi ho muli mu genda,
muli mu yita haꞌbandu, munahasige mushaka.* 59.7 Barumi 3.15-17.
8 Ngiisi íbyangaleetaga umutuula, mutabiyiji.
Neꞌmaaja za Rurema, mutazitwaziizi.
Muli mu genda muganyooka-nyooka mu njira.
Na ngiisi ye muli mu zaatana, atâye longe umutuula.
Abandu bayiyubaara ku byaha byabo
9 Ndaaye úli mu twirana imaaja ku njira íkwaniini.
Amagambo miija gatakiri mu boneka.
Twâli langaliiri kwo tugalonga umulengeerwe.
Na kundu tugweti tugagushakula,
halikago, ikihulu naaho, kyo kiri ho buno.
10 Tuli mu genda tugamamaata ku kibambaazi nga mbumi.
Tunali mu genda tugajuba-juba, nga bandu bazira masu.
Ku kyanya kyaꞌkalenge-renge, tuli mu siitaara-siitara ngoꞌmundu úli mu genda bushigi.
Kundu tukiri bagumaana, si tuli mu ba nga tukoli fwiri.
11 Tweshi tugweti tugalunduma nga dubu ízishalisiri,
tunali mu gongeera nga ngunde.
Kundu tulangaliiri kwo Rurema agakoleesa ibyoꞌkuli ha kati kiitu, shoobe!
Na kundu tuki lindiiri kwo atukize, halikago anatuyisunga hala.
12 E Nahano, twâli kizi kola amabi imbere lyawe.
Ibyaha biitu biyerekiini kwo twahuba, binagweti bigatulega.
Yibyo byoshi, tubiyiji-yiji ku bweranyange.
13 Tukakulahira, tutanâli kutwaziizi.
Twanakuhindulira ingoto, unali we Rurema witu.
Tuli mu kizi vyula ubuhuni, iri tunalibuzania.
Imitono ya mu mitima yitu, biri binyoma naaho, kiri na byo tuli mu deta.
14 Ngiisi byeꞌmaaja za Rurema zidesiri, keera tukabijajaaka.
Kiri na íbikwaniini, keera twabijandagira.
Mu njira ziitu, abandu batakiri mu deta ukuli.
Ee! Íbiri byoꞌkuli, batatuhangwiri kwo tubidete mwo.
15 Yukwo kuli, kukoli bulisiri.
Ngiisi úli mu gira kwo ayiyeke amabi, ali mu yami teerwa.
Rurema ayitegaanura ukuguluula abandu baage
Yukwo kuli, ikyanya Nahano akakuloozagya mu bandu, atanakubona.
Kyanatuma agayagalwa bweneene.
16 Neꞌri akalooza umundu woꞌkutabaala abandu baage, atanamúbona,
kyanatuma agasoomerwa.
Kwokwo, yenyene agakoleesa ubushobozi bwage,
mu kuyiji kiza abandu baage.
Ukuli kwage kwanamúsikamya,
17 kwanaba kyo kihazo kyoꞌkuyikinga mwiꞌzibo.
Anayambala noꞌbukize, bube yo ngofeera yeꞌkyuma.
Anayambala noꞌkuyihoola, libe liꞌkangaata.
Anayibwika noꞌkufiitirwa, libe liꞌkooti.
18 Mu kugira kwokwo, lyo agaahana abagoma baage, nga kwo bibakwaniini,
kiri na ábatuuziri i mahanga.
Ee! Ngiisi ábamúshombiri, agabarakarira.
19 Ku yikyo kyanya, Nahano agayija ali nga lwiji úlukundwiri.
Umuuka gwage gunabe guli mu luvwarusa.
Kwokwo, lyaꞌbandu bagakizi simbaha Nahano,
banahuuze ubulangashane bwage, ukulyokera isheere, halinde imuga.
20 Nahano agayiji guluula abandu beꞌYerusaleemu, balya beene Yakobo.
Mu kati kaabo, ngiisi ábakatwikira ku byaha byabo, bagaguluulwa.
Kwokwo, kwo Nahano adesiri.† 59.20-21 Barumi 11.27; Hisaaya 27.9; Yeremiya 31.33-34.
21 Nahano ashubi detaga kwokuno: «Ikihango kyo ngweti nganywana na niinyu, kyo kyekino: Umutima gwani guli hiꞌgulu liinyu, na mbiisiri amagambo gaani mu tunwa twinyu. Yago magambo gatâye mùlyoke mwo. Gatanâye lyoke kiri na mu tunwa twa bijukulu biinyu, ukulyokera buno, halinde imyaka neꞌmyakuula!»