60
I Yerusaleemu igatanguulira ikihugo
1 E bandu beꞌYerusaleemu, muyimuke, munalangashane.
Ubulangashane bwa Nahano bukoli mùtundukiiri kwo,
halinde mukoli tuuziri mu mulengeerwe.
2 Lolagi! Ikihulu kya namudidi kikoli yidisiri mu mahanga gooshi,
kinakoli bwikiiri abandu baago booshi.
Haliko mwehe, Nahano ali mu mùtunduukira kwo.
Noꞌbulangashane bwage bukoli mùbonesiri mwo.
3 Yugwo mulengeerwe gwinyu, ibinyamahanga bikola bigaguyijira.
Kiri naꞌbaami bagayiji bona ngiisi kwo gwamùtunduukira.
4 Muyinamulage amasu, munalegamire imbande zooshi!
Abandu bakola mu mùkuumanira.
Bagala biinyu bakola mu lyoka mu mahanga.
Kiri na banyere biinyu, bali mu yija babegesirwi.
5 Ikyanya mugababona, imitima yinyu igashenguuka bweneene,
halinde munashambaale, munabe mukoli keyengiini.
Mukuba, abadandaza bagalyoka i kajabo keꞌnyaaja,
baheesiri akanyamwala keꞌbindu ukulyoka i mahanga.
6 Ubuso bwingi bweꞌngamiya, bugazinga mu kihugo kiinyu.
Zigalyoka i Sheeba, mu mulala gwaꞌBamidyani, na mu gwa Hefa, bakuletiiri inooro noꞌmubadu.
Neꞌkyanya bagayijaga, bagayimbira Nahano ku kisegengo.
7 Mugahaabwa noꞌbuso bweꞌbitugwa ukulyoka mu beene Kedaari,
munaleeterwe neꞌbipanga bya beene Nebayoti.
Yibyo bitugwa, mugakizi bindangira, libe ituulo lyoꞌkusiriiza.
Mu kugira kwokwo, lyo mugakizi njambaaza,
halinde ubulangashane bunaboneke mu nyumba yani.
8 Banyandi yaba bandu ábakola mu mùyijira ku mulindi nga bibungu,
banali mu mùgalukira duba nga mahumba ágali mu balalira iwa ngisha zaago?
9 Abandu ba mu tulira, nie babiisiri kwoꞌmulangaaliro.
Amashuba ukulyoka i Tarasisi gagatee yija gaheesiri abaana biinyu, kuguma neꞌharija zaabo neꞌnooro.
Kwokwo, kwo bagagingika Rurema Nahamwinyu, bwo ali Mutaluule waꞌBahisiraheeri.
Niinyu, Rurema agweti agamùgingika.
10 Nahano adetaga kwokuno:
«E bandu beꞌYerusaleemu, ibinyamahanga bigayubakulula inzitiro ziinyu.
Kiri naꞌbaami baabo, bagakizi mùkolera.
Kundu nꞌgatee shavura, nanakizi mùkubula,
halikago buno, ngola ngamùyuvwirwa indengeerwa, iri ninamùgirira bwija.
11 Inyiivi ziinyu zigakizi yama ziri nyigule.
Zitanâye ki yigalwe, buba bushigi, kandi iri mwiꞌzuuba.
Kwokwo, lyeꞌbinyamahanga bigakizi yija bimùshegwiri ubugale bwabo.
Abaami baabo, banabe basholiirwi nga mbohe imbere liinyu.* 60.11 Bwigule 21.25-26.
12 Mu ngiisi bwami na ngiisi butwali,
ngiisi ábagalahira mbu batamùkolere, bagayami zimiizibwa.
Yugwo mulala gugaminikwa lwoshi-lwoshi!
13 «Bagayiji mùheereza ibiti bya mu lubako lweꞌLebanooni,
ngeꞌkiti kyeꞌshindano, na kyoꞌmuvinje, na kyoꞌmusunobari.
Yibyo biti byoshi bigakoleesibwa mu kulimbiisa inyumba yani.
Mukuba, mu nyumba yani, mwo ngweti ngalaaviza amagulu.
Kwokwo iyo nyumba, ngagigingika bweneene.
14 Abagoma biinyu, kundu bâli kizi mùlibuza,
halikago, bagakizi yija bagosiri imbere liinyu.
Ee! Ngiisi ábâli kizi mùneguraga, leero bagakizi mùfukamira.
Bagakizi mùbuuza Kaaya ka Nahano,
banamùbuuze Sayuni, kaaya koꞌMutaluule waꞌBahisiraheeri.
15 «E bandu beꞌYerusaleemu, mwâli kizi shombwa lwoshi, mwanâli jandagiirwi.
Ndaaye mundu úwâli kizi ki mùlenga mwo.
Haliko buno, ngamùgingika imyaka neꞌmyakuula!
Mukolaga mugashambaaza abandu beꞌbibusi byoshi.
16 Ibinyamahanga bigakizi mùleetera ibyokulya byabo,
mugaalerwa naꞌbaami baabo.
Haaho lyo mugaamenya kwo nie Nahano, Lukiza winyu,
na kwo nie Rurema wa Yakobo, Mwene Ubushobozi.
17 «Ho nangamùletiiri umulinga, ngakizi mùleetera inooro.
Na ho nangamùletiiri ibyuma, ngamùleetera iharija.
Na ho nangamùletiiri ibiti, ngamùleetera imiringa.
Na ho nangamùletiiri amabuye, ngamùleetera ibyuma.
Ngakizi mùlanga, halinde munabe noꞌbutoge,
na ngizi mùrongoora ku njira ízikwaniini.
18 Mu kihugo kiinyu, mutâye ki yuvwe kwaꞌbandu bakomeresania mwo.
Kitaganaki shereezibwa, kandi iri kisigwa mushaka.
Inzitiro ziinyu, mugakizi zideta Bukize.
Neꞌnyiivi zaazo, mugakizi zideta Bwivuge.
19 Mwiꞌzuuba, mutagaki ba niꞌgoorwa mbwiꞌzuuba likizi mùtanguulira.
Kiri na mu bushigi, mutagaki molekerwa noꞌmwezi.
Mukuba, ubulangashane bwa Rurema Nahamwinyu, bwo bugakizi mùtanguulira mwo imyaka neꞌmyakuula!† 60.19 Bwigule 21.23; 22.5.
20 Izuuba litâye ki mùsookere.
Kiri na bushigi, umwezi gutâye ki fwifwitire.
Mukuba, Nahano yenyene, ye gakizi mùtanguulira imyaka neꞌmyakuula!
Kinatume ukujengeerwa kwinyu kugaamala lwoshi-lwoshi.
21 «Mweshi mugakizi gira íbikwaniini,
munahyane ikihugo imyaka neꞌmyakuula!
Mugaaba ishibwe lyo nꞌgayibyalira.
Mukuba, nꞌgamùbumba naꞌmaboko gaani, gira mukizi mbuuza.
22 Mu kati kiinyu, umundu weꞌmbaga niini agakizi buta abaana kihumbi.
Na kundu muki kehiirwi, haliko mugayiji hinduka mulala úguhimbiri.
Yibyo byoshi, ngabigira ku kyanya kyabyo, buzira kutindirira. Niehe nie Nahano.»