64
1 Nga wangabiiri nga kulya umuliro guli mu singoola ikishungu-shungu,
na nga kwo guli mu duusa amiiji ganashere.
Kwokwo, naawe bwangabiiri bwija ushonookage,
unayimenyeese mu bagoma baawe.
Ibinyamahanga bigakubona, binajugume.
2 Yaho keera, ikyanya wâli kizi shonooka,
imikolezi yawe yâli kizi tusoomeza.
Kiri neꞌmigazi yâli kizi jugumbana imbere lyawe!*64.2 1 Bakorindo 2.9.
3 Ukulyokera keera, ndaaye mundu úkayuvwa kwo hali ugundi Rurema úli nga we.
Kiri noꞌkubona, ndaaye úkabona ugundi.
Mukuba, ikyanya abandu bali mu ba bakulangaliiri,
uli mu batabaala ngana.
4 Ikyanya bali mu ba bafitiirwi ku bikwaniini, uli mu batabaala.
Mukuba, bali mu ba bakengiiri ngiisi kwo bangatuula imbere lyawe.†64.4 1 Bakorindo 2.9.
Haliko, ikyanya tukakuhubira, wanaturakarira.
Buno, keera twamala isiku nyingi, tuli mu huna imbere lyawe.
Aaho! Kutagi kwo twangaki kiziibwi?
5 Tweshi tukoli yulubiiri.
Na kundu twangatoniri kwo twagira íbikwaniini,
haliko imikolezi yitu yoshi, ikola nga mulondo úguyulubiiri naaho.
Ibyaha biitu keera byatuyumya,
tunakolaga nga bukere úbuli mu yehuulwa neꞌmbuusi.
6 Mu kati kiitu, ndaaye úgweti úgahuuna kwiꞌziina lyawe.
Ndaanaye uli mu kebukwa, mbu akuhuune ulukogo.
Si keera watuhindulira ingoto,
wanalekaga ibyaha biitu bitushereeze!
7 Kundu kwokwo, e Nahano! Si we Daata!
Tuli ngiꞌbumba. Naawe uli mubuuvi.
Tweshi, we katulema naꞌmaboko gaawe.
8 Aahago! Utagenderere ukukizi turakarira.
Utakizi kengeera amabi giitu,
bwo tweshi tuli bandu baawe!
Utukejeerere, maashi!
9 Utwaya two ukataluula kare, buno tukola mushaka.
I Yerusaleemu nayo keera ikasherebera, inakola biguuka.
10 Inyumba yo bashokuluza biitu bâli kizi kuyikumbira mwo,
yâli ndaluule, yanâli limbiri bweneene.
Kundu kwokwo, keera ikasingoolwa.
Na byoshi byo twâli siimiri, bikola biguuka naaho.
11 E Nahano, ku yibyo byoshi, ka utagatutabaala?
Ka ugagenderera ukuhulika naaho?
Ka ugakizi tuhana ukuhima kwo tugaahasha?