65
Abandu bahuni, Rurema agabahana
1 Nahano adetaga kwokuno:
«Balya bandu, ikyanya batâli zaazi njakula, nâli mali yiyerekana imwabo.
Na kundu ndaaye úkandooza,
haliko nanababonekera.
Na kundu batâli kizi ndabaaza,
haliko nâli kizi babwira: “Ndi hano! Ndi hano!*65.1 Barumi 10.20. ”
2 Yabo bandu, ubwakya-ubwayira, nyamiri mbateziri amaboko mu kubayakiira.
Kundu kwokwo, baki genderiiri ukuyilala mu bitali nga byo.
Bakahinduka bagoma baani,
banali mu gira nga ngiisi kwo baloziizi.†65.2 Barumi 10.21.
3 Bali mu ngyokola bweneene ubwakya-ubwayira.
Bali mu shiiba mu ndalo zaabo bagweti bagayikumba imigisi.
Banakizi giyokera umubadu ku tutanda tuyubake naꞌmatafaari.
4 Banali mu genda mu maherero,
gira bagendi liira mweꞌnyama zeꞌngulube.
Ibirugu byabo, bali mu biyulubaza neꞌbyokulya byoꞌmuziro.
5 Ha nyuma, banakizi bwirana:
“Uyisunge hala! Si ndi mutaluule! Utanyulubaze, maashi!”
Abandu mwene yabo, bagweti bagambayira, nga kyusi mu mazuulu.
Bayamiri barakiiri, nga muliro úgutali mu zima.
6 Lolagi! Keera nayandika hano kwokuno:
“Ndagahulika! Si ngayihoola ngana!
7 Ee! Ngayihoola ibyaha byabo, halinde kiri neꞌbyaha bya bashokuluza baabo.
Si bâli kizi yokera imizimu yabo umubadu ku migazi, na ku tugangazi,
banâli kizi ndeegeza heꞌshoni.
Kwokwo, ngabahana nga kwo bibakwaniini,
ukukulikirana na kwo bâli kizi gira yaho keera.” Kwokwo, kwo nie Nahano ndesiri.»
8 Nahano adetaga kwokuno:
«Umundu, nga angagwana umuzabibu úguhiiri,
abandu batangadeta mbu gushereezibwe.
Mukuba, gugaki kandwa mweꞌdivaayi nunu.
Kwo na kwokwo, ndagaki shereeza abakozi baani lwoshi-lwoshi.
9 Ngakizi gashaanira Abahisiraheeri, beene Yakobo.
Abaana baabo bagahyana ikihugo kyani.
Yikyo kihugo, ngiisi bo nꞌgatoola, bo bagakihyana.
Balyagagi bakozi baani, bo baganakituula mwo.
10 Haaho, bagakizi ragirira ibitugwa byabo mu ndekeera yeꞌSharooni.
Neꞌngaavu zaabo, zigakizi vyagira mu yeꞌHakoori.
Yaho handu, hagasigala kihugo kya ngiisi ábaloziizi ukukizi ngulikira.
11 «Haliko mwe bandi, si mukola mu njajaaka nie Nahano,
munayibagire i Sayuni, umugazi gwani mutaluule.
Mukola mu yikumba ibindi-bindi íbiri mu yikumbwa,
iri munabitangira neꞌdivaayi, mbu lyo mulonga umudaaho.
12 «Yayebe! Ngolaga ngamùyitiisa neꞌngooti.
Kwokwo mweshi, mugagooka, bakabuli mùtongeera.
Mukuba, ikyanya nꞌgamùhamagala, mutananyitaba.
Ikyanya nꞌgadetaga, mutanandwaza.
Mwanakizi yilala mu bitalaalwe imbere lyani.
Ee! Mukayitoolera ukukizi gira ibyagaza.
13 «Ku yukwo, nie Nahano Rurema, nadetaga kwokuno:
Ku kyanya abakozi baani bagalonga ibyokulya neꞌbinywebwa,
haliko mwehe kwo muli bandu babi, mugaaba muki shalisiri, iri munanyotiirwi.
Abakozi baani bagakizi ba bashambiiri,
haliko mwehe, munabe mujojobiiri.
14 Yabo bakozi baani, bagakizi yimba ku bushambaale.
Si mwehe, imitima yinyu inabe ishengusiri,
munakizi liruuka.
15 Balya bakozi baani, ngabayinika iziina lihyahya.
Si mwehe, Nahano Rurema agamùyita.
Niꞌziina liinyu, bagakizi likoleesa mu kudaakana.
16 Ikyanya abandu bagalooza ukugashanirana,
bagakizi koleesa iziina lya Rurema woꞌkuli.
Neꞌkyanya bagakizi biika indahiro,
bagakizi koleesa lyeryo iziina.
Amalibu gaabo ga keera, gagaaba keera gayibagirwa.
Nienyene ngagalyosa lwoshi-lwoshi.
17 «Lolagi! Nâye leme igulu lihyahya, neꞌkihugo kihyahya.
Abandu batâye ki kengeere amagambo ga keera, batanâye ki gayitoneese kwo.‡65.17 Hisaaya 66.22; 2 Peturu 3.13; Bwigule 21.1.
18 Ngolaga ngaagira i Yerusaleemu, kabe kaaya kaꞌmalega.
Abatuulaga baamwo, bagashambaala ngana-ngana!
Yibyo ngola ngaagira, mukizi bishambaalira imyaka neꞌmyakuula!
19 Kiri na naani, ngashambaalira akaaya keꞌYerusaleemu.
Ngashambaala ngana hiꞌgulu lyaꞌbandu baani.
«Mutâye ki yuvwikane ikimombo, kandi iri kigongeero.§65.19 Bwigule 21.4.
20 Hataganaki boneka akaanafu.
Kiri naꞌbandu bakulu batagakizi ki fwa, bátazi shaaja.
Umundu úwafwagaga mbura-kihe, agakizi fwa neꞌmyaka igana.
Neꞌri angafwa átazi hisa imyaka igana, agamenyeekana kwo ali munabyaha, na kwo adaasirwi.
21 Mu yako kaaya, abandu bagakizi yubaka inyumba, banazituule mwo.
Ngiisi ábagakizi lima imizabibu, boonyene bagagiyimbula, banagilye.
22 Ndaaye úgakizi yubaka inyumba,
mbu abandi bandu banayiji ziyifunda mwo.
Ndaanaye úgakizi lima indalo,
mbu inayimbulwe naꞌbandi-bandi bandu.
Abandu baani bagakizi lama bweneene, ngeꞌbiti.
Abataluule baani, ngiisi byo bagayitubaanulira kwo,
byebyo byo bagashambaalira.
23 Imikolwa yabo itâye ki fwagage ubusha.
Naꞌbaana baabo batâye ki longe ubuhanya.
Abandu baani booshi, Nahano agakizi bagashaanira.
Kiri naꞌbaana baabo, kwo na kwokwo.
24 Ku kyanya bagaaba batazi mbuuna,
ngakizi gwanwa keera nabayuvwa.
Ikyanya bagaaba batazi twisa ukumbuuna,
ngakizi bashuvya!
25 Yaho ku mugazi gwani mutaluule,
ndaaye úgakomeresibwa, kandi iri kuyitwa.
Imirunga neꞌbibuzi bigaragirira kuguma.
Indare zigakizi yahirirwa nga ngaavu.
Halikago umujoka gwohe, ibyokulya byagwo, lugaaba luvu naaho.»
Kwokwo, kwo Nahano adesiri!*65.25 Hisaaya 11.6-9.