66
Nahano agaatwa imaaja zaꞌbandu baꞌmahanga gooshi
1 Nahano adetaga kwokuno:
«Igulu, kyo kitumbi kyani kyoꞌbwami.
Neꞌkihugo, kyo ndi mu laaviza kwo.
Aaho! Hayagi ho mugaki nyubakira inyumba?
Ka hali ahandu ho nangaluhuukira?*66.1-2 Mataayo 5.34-35; 23.22; Mikolezi 7.49-50.
2 Yibyo byoshi, ka ndali nienyene nie kabibumba?
Ee! Birya byoshi, biri byeꞌmwani.»
Nahano adetaga na kwokuno:
«Umundu úli mu nzimiisa naaho, ali ulya mutuudu,
anabe anzimbahiri.
Ikyanya ndi mu múbwira igambo,
anayami lishishikala kwo.
3 «Si balya babi boohe, ikyanya bali mu ndangira ituulo lyeꞌngaavu,
lyo bali mu ba ngoꞌmundu úwayitana.
Neꞌkyanya bali mu ndangira ituulo lyeꞌbibuzi,
lyo bali mu ba nga úwasingula akabwa igosi.
Ikyanya bali mu ndangira ituulo lyoꞌmushyano,
bali mu ba nga bayiji mbeereza umuko gweꞌngulube.
Neꞌkyanya bali mu nyokera umubadu,
bali mu ba nga bali mu yikumba imigisi.
Yaba bandu bakola mu yifunda mu ngiisi byo baloziizi.
Imitima yabo ikuuziri ukuyilala mu bitali nga byo.
4 Ku yukwo, nienyene ngatoola ibihano byabo.
Binalole ku biri mu bakanga bweneene.
Kundu ndi mu bahamagala,
si ndaaye úli mu kizi nyakula.
Na kundu ndi mu bahanuula, shoobe!
Si bagweti bagayilala mu bitali nga byo imbere lyani,
mu kulooza ukunyaagaza.»
5 Mwe musimbahiri amagambo ga Nahano!
Yuvwagwi ngiisi kwo akola mu mùbwira:
«Ikyanya mwâli kizi ngulikira,
beene winyu baguma bâli mùshombiri, banakizi mùyimula,
iri banamùhonyoleza, ti:
“Uyo Nahano winyu, ayerekanage ubulangashane bwage,
gira tubone ngiisi kwo mugaaba mukoli shambiiri!”
Yabo beene winyu, si bâye teezibwe ishoni!»
6 Yuvwagwi na ngiisi kwaꞌkaaya kakoli yijwiri mwoꞌlunganga.
Lulyosiri mu nyumba ya Nahano.
Mukuba, Nahano akola mu hana mwaꞌbagoma baage,
nga kwo bibakwaniini.
7 Umukazi atangabuta umwana woꞌbutabana,
átazi yuvwa umukero.†66.7 Bwigule 12.5.
8 Kwo na kwokwo, ndaaye mundu úkabona kweꞌkihugo kyangatondeera ku lusiku luguma naaho.
Kiri noꞌmulala, ka gwangatondeera ku liguma? Nanga!
Halikago i Yerusaleemu, yo igatondeera ku lwolwo lusiku luguma.
Aahago! Amagambo mwene yago, ka keera mukagayuvwa?
Ka keera mukanagabona?
Ku kyanya i Sayuni ikiri mu tondeera ukuyuvwa umukero,
lyeryo ngana, igayami buta.
9 Rurema Nahamwinyu, adetaga kwokuno:
«Ka nangahisa umwana ku lusiku lwoꞌkubutwa kwo, na mbuli múhangirira kwo atabutwe? Nanga!
Kwokwo na niinyu, ndangahangirira kwo ikihugo kiinyu kitabutwe.»
10 Ku yukwo, mwe mukuuziri i Yerusaleemu, mushambaale!
Na niinyu mwe muvunikiiri Yerusaleemu!
Bwo mushuba mu kigandaaro hiꞌgulu lyayo, mutambe, munasheke.
11 Mugakizi holeera, munayigute, ngoꞌmwana úgweti úgayonga ibeere.
Mugakizi longa akanyabungaka keꞌbindu byayo biija,
ubulangashane bwayo bunakizi mùshambaaza.
12 Nahano adetaga kwokuno:
«Akaaya keꞌYerusaleemu, ngakaleeta mwoꞌmutuula, gukizi hinga nga lwiji.
Ubugale bweꞌmahanga, bugakizi mùyijira, nga lwiji úluyijuliiri.
Ngakizi mùkuya-kuya, nga kwoꞌmukazi ali mu kuya-kuya umwana mwanuke.
Ali mu múbiika ha kambokwa, anamúlere, iri anamúshaasa.
13 E Yerusaleemu, ngakizi mùholeeza,
nga kwoꞌmukazi ali mu holeeza umwana.
14 Yibyo byoshi, ikyanya mugabibona, imitima yinyu igashagaluka.
Indege ziinyu zigashubi kana, munakizi kula nga byasi.
Lyeryo, abandu banasobanukirwe kwo nie Nahano,
na kwo nie mu tabaala abakozi baani.
Haliko ábanjombiri, boohe, ndi mu barakarira ngana-ngana.»
15 Lolagi! Nahano akola mu yija alyagagi noꞌmuliro,
gira ayiji yerekana uburaakari bwage.
Amagaare gaage giꞌzibo, gali mu yija mulindi nga kihuhuuta.
Ku yikyo kyanya, imbigi zoꞌmuliro zigaminika abandu.
16 Nahano agaahana abandu ku muliro, na ku ngooti.
Ehee! Na yabo ábagaminikwa, bagaaba kanyegete.
17 «Bandu baguma bagweti bagayitaluula, iri banayishukula, gira balonge ukuyikumba imizimu yabo ha kiteebo. Haaho, bali mu kulikira umugingi úli mu kati kaabo, banalye inyama zeꞌngulube, na zeꞌmbeba, neꞌbindi byokulya íbiri mu yagazania.
Ku kasiisa, balya booshi, ukufwa, bagaafwa.»
Kwokwo, kwo Nahano adesiri!
Ikihugo kihyahya
18 «Byoshi byaꞌbandu bagweti bagaakola, mbiyiji-yiji. Nyiji kiri neꞌnzaliro zaabo. Buno, ngola mu kuumania abandu beꞌmilala yoshi, naꞌbeꞌndeto zooshi, gira babone ubulangashane bwani. 19 Baguma baabo, ngabagira mweꞌkisoomeza. Na ngiisi ábagaaba basigiiri, ngabatwala zibe ndumwa mu binyamahanga. Ngaatuma baguma i Tarasisi, naꞌbandi i Puuti, naꞌbandi i Luudi, heꞌbikalage biri mu fwora imiheto. Abandi banagende i Tubaali, naꞌbandi i Bugiriki, naꞌbandi mu gandi mahanga. Mukuba, iyo munda, abandu batazindi yuvwa imyazi yani, kandi iri ukubona ibitangaaza byani. Kwokwo, bagakizi gendi yereka ibinyamahanga ubulangashane bwani.
20 «Yabo bandu, kwokwo kwo bagagalula beene winyu booshi ukulyoka mu mahanga. Booshi banayije halinde i Yerusaleemu, ku mugazi gwani mutaluule. Baguma bagayijira ku fwarasi, naꞌbandi ku punda, naꞌbandi ku ngamiya, naꞌbandi mu magaare. Yabo booshi, bagaleetwa ngiꞌtuulo írikwaniini imwani. 21 Na mu yabo ábagayija, ngatoola baguma, babe bagingi, naꞌbandi babe Balaawi.» Kwokwo, kwo Nahano adesiri!
22 Nahano adetaga kwokuno:
«Nâye bumbe igulu lihyahya, neꞌkihugo kihyahya.
Yibyo byombi, bigaaba biyamiri ho imyaka neꞌmyakuula!
Kwo na kwokwo, amaziina giinyu, kiri naꞌbandu ba mu bibusi biinyu, bagaaba bayamiri ho.‡66.22 Hisaaya 66.17; 2 Peturu 3.13; Bwigule 21.1.
23 Abandu booshi bakwaniini bakizi yiji nyikumba,
ku ngiisi lusiku lukulu lweꞌmbaluko yoꞌmwezi, na ku ngiisi lusiku lweꞌSabaato.
24 «Abandu baani bagakizi huluka, banagendi gwana ibitumba byo ábakahuna imbere lyani. Biyamiri biri mu liibwa neꞌbitwera íbitâye fwe. Binahiire noꞌmuliro úgutâye zime. Abandu booshi, ikyanya bagaabona kwokwo, bagahuumirwa bweneene!§66.24 Mariko 9.48.»