10
Ukubiikwa kwaꞌbandi batwi beꞌmaaja, Toola na Yahiri
1 Ikyanya Habimereki akaba keera afwa, Rurema anayimangika ugundi mutwi weꞌmaaja, iziina lyage ye Toola. Uyo Toola, âli riiri mugala Puwa, mwijukulu Doodo, wa mu mulala gwa Hisakaari. Âli tuuziri mu kihugo kyeꞌShamiiri, mu migazi yeꞌHifurahimu. Rurema anamútuma kwo ayiji guluula Abahisiraheeri. 2 Uyo Toola, akamala imyaka makumi gabiri niꞌshatu agweti agahambuula Abahisiraheeri. Neꞌkyanya naye akashaaja, anaziikwa haaho i Shamiiri.
3 Ikyanya Toola akaba keera afwa, mu Bahisiraheeri mwanayinamuka ugundi mutwi weꞌmaaja, iziina lyage ye Yahiiri weꞌGiryadi. Uyo Yahiri, anahisa imyaka makumi gabiri niꞌbiri agweti agaatwa imaaja zaabo.
4 Uyo Yahiiri, âli busiri abaana boꞌbutabana makumi gashatu, banâli kizi gendera ku bapunda makumi gashatu. Bâli twaziri utwaya makumi gashatu mu kihugo kyeꞌGiryadi. Yutwo twaya, tuli mu buuzibwa Twaya twa Yahiri halinde zeene. 5 Uyo Yahiiri, ikyanya akashaaja, anaziikwa i Kamooni.
Abahisiraheeri bateerwa naꞌBahamooni
6 Abahisiraheeri banashubi gira íbitali nga byo imbere lya Nahano. Bakajanda Nahano lwoshi, batanakizi ki múyikumba. Si bâli kizi kolera umuzimu Baali, noꞌmuzimu Hashitarooti, kuguma neꞌgindi migisi yeꞌHaraamu, na yeꞌSidooni, na yeꞌMohabu, na yeꞌHamooni, na yeꞌBufirisiti.
7 Ikyanya Abahisiraheeri bakagira kwokwo, kyanatuma Nahano agabarakarira, anababiika mu maboko gaꞌBafirisiti, na mu gaꞌBahamooni. 8 Mu gwogwo mwaka, banatondeera ukukizi balibuza, banahisa imyaka ikumi na munaana bagweti bagavindagaza Abahisiraheeri booshi ábâli tuuziri i Giryadi mu kihugo kyaꞌBahamoori, íkiri isheere yoꞌlwiji Yorodaani. 9 Yabo Bahamooni banajabuka ulwiji Yorodaani, gira bayiji lwisa beene Yuda, na beene Binyamiini, na beene Hifurahimu. Kyanatuma Abahisiraheeri bagalonga amakuba mingi bweneene.
10 Iri hakatama, yabo Bahisiraheeri banatakira Rurema Nahamwabo, ti: «Ala twe! Keera tukayifunda mu byaha bweneene imbere lyawe, twanakujanda, twanakizi kolera umuzimu Baali.»
11 Nahano anabashuvya: «Mwâli kizi longa amalibu i Miisiri, na mu kihugo kyaꞌBahamoori, na mu kyaꞌBahamooni, na mu kyaꞌBafirisiti, 12 na mu kyaꞌBasidooni, na mu kyaꞌBahamareki, na mu kyaꞌBamahooni. Aaho! Ikyanya mukandakira, ka ndakamùkiza mu maboko gaabo? 13 Kundu nꞌgamùkiza, mwanashubi njanda, mwanakizi kolera ibindi-bindi íbiri mu yikumbwa. Ku yukwo, ndagaki shubi mùkiza. 14 Na bwo keera mukatoola imigisi yinyu, ibe yo mugendi takira. Inabaagage ye gamùkiza mu gano malibu.»
15 Kundu kwokwo, Abahisiraheeri banashuvya Nahano: «E maashi! Keera tukakuhubira. Ku yukwo, ngiisi byo uloziizi, bibe byo ugatugirira. Si buno, tugweti tugakuyinginga, kwo utukize mu malibu.»
16 Haaho, banayami twikira ku biri mu yikumbwa mu mahanga, banashubi tondeera ukukolera Nahano, kyanatuma Nahano agatondeera ukujengeerwa hiꞌgulu lyaꞌmakuba gaabo.
17 Abahamooni booshi, banahamagalana, banagendi shumbika i Giryadi. Abahisiraheeri nabo, banakuumana, banagendi shumbika i Misipa. 18 Abatwali baꞌBahisiraheeri banayemerezania, ti: «Ngiisi úgayitanga mu kuteera Abahamooni, uyo ye gaaba mutwali weꞌGiryadi.»