3
Abahisiraheeri bakola ngoꞌmukazi mushule
1 Nahano adetaga kwokuno: «Tudete ngoꞌmushosi angayimula mukaage,
noꞌyo mukaage anagendi yangwa noꞌgundi.
Aaho! Koꞌyo yiba angaki shubi múgalula? Nanga, maashi!
Iri angamúgalula, iri anayulubaza ikihugo kyoshi.
E Bahisiraheeri! Kwokwo, kwo niinyu mukoli kuuziri imigisi mingi-mingi.
Aaho! Kutagi buno, kwo mukoli loziizi ukungalukira?
Kwokwo kwo nie Nahano ndesiri.
2 Mutee legamira ku marango.
Ka hali ho mutazindi yiyulubaza neꞌmizimu?
Si mugweti mugalindirira abashule ku butambi bweꞌnjira!
Muli ngoꞌMuharaabu úteziri abandu mwiꞌshamba.
Na bwo muli mu higula mu bushule, keera mwayulubaza ikihugo.
3 Kyo kitumiri keera nahangika invula.
Si invula ya mahona-nvula itakiri mu nia!
Kundu kwokwo, mukiri mu gokomoza ngoꞌmushule.
Ndaanazo shoni mugweti, kiri neꞌhiniini!
4 Buno, mukola mu ndakira kwokuno:
“E daata, uyamiri uli mwira witu ukulyokera ubwanuke bwitu.
5 Aaho! Ka ugakizi turakarira halinde imyaka neꞌmyakuula?”
E Bayuda, kundu muli mu deta kwokwo,
si mugenderiiri naaho noꞌkukizi yifunda mu mabi, nga ngiisi kwo muloziizi.»
Ibyaha byaꞌBahisiraheeri naꞌBayuda
6 Ku kyanya mwami Yosiya âli twaziri, lyo Nahano akambwira: «Ka ubwini ngiisi kwoꞌmuhemu Hisiraheeri agweti agaagira? Si ali mu gendi yikumba imigisi ku marango, na mwiꞌdako lya ngiisi kiti íkidohiri.
7 «Nanayidesa, ti: “Ikyanya Abahisiraheeri bagaaba keera bahuba, hali ikyanya bangaki shubi ngalukira. Haliko, shoobe! Yago mahube gaabo, beene wabo Abayuda, kwo bali banakuhambwa, nabo bakagabona.”
8 «Uyo muhemu Hisiraheeri, ikyanya âli kizi gira ubushule, nꞌgamúyandikira amaruba goꞌkubonesa kwo keera nꞌgamúyimula. Kundu kwokwo, mulumuna wage wa Yuda atananyoboha. Si naye anakizi yifunda mu bwobwo bushule. 9 Ikyanya Abahisiraheeri bâli kizi yiyulubaza mu bushule, batâli kizi yiyubaara. Si bâli genderiiri ukukizi yikumba imigisi, kundu ikabaajwa mu mabuye naaho, na mu biti. 10 Kiri na beene wabo, ingulani zaꞌBayuda batakangalukira ku mitima íshenguusiri. Si bakakizi yihumeera ku bulyalya naaho, kwo bakoli jengiirwi.» Kwokwo, kwo Nahano adesiri.
11 Nahano anashubi mbwira: «Yabo Bahisiraheeri, kundu bakambindulira ingoto, haliko bo babonesiri kwo bakwaniini ukuhima ingulani zaꞌBayuda. 12 Aahago! Ugendi babwira kwokuno:
“E Bahisiraheeri, si mutali bemeera! Mugirage mungalukire.
Ndagaki mùrakarira!
Si nyamiri ndi mu kejererana.
Niehe, ndaayo nziikira nduulana.”»
Kwokwo, kwo Nahano adesiri.
13 «Byo mukwaniini ukugira naaho, muyemeere ibyaha biinyu.
Ee! Muyemeerage kwo mukahuna imbere lyani, nie Rurema Nahamwinyu!
Mukuba, mukalahira kwo mutagakizi nzimbaha,
mwanakizi gendi yikumba imizimu mwiꞌdako lya ngiisi kiti íkidohiri.»
Kwokwo, kwo Nahano adesiri.
14 Nahano adetaga kwokuno: «E baana bahemu,
mugirage mugaluke. Si nie Nahamwinyu!
Kundu mushabukiiri mu mahanga,
ngagalula babiri-babiri ba mu ngiisi mbaga, na muguma-muguma wa mu ngiisi kaaya.
Balya booshi, na mbatwale ku mugazi Sayuni.
15 «Haaho, ngamùheereza abimangizi bahyahya, banabe banzimisiizi. Bagaaba benge, banabe basobanukiirwi bwija.»
16 Nahano ashubi detaga kwokuno: «Ku yikyo kyanya, mugaaba keera mwayushuuka, munakwire mu kihugo kyoshi. Mutagaki kengeera ibya keera, mbu mukizi shubi deta hiꞌgulu lyaꞌKajumba keꞌKihango. Kiri noꞌkukakengeera, mutagakizi ki kakengeera. Mutaganakizi katwaza, kandi iri kugira mbu mulingaanie akandi. 17 Ku yikyo kyanya, i Yerusaleemu igakizi detwa Kitumbi kya Nahano. Abandu booshi bagakuumana yo, gira bakizi ngingika. Batagaki ba mindagabika. Si amabi ágalyagagi mu mitima yabo, bagagatwikira kwo. 18 Mu yizo siku, Abayuda baganywana naꞌBahisiraheeri. Booshi banalyokage mu kihugo íkiri imbembe, banagalukire mu kihugo kyo nꞌgaheereza bashokuluza baabo.»
Abahisiraheeri bagalukira Rurema
19 Nahano adetaga kwokuno:
«E Bahisiraheeri, nâli toniri kwo nangamùgira nga muguma wa mu bagala baani.
Nanganamùhiiri ikihugo kiija ngana-ngana,
kinabe kya kahebuuza ukuhima ibindi byoshi íbiyimbwa ho.
Nanashubi tona kwo mwangakizi mbuuza “E Daata”,
na kwo mutagaki mbindulira ingoto.
20 E Bahisiraheeri, kundu kwokwo, mutanaba bemeera imwani.
Si mukoli ba nga mukazi úwahemukira yiba.»
Kwokwo, kwo Nahano adesiri.
21 «Abandu bagweti bagayamuluka ku marango.
Yayewe! Bahisiraheeri, yabo.
Bakanyibagira, nie Rurema Nahamwabo,
banakizi vujuuka mu bitali nga byo.
Kyo kitumiri bakola mu bululuka, iri banahuuna kwo mbakejeerere.
22 Yohoo, e baana bahemu! Mungalukirage ngana,
halinde nimùkoge.»
Abandu banashuvya, ti: «We Rurema Nahamwitu.
Ku yukwo, tukolaga tugakugalukira.
23 Ku kasiisa, ikyanya twâli kizi yikumba imigisi ku tugangazi na ku migazi,
lyo twâli kizi tebeka bweneene.
Ku kasiisa, Rurema Nahamwitu, yehe ye mwene ubukize.
24 «Gulya muzimu Baali, ukulyokeraga ubwanuke bwitu, bashokuluza biitu bâli kizi gutangira ibibuzi neꞌngaavu. Banakizi gutangira kiri naꞌbaana baabo boꞌbutabana na boꞌbunyere. Kwokwo, kweꞌmisi yabo, bâli kizi gifwisa ubusha, mu kukizi hoza Baali.
25 «Ku yukwo, bikwiriiri ishoni zituyizingage kwo, zinatudeedeke haashi. Mukuba, tweshi na bashokuluza biitu, twâli kizi gira ikyaha imbere lya Rurema Nahamwitu. Ukulyokera ubwanuke bwitu halinde buno, ndaaye úkamúsimbaha.»