4
Nahano ahanuula Abahisiraheeri, kwo batwikire ku byaha
E Bahisiraheeri, Nahano adetaga kwokuno:
«Iri byangaziga, mungalukire!
Imigisi yinyu yoshi, si iri kyagaza imbere lyani!
Aaho! Mugijandage, munangalukire.
Munambiikire indahiro kwiꞌziina lyani, ti:
“Nga kwo Nahano ayamiri ho”.
Neꞌri mwangadeta kwokwo mu kati koꞌkuli,
lyeꞌgindi milala igakizi gashaanirwa.
Inakizi mùhuuza hiꞌgulu lya byoshi byo muli mu gira.»
 
Nahano abwira kiri naꞌbatuulaga beꞌYerusaleemu, naꞌbandi Bayuda kwokuno:
«Bweꞌndalo ziinyu keera zikashoosha, mukizi zishosholola.
Mutakizi shubi byala imbuto mu migenge.
Ee maashi! Nga kwo mutengwirwi mu magala giinyu, mutenguulwe na mu mitima yinyu, halinde mukizi kolera Nahano naaho.
Buzira kwokwo, ibyaha biinyu bigayasa uburaakari bwage nga muliro,
ndaanaye úgaahasha ukubuhoohya!»
Abandu beꞌBuyuda balonga amakayu
«Mugendi menyeesa ábatuuziri i Yerusaleemu, kuguma naꞌbandi Bayuda,
kwo bakengule abandu, mu kudihiriza ikibuga mu kihugo kyoshi!
Muberangire kwiꞌzu lihamu kwokuno:
“Muyijage mweshi, tutibitire mu twaya tuzitire!”
Mushonie irembera i Sayuni, likizi yereka abandu ngiisi ho bagalenga.
Mutaki vwebeebe, si mutibitage.
Nahano akolaga agalyosa ikihano uluhande lweꞌmbembe.
Yikyo kihano, igaaba nguuke yoꞌkushereeza ngana-ngana!
Abasirikaani bagahuluka,
nga ndare íkola mu vuvunyuka mwiꞌbundo lyayo.
Ee! Nakiminika keera akashaaga mu kihugo kyage, anakola mu njira,
gira ayiji shereeza ikihugo kiinyu.
Utwaya twinyu tugasigala biguuka,
ndaanaye mundu úgatutuula mwo.
Ku yukwo, mukenyerage amasuuzu, mu kuyerekana kwo mukoli jengiirwi.
Munabululuke ku kimombo.
Si uburaakari bwa Nahano butazi hooha hiꞌgulu liitu!»
 
Nahano adetaga kwokuno: «Yibyo byoshi, mango bikoleka, mwami agatwika indege, kuguma naꞌbatwali baage. Abagingi bagahuumirwa ngana, naꞌbaleevi banashenguke.»
10 Haaho nanadeta, ti: «E Nahano Rurema, yaba bandu, si ukabateba! Ukabalagaania kwo bagaaba noꞌmutuula. Halikago buno, ingooti yo ibakola mwiꞌgosi.»
11 Ku yikyo kyanya, Nahano agamenyeesa abandu beꞌYerusaleemu, naꞌbeꞌBuyuda booshi kwokuno: «Imbuusi yiꞌduutu igalyoka ku migazi ya mwiꞌshamba, inayiji huutira abandu ba Rurema. Iyo mbuusi itaganaba ndembu nga mbuusi yoꞌkuyeluula. 12 Si ngalungika imibangami. Leero, nienyene ngola ngabahaniiriza.»
Abagoma basokanana i Buyuda
13 «Lolagi! Umugoma agweti agatuyijira, akola mu tukanga nga kibungu íkiyidisiri.
Amagaare gaage giꞌzibo gali mu suula umulindi, nga kihuhuuta.
Ifwarasi zaage zigweti zigaganga mulindi ukuhima utushuta.
Ala twe! Si tukolaga tugaahera!
 
14 «E bandu beꞌYerusaleemu, iri mwangalooza ukukizibwa, muyiyeruuse,
mutanakizi shungika amagambo mabi.
15 Abandu beꞌDaani naꞌbeꞌHifurahimu, bakola mu menyeesania
kwo mukola mugashereezibwa.
16 Yago magambo, ugakengule ibinyamahanga, kiri naꞌbandu beꞌYerusaleemu.
Ee! Ibinyamahanga bikolaga bigayiji tuteera.
Bigweti bigabanda induulu,
mu kushomboroza izibo mu twaya tweꞌBuyuda.
17 Abagoma bakoli sokaniini i Yerusaleemu, ngaꞌbalaazi beꞌndalo.
Na íbitumiri bigaaba kwokwo,
bwaꞌbandu baani keera bahuna imbere lyani.»
Kwokwo, kwo Nahano adesiri.
18 «E Bayuda, si kino kihano kimùkayiri bweneene,
kinali mu mùsiriiza mu mitima!
Yikyo kihano, íbitumiri kigakoleka imwinyu,
bwo mukiri mu gira íbitali nga byo.»
Ingerania zalwaza Yeremiya
19 Umutima gwani gukola mu lyana!
Gukola mu lyana bweneene! Keera gwanatulagula!
Umutima gwani, gugweti gugapuupa-puupa ngana!
Si keera nayuvwa ibibuga bikola mu dihirizibwa,
kuguma noꞌlujongo lweꞌkiteero.
Ku yukwo, ndagaki hulika.
20 Inguuke ziri mu kizi kulikirana,
halinde ikihugo kyoshi kinabe kikoli sherebiiri.
Abagoma keera bakashikula amaheema giitu,
ndanaki hiiti ho nangashumbika.
21 Yago marembera goꞌkuyerekana kwo halyagagi ikiteero,
ngagenderera ukukizi gabona-bona halinde mangoki?
Kiri na yibyo bibuga biꞌzibo, ngakizi biyuvwa halinde mangoki?
 
22 Nahano adetaga kwokuno:
«Ku kasiisa, abandu baani bali bahwija.
Si batanyiji! Amenge gaabo, gakubisirwi.
Byo bayiji naaho, biri byebyo-byebyo byaha.
Si íbikwaniini, byohe batabisobanukiirwi.»
23 Nie Yeremiya, ikyanya nꞌgalangiizagya mu kihugo,
nanabona kwo kikola kimaata.
Kiri niꞌgulu, ikyanya nꞌgalibona,
ndaagwo mulengeerwe úguliri kwo.
24 Ha nyuma, nanalangiiza ku migazi,
nanabona kwo ikola mu jugumbana, kuguma noꞌtugangazi.
25 Ikyanya nꞌgalangiiza, ndaaye mundu ye nꞌgabona.
Kiri na mu kyanyaanya, utunyuni twoshi, ndaatwo.
26 Ikyanya nꞌgalangiiza, nanabona kwiꞌdaho írishuba neꞌnagiira, likola ishamba.
Utwaya twoshi, tukola biguuka.
Na íbitumiri bigaaba kwokwo, bwo Nahano akoli turakariiri.
 
27 Nahano adetaga kwokuno:
«Ikihugo kyoshi kigashereezibwa.
Kundu kwokwo, ndagakishereeza lwoshi-lwoshi.
28 Abandu ba mu kihugo, bagaliruuka.
Niꞌgulu ligayidika kweꞌkihulu.
Keera nakyula, ndanganaki hinduka.
Keera nꞌgashungika, kwoshi kwokwo!»
 
29 Abasirikaani ábali mu gendera ku fwarasi, kiri na ábali mu hagata imiheto,
bagweti bagayija noꞌmululumo.
Kinatume abandu booshi ba mu twaya,
bagatibitira mu bishungu-shungu, naꞌbandi mu nyaajwe.
Yoho wee! Utwaya twoshi tukoli sigiiri tumaata.
Ndaaye úki tutuuziri mwo.
30 E bandu beꞌYerusaleemu, kutagi leero mugaagira?
Si keera mwashereezibwa lwoshi-lwoshi!
E bandu beꞌBuyuda, kituma kikagi muki gweti mugayambala ibyambalwa byoꞌmulimbo?
Munakiri mu yilimbiisa noꞌbungeni-ngeni úbukatulwa mu nooro!
Na kituma kikagi mukiri mu yilaba ishalo nyiiru-nyiiru ku masu?
Yukwo kuyilimbiisa kwinyu, si kulyagagi kwa busha!
Si buno, biira biinyu keera bamùnenuuka,
banakoli mùhigiiri, kwo bamùyite!
31 Nyuvwiti akaamyo, nga koꞌmukazi úgweti úgaabuta ulubuta lwa mbere.
Kiziga i Yerusaleemu yonyene, ye gweti igahemagira-hemagira!
Akola mu lambuula amaboko, iri anatakira Rurema kwokuno:
«Ala nie! Si abahulula bano, bakoli nyita!»