8
Nahano adetaga kwokuno: «Ku yikyo kyanya, abandu bagazuula imigongolo yaꞌbaami beꞌBuyuda. Banazuule kiri neꞌyaꞌbatwali baabo, neꞌyaꞌbagingi, neꞌyaꞌbaleevi, neꞌyaꞌbagunda. Iyo migongolo, bagagikabulira mijande-mijande, inasigwe haaho ku kyanya kiꞌzuuba, na kyoꞌmwezi, neꞌndonde. Mukuba, beene iyo migongolo bâli kuuziri ukukolera byebyo bya mwiꞌgulu. Banâli kizi bihanuusa, iri banabiyikumba. Ku yukwo, imigongolo yabo, ndaaye úgashubi yiji gikuumania, mbu agiziike. Si igasigala haashi mijande-mijande ngiꞌsukiro. Yabo banangora-mabi, ngiisi ábagaaba basigiiri, ngabashabulira hooshi mu mahanga. Halikago iyo munda, batagalooza ukulama, si bagakizi yifwija naaho kwo bafwe.» Kwokwo Nahano adesiri.
Abayuda balahira ukugalukira Nahano
«E Yeremiya, yabo bandu, ugendi babwira kwo Nahano adetaga kwokuno:
Ikyanya umundu ali mu gwa, ka atali mu shubi vyuka?
Neꞌkyanya ali mu habuka, ka atali mu kebukwa, anashubi galukira mu njira?
Aahago! Yaba bandu beꞌYerusaleemu boohe, kutagi keera bakajanda injira ítungiini?
Si bakola mu vujuuka mu binyoma, iri banalahira kwo batagangalukira.
Ngiisi byo bashuba mu deta, nabiyuvwa byoshi.
Si bashuba mu ravwanga ngana!
Mu kati kaabo, ndaaye úli mu jengeerwa hiꞌgulu lyaꞌmabi gaage,
mbu atee yibuuza, ti: “Ala nie! Maki gano ngweti ngaagira?”
Si ngiisi muguma wabo, agweti agatibita bwalaafwe mu byaha,
nga fwarasi íri mu girigimba mwiꞌzibo.
Akabangarara kayiji-yiji ikyanya kyoꞌkubunga.
Kiri niꞌhumba, naꞌkalembe-rembe, noꞌtushuta,
nabyo biyiji ikyanya kyo biri mu bunga kwo.
Halikago, yabo bandu baani boohe, batayiji byo Nahamwabo aloziizi.
 
«Mugweti mugayihaya, mbu: “Twehe tuli bitegeereza,
tunakaniziizi imaaja za Nahano.”
Kundu kwokwo, abigiriza biinyu bagweti bagazishobania,
mu kukizi yandika ibinyoma.
 
«Yabo bitegeereza biinyu, si keera bakalahira igambo lya Nahano!
Aahago! Yubwo bwitegeereze bwabo, hayagi bwamalira?
Si bagashenguka ngana, banagwatwe mu mitego yabo boonyene!
 
10 «Balya bandu, booshi bagweti bagakubirira ibindu,
baba bato, kandi iri bakulu.
Ngiisi muguma wabo agweti agayihahalira yenyene.
Kiri naꞌbaleevi, naꞌbagingi, ubulyalya bubayisiri.
Ku yukwo, bakaabo, ngabaheereza abandi bashosi.
Kiri neꞌndalo zaabo, ngaziheereza abandi.
11 Yabo bandu baani, ngiisi ábali mu komeereka mu kati kaabo,
bagweti bagabalunga inguma ku maleeza kwo.
Banakizi deta: “Umutuula guli ho! Umutuula guli ho!” Kiziga umutuula ndaagwo úguli ho!
12 Ikyanya bali mu gira ibitalaalwe, ka biri mu bateera ishoni? Aahabi!
Si boohe, ndaazo shoni bahiiti, kiri neꞌhiniini.
Kiri noꞌkuteteerwa ndaakwo!
Ikyanya ngaahana abandi, nabo ngabanyanyaga haashi.
Ee! Bagaagwa mu yeyo nguuke.»
Kwokwo, kwo Nahano adesiri!
 
13 «Imimbu yinyu, ngamùsaagiza yo.
Ku matavi geꞌmizabibu, ndaayo mugaki longa kwo.
Neꞌbiti byeꞌmitiini, kwo na kwokwo.
Kiri neꞌbyasi byabyo, bigayumaguka.
Ngiisi byo nâli kizi mùheereza, ngabizimiiza lwoshi.»
Kwokwo, kwo Nahano adesiri.
 
14 Abandu ba Rurema banabuuza:
«E balya, kituma kiki tuki bwatiiri hano?
Leka tugendi yingira mu twaya tuzitire, mube mwo tugaafwira.
Si keera tukahubira Rurema Nahamwitu!
Keera anatwa uluhango, kwo atuminike.
Keera atuheereza amagoloovi ágali mwo kolobwe, mbu tunywe.
15 Twâli langaliiri kwo tugalonga umutuula, halinde tulonge ukukira, tunagenduukirwe.
Kundu kwokwo, ndaabyo twalonga.
Si byo tukalongaga naaho, kiri kihuumula.
16 Yuvwagwi ngiisi kweꞌfwarasi zaꞌbagoma zigweti zigafuura iriira munda imbembe, mu kihugo kya beene Daani!
Si zikola mu girigimba, halinde idaho linajugumbane!
Abagoma bakola mu njira, gira bagayiji shereeza ikihugo kiitu, na íbikiri mwo byoshi.
Bagashereeza utwaya twoshi, na booshi ábatutuuziri mwo.»
 
17 Nahano ashubi detaga kwokuno: «Lolagi! Keera natuma imijoka, iyiji mùkoma.
Iyo mijoka, ndaaye úwangagikubika, mbu itamùkome.»
Yeremiya ajengeerwa
18 E Rurema, umutima gwani gukola mu siriira noꞌmwizingeerwe,
ndaanaye woꞌkugungania.
19 Yuvwagwi ngiisi kwaꞌbandu baani bakola mu lira, kiri na ábali mu mahanga.
Bali mu buuza, ti: «Ka Nahano ataki tuuziri mu kaaya keꞌSayuni?
Ee! Ye mwami wamwo! Ka atakiri mwo?»
 
Nahano anashuvya: «Aahago! Kituma kiki bakandaakaza,
mu kukizi yibaajira imigisi ya íbiri mu yikumbwa mu mahanga, inali ya busha-busha?»
 
20 Yayewe! Ikyanya kyoꞌkuyimbula keera kyalenga, kiri neꞌkikamo,
tutanazi kizibwa.
21 Ikyanya abandu baani bali mu yogogozibwa,
naani ndi mu yami twika indege.
Na ngweti ngababululukira, iri na njenguka hiꞌgulu lyabo.
22 E balya! Kituma kiki inguma zaꞌbandu baani zitazi kira?
Mu kihugo kyeꞌGiryadi, ka mutalyagagi umuti gwoꞌkuzilunga?
Ka ndaaye mufumu úki ba mwo?
23 Yoho wee! Nangaloziizi ngiꞌtwe lyani lyangabiiri kirigo kyaꞌmiiji,
naꞌmasu gaani, nga gangabiiri ishyoko yeꞌmigenge.
Kwokwo, yabo bandu baani ábakayitwa,
nangayamiri ndi mu balirira ubushigi niꞌzuuba.