9
Ndaaye mwemeera mu Bayuda
1 «Yaba bandu baani, balyagagi bahuni, banali bashule.
Aahago! Nangaloziizi ukubajanda, na nyigendere,
ngendi tuula haꞌbageezi bali mu shumbika mwiꞌshamba.
2 Yaba bandu bali mu koleesa utunwa twabo nga muheto,
mu kulasha-lasha ibinyoma.
Ibibeesha, byo bikoli luguusiri mu kihugo.
Ikyanya bali mu mala ikyaha kiguma, banayami yifunda mu kindi.
Mukuba, batanyiji nga ngiisi kwo ndi.»
Kwokwo, kwo Nahano adesiri.
3 «Yehee! Ukizi yiyeka naꞌbiira baawe.
Kiri na beene winyu, utayami bayitegera umulundi.
Kundu balyagagi beene winyu, si bagweti bamùlyalyania!
Kiri na ngiisi mwira, ali kateerania!
4 Ngiisi mundu agweti agaateba uwabo.
Ndaanaye úli mu deta ukuli.
Abayuda keera bakayikomeereza ukukizi beesha.
Na mu kukizi gira ibyaha, keera bayiluhya.
5 E Yeremiya! Ukoli tuuziri mu banabibeesha,
banalahiiri ukummenya nga ngiisi kwo ndi.»
Kwokwo, kwo Nahano adesiri.
6 Nahano woꞌbushobozi bwoshi ashubi detaga kwokuno:
«Yabo Bayuda, ngola ngabagera,
nga kwo bali mu leeza ikyuma mu muliro.
Ndaakwo kundi nangabagirira,
bwo bakoli yifuuziri mu byaha.
7 Amagambo gaabo, gayugihiri bweneene nga myambi,
ganayijwiri mwoꞌbulyalya.
Ngiisi mundu, mu kuganuuza uwabo, ali mu deta amagambo manunu-manunu.
Kiziga mu mutima gwage, akoli shungisiri ukugendi múteera!
8 Aahago! Abandu mwene yabo, ka ndakwiriiri mbahane?
Ee ma! Ngwiriiri mbayihoole.»
Kwokwo, kwo Nahano adesiri.
Ikimombo mu kaaya keꞌYerusaleemu
9 Nie Yeremiya, ngweti ngabululukira imigazi,
kiri neꞌndagiriro za mwiꞌshamba.
Mukuba, byoshi keera byahangalala, ndaanaye úkiri mu bilenga mwo.
Kiri neꞌngaavu, ndaazo ízikiri mu yana mwo.
Byoshi keera byahera, kiri neꞌbitugwa noꞌtunyuni.
10 Nahano adetaga kwokuno:
«Akaaya keꞌYerusaleemu, ngakagira bibe biguuka, gunabe mushaka,
halinde kanahinduke igomberano lyeꞌmirunga.
Abandu ba mu twaya tweꞌBuyuda, ngabashaabula,
halinde yutwo twaya tusigale tuzira bandu.»
11 Aahago! Yibyo byoshi, nyandagi mwitegeereza, úwangabisobanukirwa? Na nyandi úkaganuuza Nahano, halinde anamúbishuuka íbitumiri ikihugo kyashereera? Kituma kikagi ikihugo kikola kimaata ngiꞌshamba? Na kituma kiki ndaaye mundu úkiri mu kilenga mwo?
12 Nahano anashubiza, ti: «Íbitumiri bikolaga kwokwo, bweꞌkyanya nꞌgaheereza abandu baani imaaja, batakazitwaza, banazijajaaka. 13 Banali mu higa kwo bagire naaho ngiisi kwo baloziizi. Banakizi yikumba imigisi ya Baali, nga kwo bashokuluza baabo bakabaheta.»
14 Nahano woꞌbushobozi bwoshi, Rurema waꞌBahisiraheeri, ashubi detaga kwokuno: «Lolagi! Yabo bandu ngabaliisa ibyokulya bilulu, banakizi nywa naꞌmiiji ágali mwo kolobwe. 15 Ngabashabulira mu mahanga gooshi, ngiisi ho batayiji. Kiri na bashokuluza baabo, batakahamenya. Ngabalandiriza nvumbiiti ingooti, halinde mbazimiize booshi-booshi.»
16 Nahano woꞌbushobozi bwoshi, adetaga kwokuno:
«Yaga magambo, mugirage mugayitoneese kwo!
Munalaalike abakazi ábayiji ukulira ku mabiihe,
banabe ngana bayiji umukolwa gwabo.
17 Mubabwire kwo bavwarukage, banakizi tulirira ku kimombo.
Kwokwo, kwaꞌmasu giitu gagakereka mweꞌmigenge.
Ee! Mu ngohe ziitu, mugakizi jalabanda imigenge nga lwiji.»
18 Mu kaaya keꞌSayuni, abandu bakola mu bululuka, ti:
«Ala twe! Si twaheraga! Keera twayagagala lwoshi.
Inyumba ziitu, keera zahongolwa, tunakola mu yimulwa mu kihugo kiitu.»
19 Mwe bakazi, mutegage amatwiri,
gira muyuvwe ngiisi kwo Nahano adeta.
Mukizi komeereza banyere biinyu ukulira ku mabiihe.
Mukizi yigirizania luno lwimbo lweꞌkimombo:
20 «Narufu keera asheshera mu twazo twitu,
anatuteera mu nyumba ziitu, kundu ziyamiri ziri nzitire.
Akola mu kumbulula abaana biitu mu njira,
neꞌmisore yitu mu mitalimbwa.»
21 «E Yeremiya, ubwire abandu kwo Nahano adetaga kwokuno:
“Ibirunda byaꞌbandu, bikoli lambamiri bwalaafwe.
Biryagagi nga nagiira íyafukwa mu ndalo.
Binakoli lambamiri nga mihuli yeꞌngano,
ndaanaye mundu woꞌkugikuumania.”»
22 Nahano adetaga na kwokuno:
«Umwitegeereza atakizi yihaya mbu bwo ali noꞌbwitegeereze.
Neꞌkikalage kitakizi yihaya mbu bwo ali noꞌbukalage.
Noꞌmugale atakizi yihaya mbu bwo ali noꞌbugale.
23 Umundu, iri angagira mbu ayihaye, akizi yihaya naaho bwo akoli nyiiji, kwo nie Nahano,* 9.23, 24 1 Bakorindo 1.31; 2 Bakorindo 10.17.
na kwo ndi mu kizi kundana mu kati koꞌbwemeera,
na kwo ndi mu kizi twa imaaja mu kati koꞌkuli.
Abandu ábali mu yihaya kwokwo, bo bali mu nzimiisa.»
Kwokwo, kwo Nahano adesiri.
24 Nahano ashubi detaga kwokuno: «Mu siku ízigayija, kundu abandu bangaba batengwirwi ku magala, ngabahana ngana. Kuli kudeta, 25 Abamiisiri, naꞌBayuda, naꞌBahedoomu, naꞌBahamooni, naꞌBamohabu, kiri naꞌbatuulaga booshi ba mwiꞌshamba, balya ábali mu kunguula imishaku mu mbengere. Balya booshi, batâli kizi tenguulwa nga kwo bibakwiriiri. Kiri naꞌBahisiraheeri booshi, nabo batazindi tenguulwa ku biri mu mitima yabo.»