10
Nahano akambira abandu baage
1 E Bahisiraheeri, muyuvwagwe ngiisi byo Nahano amùbwira:
2 «Mutakizi hetwa neꞌbinyamahanga.
Ikyanya mugaabona íbiri kwiꞌgulu, bitakizi mùkanga.
Si muleke ibinyamahanga, babe bo gakizi kanguka hiꞌgulu lyabyo.
3 Si yibyo ibinyamahanga, ingesho zaabyo, ziryagagi za busha!
Bali mu gendi tema ibiti mu kishuka, banabibaaje mweꞌmigisi.
4 Ha nyuma, iyo migisi, bali mu gilimbiisa, mu kugibugiiriza kweꞌharija neꞌnooro,
banayabiire inyundo, banagikomere mweꞌmisumaari, gira itagwe.
5 Iyo migisi, ndaalyo igambo yangagira, liba liija, kandi iri libi.
Ku yukwo, mutalekage kwo ikizi mùhemura.
Iyo migisi, iri nga bikangiiso mu ndalo yeꞌngukuma, kwo biri mu kanga utunyuni.
Iyo migisi itashobwiri ukudeta.
Na bwo itali mu genda yonyene, abandu bali mu genda bagibetwiri.»
6 E Nahano, ndaaye úkuhisiri kwo.
Mukuba, uli mukulu bweneene. Niꞌziina lyawe lyo liri mwoꞌbushobozi.
7 Uli mwami waꞌmahanga gooshi. Unakwaniini bweneene ukugingikwa.
Mu milala yoshi, na mu maami gooshi, ndaaye mwitegeereza úli nga we.
8 Yabo banamigisi, booshi balyagagi bahwija, binali bizeeze.
Ngiisi byo bali mu yigiriza, bishaaziri naaho mu migisi íri mu baajwa mu biti.
9 Yabo bandu, bali mu leeta iharija ukulyoka i Tarasisi, neꞌnooro ukulyoka i Hofiiri.
Ha nyuma, banabiheereze banaluganda, gira bagilimbiise.
Ha nyuma, banabuli giyambika ibyambalwa byeꞌkituku-tuku na byoꞌmugushe.
10 Kundu kwokwo, Nahano naaho, ye Rurema woꞌkuli.
Yehe, ye Rurema úli mugumaana, anali ye mwami weꞌmyaka neꞌmyakuula.
Ikyanya ali mu raakara, ikihugo kiri mu yami jugumbana.
Yubwo buraakari bwage, ibinyamahanga bitangabuyigenderera.
11 Yabo banamigisi, mugendi babwira kwokuno: «Iyo migisi, itali yo ikalema igulu neꞌkihugo. Si igamalaga lwoshi, itanaki boneke mu kihugo, kandi iri mwiꞌgulu.»
Ulwimbo lwoꞌkuhuuza Rurema
12 Nahano ye kabumba ikihugo ku bushobozi bwage.
Ye kanakisikamya ku bwitegeereze bwage.
Anakoleesa ubwenge bwage mu kuyanuula igulu.
13 Ikyanya ali mu kyula, amiiji mwiꞌgulu gali mu yami yigusha haguma,
Ali mu kuumania ibibungu hooshi mu kihugo.
Ku kyanya kyeꞌnvula, analyamuze ikiryamu.
Anahuuse neꞌmbuusi ukulyoka mu bihinda byage.
14 Si abandu boohe, biri bizeeze, ndaanabyo bayiji!
Abatuzi, bali mu yagagala ngana mu kutula imigisi!
Si iri ya bibeesha ngana!
Ndaabwo bugumaana ihiiti.
15 Ndaako kamaro ko ihiiti. Si iri ya kuhonyoleza naaho.
Ikyanya Nahano agagihana, igaahera lwoshi!
16 Mukuba iyo migisi, Rurema wa Yakobo yehe atali nga yo.
Si ye kalema ibindu byoshi,
anatoola Abahisiraheeri kwo babe bo bandu baage.
Iziina lyage, ye Nahano woꞌbushobozi bwoshi!
Abahisiraheeri bagatwalwa mu buja
17 Keera abagoma bamùsokanana.
Ku yukwo, mugirage muteekere ibindu biinyu, gira mulyoke hano.
18 Nahano adetaga kwokuno:
«Leero abatuulaga ba mu kino kihugo, ngabashuluguta i mahanga.
Ngolaga ngabalibuza bweneene, halinde banahambiri gwatwa imbira.»
19 Abandu i Yerusaleemu, ti:
«Ala nie! Ngoli komeresiri bweneene! Neꞌkihando kijajagusiri ngana-ngana!
Ndaakwo kundi! Yago malibu, ngwiriiri ngagooyere naaho.
20 Iheema lyani, abagoma keera balishikula.
Neꞌmigozi yalyo, yoshi keera yaduuduka.
Bagala baani, keera banjanda ngana, banayigendera.
Yiryo iheema, ndaakiye woꞌkulinjingira, mbu njubi yingira mwo.»
21 Nie Yeremiya, nanadetaga kwokuno:
«Abangere baꞌbandu baani, batakiri mu hanuusa Nahano.
Si balyagagi bahwija ngana.
Kwokwo, batakiri mu genduukirwa.
Neꞌbibuzi byabo, byoshi keera bikashaabuka.
22 Yuvwagwi! Umwazi gwayija!
Abasirikaani ukulyoka imbembe, bayiji teera utwaya tweꞌBuyuda.
Yutwo twaya, bagatusiga ishamba limaata, linabe igomberano lyeꞌmirunga!»
23 E Nahano, umundu, nyiji kweꞌkyanya ali mu ba ho, kutali hiꞌgulu lyage yenyene.
Ndaaye úwangahasha ukuyishungikira ngiisi kwo agaaba.
24 Aahago! Ikyanya ugambana, kutabe ku buraakari bwawe.
Neꞌkyanya uganyerekeza, kube mu kati koꞌkuli.
Buzira kwokwo, wangakengeera wanzimiiza.
25 Yubwo buraakari bwawe, ubuyonere ku bandi bandu ábatakuyiji.
Si boohe, batali mu kuyikumba.
Twe Bahisiraheeri, twe balya bandu bakaminika,
banatusivya lwoshi, banasigaga kihugo kiitu mushaka.