14
Rurema ahangika invula
1 Ku kyanya invula ikahangama,
Nahano anabwiraga Yeremiya kwokuno:
2 «Utwaya tweꞌBuyuda tukola mu fwifwitira, banakola mu gandaara.
Balya bandu booshi, bakoli shengusiri.
Ee! Abandu beꞌYerusaleemu bagweti bagabululuka,
halinde amalira gaabo ganambikira mwiꞌgulu.
3 Ikyanya abakulu bali mu tuma abakozi baabo, kwo bagendi vwoma amiiji,
bali mu gwana ibirigo bikamiri ngenene.
Kinatume bagagalukana ibirugu bimaata, bakoli yinamiri.
Ee! Ishoni zinabagwate, banagire mbu bayibishe amalanga.
4 Bwo bakoli jondamiri, bakola mu bisha amalanga gaabo.
Mukuba invula keera ikahangama, niꞌdaho likoli hangaliiri.
5 Kiri neꞌkishuka, ndaakikyo.
Ikyanya akasa kali mu buta, kali mu yami siga kajanda umwana mwiꞌshamba.
6 Na kwakundi, bapunda ba mu kishuka, bakolaga mu yimanga ku marango,
iri banakizi luhuukiza nga mirunga.
Na bwo babula ubwasi, bakoli humiri amasu.»
7 Abandu bakola mu yigaya, ti:
«E Nahano, íbitumiri twagooka kwokuno, biri hiꞌgulu lyeꞌbyaha biitu.
Mukuba, tukoli kuhubiiri, naꞌmahube giitu galuguusiri imbere lyawe.
Kundu kwokwo, ugirage ututabaale we kongwa, halinde iziina lyawe likizi lumbuuka!
8 E Nahano! Abahisiraheeri baki kubiisiri kwoꞌmulangaaliro.
Ikyanya bâli riiri mu makuba, wanakizi bakiza.
Aahago! Kutagi kandi ukola mu yigira nga kinyamahanga, íkigweti kigalenga naaho,
na nga mugeezi úwabashumbika mwo ku bushigi buguma naaho?
9 Si ubonesiri ngoꞌmundu úwakanguka ikiteero,
na nga ndwani ítaki hiiti imisi yoꞌkuguluula abandu!
E maashi Nahano! Si uki tuuziri mu kati kiitu, tunayijikiini kwo tuli bandu baawe!
We kongwa we! Buno, utatujandirire.»
10 Nahano adetaga kwokuno hiꞌgulu lyaꞌbandu baage, Abayuda:
«Si mukuuziri ukugenda mugahabuka-habuka,
mutanali mu yihangirira!
Ngi kengiiri ngiisi kwo mukoli bihuusiri.
Na buno, ndagaki mùyakiira kwo muli bandu baani.
Si ngola ngamùhana ngana.»
11 Nahano anashubi mbwiraga kwokuno: «E Yeremiya, utakolwe kwo wahuunira Abayuda mbu bagenduukirwe. 12 Na kundu boonyene bangayishalisa, ndagaki yuvwa amahuuno gaabo. Kundu bangandangira amatuulo goꞌkusiriiza, kiri naꞌgandi matuulo, ndagaki gayakiira. Si ngabaminika ku ngooti, na kwiꞌshali, na ku kiija.»
13 Naani, ti: «E Nahano Rurema, yabo bandu, abaleevi si bali mu babwira mbu: “Ndaakyo kiteero íkigaaba ho. Kiri niꞌshali, ndaalyo. Ngiisi byo Nahano agamùheereza, guli mutuula naaho-naaho.”»
14 Nahano anashubi mbwira: «Balya baleevi, si bagweti bagaadeta ibinyoma kwiꞌziina lyani. Ndali nie kabatuma, ndanali nie kabahanguula kwo badete. Ndaago nꞌgababwira. Si bagweti bagatanga ubuleevi bweꞌbibeesha. Ubuleevi bwo bali mu tanga, bulyagagi buhwija naaho. Bali mu yihalangira bongwa, ndaanako kamaro buhiiti.
15 «Ku yukwo, nakyula kwokuno: Balya baleevi, kundu bangadetaga kwo bali mu tanga ubuleevi kwiꞌziina lyani, haliko ndali nie kabatuma. Bali mu bwira abandu kwo ndaaye mugoma úgayiji teera kino kihugo. Banadesiragi na kwiꞌshali, ndaalyo! Yabo baleevi boonyene, bagaafwa niꞌshali, na ku ngooti.
16 «Kiri naꞌbashosi ábali mu yuvwa ubuleevi bwabo, nabo bagaafwa nyene, ku kiteero, na niꞌshali. Yabo bashosi, ibirunda byabo bigakabulirwa mu njira zeꞌYerusaleemu, kiri neꞌbirunda bya bakaabo, neꞌbyaꞌbaana baabo boꞌbutabana na boꞌbunyere. Galya mahube gaabo, ngabahana hiꞌgulu lyago.
17 E Yeremiya, ugendi bwira Abayuda kwokuno:
“Ku kasiisa, muli bandu baani, ninamùkuuziri.
Kundu kwokwo, keera mukanyanyagwa haashi, munakola bu fwa.
Ala nie! Ngakizi mùlirira ubwakya-ubwayira. Ee! Imigenge yani, itagakama.
18 Ikyanya ndi mu genda mu mbingiro,
ndi mu gwana mweꞌbirunda bya ábakayitwa neꞌngooti.
Neꞌkyanya ndi mu yingira mu kaaya kahamu
na ngwane mwaꞌbandi, bakola mu fwa niꞌshali.
Kiri naꞌbaleevi naꞌbagingi, keera bakatwalwa hala mu mahanga go batayiji.”»
19 Yeremiya anashubi deta: «E Nahano, yabo Bayuda, ka wayami bajanda lwoshi-lwoshi?
Ewe! Ka ukoli shombiri abatuulaga beꞌSayuni?
Kituma kiki ukayami tubeza inguma, halinde tutanakire?
Kundu twâli langaaliri kwo tugaramba mu butoge, si ndaabwo twalonga.
Twâli langaliiri kwo tugaakira, kiziga lyo twamu lengaga mweꞌkinyukura.
20 E maashi Nahano! Twayemeera kwo tukoli bihuusiri.
Kiri na bashokuluza biitu, nabo bâli kizi yifunda mu bitalaalwe.
Ndaakwo kundi! Tweshi tukoli kuhubiiri bweneene.
21 Kundu kwokwo, utakolwe mbu utujandage. Tutaloziizi kwiꞌziina lyawe lidukwe.
Si we gweti úgagingikwa ku kitumbi kyawe kyeꞌkyami!
Kwokwo kirya kitumbi, utaki kijamburiise, kinali noꞌbulangashane.
Kirya kihango kyo tukanywana, ukikengeerage maashi,
utanaki shubi kihongola.
22 Irya migisi yaꞌgandi mahanga, si itashobwiri ukuniesa invula!
Ikyanyaanya kyonyene, kitangaginiesa.
Si we Rurema Nahamwitu, we gweti úgakizi giniesa!
Kwokwo, we tugweti tugabiika kwoꞌmulangaaliro.»