15
Abandu batakira Rurema
1 Ha nyuma, Nahano anambwira: «Yabo Bayuda, ndangaki bakejeerera, kundu Musa na Samweri bangayijiri, banabahuunire imwani. Aahago! Bayami na njaaga mu masu! Ubabwire kwo bagendage.
2 «Mango bakubuuza, ti: “Tugendage hayi?” unabashuvye kwo Nahano adetaga kwokuno:
“Ngiisi ábashungikiirwi ukufwa, bagaafwa nyene.
Na ábashungikiirwi kwo bayitwe neꞌngooti, zo ziganabayitaga.
Na ábashungikiirwi kwo bayitwe niꞌshali, lyo liganabayita.
Na ábashungikiirwi kwo batwalwe imbohe, baganagenda yo.”
3 «Ngabalungikira abashereeza bana, bo baaba: ingooti, zikizi bayita. Noꞌtubwa, tubakululire ha butambi. Na banyunda, babajojomole. Neꞌnyamiishwa, zijanganule ibirunda byabo.» Kwokwo kwo Nahano adesiri.
4 «Yabo Bayuda, abandu baꞌmahanga gooshi bagahuumirwa hiꞌgulu lyabo, bwo mwami Manaasi âli kizi gira ibitalaalwe mu kaaya keꞌYerusaleemu. (Uyo Manaasi âli riiri mugala mwami Hezekiya weꞌBuyuda.)»
5 Nahano anashubi detaga kwokuno: «E batuulaga beꞌYerusaleemu, nyandi úgaki mùhahalira?
Na nyandi úgamùtaaniza, mu kuyiji buuza imyazi yinyu?
6 Si keera mukanjanda, mwanambindulira ingoto!
Buno, ngoli luhiri noꞌkukizi mùyigenderera. Na ngolaga ngamùhana. Kwokwo kwo Nahano adesiri.
7 Abandu baani, ngola mu bayeluula, iri na mbashabulira hala naꞌmarembo gaabo.
Kundu balyagagi bandu baani, haliko batazi janda ibyaha byabo.
Kwokwo, ngabashereeza, na ndyose abaana baabo.
8 Bwaꞌbashosi bakola bagayitwa,
banamufwiri bagaluguuka ukuhima umushenyu kwiꞌbuga.
Ngayitiisa kiri neꞌmisore ku kyanya bakiri bikalage.
Kwokwo, banyina bagashenguka, iri banabululuka.
9 Umukazi, kundu angaba abusiri abaana balinda, si booshi bagaahera.
Kwokwo, umukuume gunamúyite.
Yehe, agayirirwa hiꞌgulu lyoꞌmwizingeerwe, niꞌzuuba liki yasiri.
Anabe akoli tetiirwi, iri anateziibwi ishoni.
Mu kati kiinyu, ngiisi ábagaaba bakiri ho,
nabo ngabatanga mu bagoma, banabayite ku ngooti.»
Kwokwo, kwo Nahano adesiri.
Yeremiya atakira Rurema
10 Haaho, nie Yeremiya nanadeta: «Ala nie! E maawe, kituma kiki ukambuta? Si abandu booshi bagweti bagandongooza! Si bali mu nduka, ndaanagwo mwenda gwoꞌmundu mbiiti. Na naani kwakundi, ndaaye mundu yeshi úgumbiiti.»
11 Nahano ananjuvya: «E Yeremiya, ngakizi kuhahalira. Kiri neꞌkyanya kyaꞌmakuba na gobwe-gobwe, abagoma baawe bagakizi yiji kutabaaza.
12 «Aahago! Ikyuma kandi iri umulinga, iri byangaba bishaaziri imbande zeꞌmbembe, ndaaye mundu úwangabivuna-vuna. 13 Kundu kwokwo, ubugale bwinyu bwoshi, ngabuheereza abandi bandu, ku busha. Si mukola mu yifunda mu byaha hooshi mu kihugo! 14 Uburaakari bwo mbiiti hiꞌgulu liinyu, buyasiri bweneene, nga mbigi zoꞌmuliro. Kwokwo, mugagendi ba baja, munakizi kolera abagoma biinyu i mahanga, mu kihugo kyo mutayiji.»
15 Nanashuvya: «E maashi Nahano, unyiji bwija.
Unayijagi ngiisi kwo ngweti ngateezibwa ishoni hiꞌgulu lyawe.
Aaho! Ungengeerage, unakizi mbahala.
Balya bagoma baani, ubahaniirize.
Si iri wangabayigenderera, hali ikyanya bangakengeera banyita.
16 Ikyanya ukambwira amagambo, nanagayuvwiriza bwija.
Na buno, gakiri mu njambaaza.
E maashi, Nahano Rurema woꞌbushobozi bwoshi! Si ndi mu buuzibwa kwiꞌziina lyawe.
17 Ikyanya abandu bâli kizi yifunda mu bitalaalwe, ndâli kizi bayibiika kwo.
Si nâli kizi bwatala nienyene, iri na mbona buligo hiꞌgulu lyeꞌbyaha byabo.
18 Aahago! Kituma kiki ngi yamiri ndi mu libuuka?
Na kituma kiki inguma zaani zikalahiraga ukukira?
Si ubutabaazi bwawe, buli naaho nga shyoko yaꞌmiiji íkoli kamiri!»
19 Nahano naye, ti: «Iri wangangalukira,
lyo ngashubi kugalulira mu mukolwa gwawe.
Neꞌri wangaleka amadambwi-dambwi, unakizi deta íbitungiini,
lyo ugagaluka, unashubi ba muleevi wani.
Kwokwo, lyaꞌBayuda bagakugalukira,
si utali we gakizi bagwana.
20 Yabo bandu, kundu bagakizi yiji kuteera, mbu bakulwise, si batagakuhima.
Mukuba, ngakizi kusikamya, nga luzitiro úlukayubakwa neꞌmiringa.
Ee! Tugayamanwa, na ngizi kukiza.
Kwokwo, kwo nie Nahano ndesiri.
21 Balya banangora-mabi, kundu balyagagi balangi bweneene,
haliko ngakizi kukiza mu maboko gaabo.»