22
Ubuleevi imwa mwami weꞌBuyuda
Nahano anashubi mbwira kwo ngendi bwira mwami weꞌBuyuda kwokuno: «Ewe! We twaziri ku kitumbi kya mwami Dahudi. Gano magambo ga Nahano, we galoziri kuguma naꞌbatwali baawe, kiri naꞌbagunda ábali mu yingira mu mwawe.
«Nahano adetaga kwokuno: “Mukizi gira íbikwaniini, mu kati koꞌkuli. Umundu, iri angaba anyagwa ibindu byage, mumúlyose mu maboko gaꞌbanyazi. Mutanakizi vindagaza ibinyamahanga, kandi iri ifuuvi, kandi iri banamufwiri, mutanakizi balyalyania. Mutanakolwe mbu mukizi yita abandu bazira buhube.
«“Gano magambo gaani, iri mwangakizi gasimbaha, abaami ábagakizi yima ku kitumbi kya mwami Dahudi, bagakizi lenga kwiꞌrembo lyaꞌkaaya, bashoniri ku fwarasi, na mu magaare, bali kuguma naꞌbatwali baabo, kiri naꞌbagunda.
«“Halikago, nie Nahano nadeta kwokuno: iri mutangakizi ndwaza, nabiika indahiro kwiꞌziina lyani, kweꞌno nyumba yinyu yoꞌmulimbo, ngagihindula bibe biguuka.”
«Na ku biloziri akajumiro kaꞌBayuda, Nahano adetaga kwokuno:
“Ino nyumba ibuyahiri bweneene ukuhima ikihugo kyeꞌGiryadi,
kiri noꞌlubako lweꞌmigazi yeꞌLebanooni.
Kundu kwokwo, ngagihindula libe ishamba,
ndaanaye úgashubi gituula mwo.
Keera nalingikania abandu, kwo bagendi gishereeza.
Ngiisi muguma wabo anakoli hagasiri ibilwaniiso byage.
Iyo nyumba, kundu inguliro zaayo zikalimbiisibwa neꞌbiti byeꞌmyerezi, bagazishaaza,
banazilashe mu muliro.”
«Abandu bingi beꞌmahanga, ikyanya bagakizi lengaga ha butambi lya kano kaaya, bagakizi buuzania, ti: “E balya! Kano kaaya kiija, kituma kiki Nahano akakahaniiriza mwene yuku?” Abandi, ti: “Íbitumiri Rurema Nahamwabo akakahana kwokwo, mbu abatuulaga baamwo bakahongola ikihango kyo bâli mali nywana bo naye. Banakizi gendi yikumba imizimu, iri banagikolera.”»
Ubuleevi hiꞌgulu lya Salumu
10 E Bayuda! Mwami Yosiya keera akafwa. Aaho! Mutaki múlirire mutanakizi múgandaara.
Ho mwangamúlirira, munalirire ulya mwami úkola mu twalwa i mahanga zeene.
Mukuba yehe, atâye ki shubi galukira mu kihugo kyabo, mbu akibone.
11 Mukuba Salumu, mugala mwami Yosiya, ye kayima ahandu ha yishe, abe mwami waꞌBayuda. Yoyo, keera bakamútwalaga imbohe. Nahano adeta kwokuno hiꞌgulu lyage: «Kino kihugo, atâye ki kifine mwo. 12 Si imunda agatwalwa imbohe, yo na munda agagendi fwira, atanâye ki bone kino kihugo kandi.»
Ubuleevi hiꞌgulu lya Yoyakimu
13 Nahano anadetaga kwokuno: «E mwami Yoyakimu, yayewe imwawe!
Si ugweti ugayiyubakira inyumba nyiija ku njira yoꞌkugungana!
Ugweti uganayubaka inyumba ízishoneriini kwo, mu kulyalyania abandi bandu.
Unali mu koleesania ku kimaama, buzira mbembo,
14 iri unayidesa, ti: “Ngayiyubakira nangungubanga weꞌnyumba,
inabe ihiiti izindi ízishoneriini kwo.
Nganagibiika kwoꞌtwazo tuhamu, na ngilimbiise neꞌbiti biija byeꞌmyerezi ku bibambaazi.
Ha nyuma, na ngibuge kwiꞌbara lidukula.”
15 Aahago! Yukwo kuyiyubakira inyumba neꞌbiti byeꞌmyerezi,
ka kwo kuyerekiini kwo uli mukulu mu bandi baami?
Si yisho Yosiya âli kizi lya, iri ananywa íbiri tiita, anâli kizi gira íbikwaniini!
Kyo kitumiri âli kizi genduukirwa.
16 Abakeni na ábatashobwiri, âli kizi batabaala.
Kyanatuma agakizi genduukirwa.
Umundu, iri angagira amiija mwene yukwo, iri anyiji.»
Kwokwo, kwo Nahano adesiri.
17 «Halikago wehe, ugweti ugayihahalira wenyene, mu kukizi gungana.
Unali mu yita abandu bazira buhube, mbu lyo ugala.
Si ubutwali bwawe, buli bwa kukandamirana naaho ku kahaati!»
18 Nahano anashubi detaga kwokuno hiꞌgulu lyoꞌlya Yoyakimu, mugala Yosiya weꞌBuyuda:
«Uyo mwami, ku kyanya agaafwa, ndaaye úgamúlirira, ti:
“Yayewe, e mwene witu! Yayewe, e mwali wani!”
Bataganamúlirira, ti: “Yayewe, e nahamwitu, we munalushaagwa! Si ulwawe keera lwahikaga!”
19 Si abandu bagamúziika nga punda.
Ikirunda kyage, bagakibulula haashi mu njira,
banagendi kikabulira inyuma lyeꞌYerusaleemu.»
Ubuleevi hiꞌgulu lyaꞌkaaya keꞌYerusaleemu
20 «E beene Yuda, muzamuukire ku migazi yeꞌLebanooni, iri munaliruuka.
Muyidehereze ku nduulu, halinde ihike i Bashaani.
Munagendi berangira uluhande lweꞌmigazi yeꞌHabariimu.
Si abiira biinyu booshi, keera bakaminikwa!
21 Ku kyanya mwâli ki riiri mu butoge, nâli mali gwanwa namùkengula,
haliko mwananjuvya: “Utatusuuze, maashi!”
Kwokwo, kwo mwâli kizi deta, ukulyokera ubwanuke bwinyu.
Ngiisi byo ngweti ngaadeta, mutabisimbahiri.
22 Abimangizi biinyu booshi, imbuusi igabahuusa kwo, inabashaaze.
Kiri naꞌbiira biinyu, bagatwalwa imbohe.
Galya mabi gooshi go mwâli kizi kola, gagamùteeza ishoni.
23 E mwami, inyumba yawe iri nyiija, bwo ikayubakwa neꞌmyerezi yeꞌLebanooni.
Buno, uki jeberiiri ngana-ngana.
Kundu kwokwo, ugakizi himbukira,
iri unabululuka ku mwizingeerwe, ngoꞌmukazi úkola úgaabuta.»
Ubuleevi hiꞌgulu lya mwami Koniya
24 Nahano adetaga kwokuno: «E Koniya, mugala mwami Yoyakimu weꞌBuyuda! Ngola ngakujanda! Nga kwo nyamiri ho, nahiga kwo kundu wangabiiri naꞌkamaro imwani nga mbete yaꞌkamangu ku kuboko kwani kweꞌlulyo, haliko, nangaki kuyihogola. 25 Nganakutanga mu maboko ga mwami Nebukandeneza weꞌBabeeri, kuguma naꞌbasirikaani baage. Mukuba, bo baloziizi ukukuyita, unabayobohiri. 26 Ngakuyimula hano, kuguma na nyoko, munagendi beera i mahanga, inabe yo munda mugafwira. 27 Na kundu mugakizi looza ukugalukira imwinyu, si mutâye galuke!»
28 Nanadeta: «Uyo mwami Koniya ali nga kirugu íkikabereka naaho, kyanakabulirwa!
Ndaanaye úki múloziizi.
Aaho! Uyo mwami, kituma kiki bakamúyimula,
mbu agende mu kihugo kyo atayiji, kuguma neꞌmbaga yage?
29 E kihugo kyeꞌBuyuda! E kihugo kyeꞌBuyuda! E kihugo kyeꞌBuyuda!
Uyuvwirize ngiisi kwo Nahano agweti agakubwira:
30 “Uyo Koniya, muyandike hiꞌgulu lyage kwo atahiiti ibuta, ataganagenduukirwa.
Mukuba mu kihugo kyeꞌBuyuda, ndaaye wa mwiꞌkondo lyage úwâye yime mwo,
mbu atwale ku kitumbi kya Dahudi.”»