23
Abahisiraheeri, Nahano âye shubi bakuumania
1 Nahano adetaga kwokuno: «Yayewe imweꞌbirongoozi byaꞌbandu baani! Kundu balyagagi bangere baabo, haliko, bagweti bagabashereeza, iri banabashaabula.»
2 Nahano Rurema waꞌBahisiraheeri ashubi detaga kwokuno: «E bimangizi, yabo bandu baani, mukaleka ukukizi balanga. Si mukabajajaaka, halinde banashaabuka. Bwo mwagiraga ibala mwene yiryo, ngamùhaniiriza.»
3-4 Nahano ashubi detaga kwokuno: «Yabo bandu baani, kundu nꞌgabayimula mbu bagendi tuula i mahanga, haliko ngiisi ábaki sigiiri yo, nienyene ngaki bakuumania, na njubi bagalulira mu kihugo kyabo. Kwokwo, banashubi kizi buta, halinde banayushuuke. Ha nyuma, mu bandu baani, na ndoole mweꞌbindi birongoozi. Byohe, bigakizi bahahala. Batagaki yoboha, kandi iri kuhuumirwa. Ndaanaye úgaki teereka.
5 «Mu siku ízigayija, mu kibusi kya Dahudi, ngameza mweꞌshibwe liija. Uyo, ye gayima, anabe mwami mwija, anabe ali mwitegeereza. Yeki, agatwala ikihugo ku njira íkwaniini, na mu kati koꞌkuli. Kwokwo kwo nie Nahano nadeta. 6 Mu butwali bwage, lyeꞌkihugo kyeꞌBuyuda kigakizibwa, halinde umunyerere gunatoole mwo. Uyo mwami agakizi buuzibwa Nahano ye Lukiza Witu.
7-8 «Mu yizo siku, ikyanya abandu bagakizi biika indahiro, batagakizi ki deta, mbu: “Nga kwo Nahano ayamiri ho, ulya úkalyosa Abahisiraheeri i Miisiri.” Si bagakizi deta: “Nga kwo Nahano ayamiri ho, ulya úkalyosa Abahisiraheeri mu bihugo byeꞌmbembe, na mu ngiisi gandi mahanga go bâli shabukiiri mwo.” Haaho, lyaꞌBahisiraheeri bagayiji tuula mu kihugo kyabo.» Kwokwo, kwo Nahano adesiri.
Imyazi yaꞌbaleevi beꞌkinyoma
9 Gano magambo, galyagagi hiꞌgulu lyaꞌbaleevi beꞌkinyoma.
Umutima gwani gushengusiri, na ngola mu lenga mwoꞌmusisi.
Ngolaga nga mulalwe, úkoli lalusiri.
Mukuba yabo baleevi beꞌkinyoma, Nahano keera akabakanukira ku njira yaꞌmagambo gaage meeru.
10 Kino kihugo kyeꞌBuyuda, si abandu baki gweti bagashulehana mwo!
Banakoli bihuusiri, iri banakoleesa ubushobozi bwabo ku njira ítali nga yo.
Kyo kitumiri Nahano akoli kidaasiri.
Ikihugo kikoli ginunusiri bweneene, neꞌndagiriro zikoli yumagusiri.
11 Nahano adetaga kwokuno: «Balya baleevi, kuguma naꞌbagingi, booshi batandwaziizi.
Si bagweti bagayifunda mu mabi hooshi kiri na mu nyumba yani.
12 Ku yukwo, bagakizi mamaata mu kihulu.
Na ho bagakizi lenga, bagakizi gwana ho gobwe-gobwe naaho.
Kwokwo, bagagendi siitara, banagwe.
Ikyanya ngabahaniiriza, ngabaleetera ibala.»
Kwokwo, kwo Nahano adesiri.
13 «Abaleevi ba mu kihugo kyeꞌSamariya, nꞌgabona kwo bakoli bihuusiri bweneene.
Ikyanya bâli kizi tanga ubuleevi,
bâli kizi butanga kwiꞌziina lyoꞌmuzimu Baali.
Banahubiisa abandu baani, halinde nabo banakizi yifunda mu byaha.
14 Kundu kwokwo, abaleevi beꞌYerusaleemu, yo haahe!
Boohe, bagweti bagakizi shuleha, iri banadeta ikinyoma.
Na kwakundi, bali mu shimya banangora-mabi, kwo nabo bakizi kiyifunda mwo.
Ndaanaye úli mu kitwikira kwo.
Yabo booshi, bakolaga nga bandu beꞌSoodoma, naꞌbeꞌGomora.»
15 Yabo baleevi beꞌYerusaleemu, Nahano woꞌbushobozi bwoshi, adetaga kwokuno hiꞌgulu lyabo:
«Yabo baleevi, bo batumiri abandu baani bakoli himbusiri mu kino kihugo kyoshi.
Kwokwo, ngabaliisa ibyokulya bilulu, na mbanywese umubamba.»
16 Nahano woꞌbushobozi bwoshi ashubi detaga kwokuno: «Yabo baleevi beꞌbibeesha, mutakizi batwaza. Si bagweti bagaagira mbu bamùtebe! Aahabi! Amabone gaabo, bali mu gayihalangira boonyene, batanali mu galyosa imwani.
17 «Balya bandu banjombiri, banali mindagabika. Bali mu kizi gira nga ngiisi kwo baloziizi. Kundu kwokwo, bali mu hendana, ti: “Nahano adesiri kwo mugakizi longa umutuula! Ndaakyo kiteero mwâye longe!”
18 Aaho! Mu yabo baleevi, si ndaaye úkayimanga mu naama yani,
mbu anyuvwe ngiisi byo ndesiri!
Ndaanaye úli mu twaza amagambo gaani, mbu asobanukirwe.»
19 Lolagi! Nahano agaaba nga kihuhuuta kikayu, mu kuyiji mùhana.
Uburaakari bwage, bugamùteera nga mbuusi yaꞌkasuululu,
inayihwike ku matwe ga banangora-mabi.
20 Bulya buraakari bwa Nahano, butagahooha,
átazi gira nga ngiisi kwo akoli shungisiri.
Yibyo byoshi, mu siku ízigayija, lyo mwâye bisobanukirwe bwija.
21 Nahano anashubi detaga kwokuno: «Yabo baleevi, ndali nie kabatuma, ndaanabyo nꞌgababwira.
Kundu kwokwo, bakiri mu tibita-tibita,
iri banatanga ubuleevi bwoꞌkuyihalangira boonyene.
22 Bwangabiiri bwija, nga bangayimaziri imbere lyani, bananyuvwe.
Kwoki lyo bangabwiziri abandu baani ngiisi kwo nienyene ndoziizi.
Bangabalyosiizi mu njira zaabo mbi, halinde banatwikire ku mikolezi mibi.»
23 Nahano anashubi detaga kwokuno:
«Ka ndi Rurema wa hano hoofi naaho? Si nduuziri naꞌhandi kwakundi!
24 Kwokwo, kundu umundu angagendi yibisha hala, ngaaba ngi múbwini. Kwokwo kwo nie Nahano ndesiri.
Mukuba, nyijwiri hooshi mwiꞌgulu, kiri na hano mu kihugo.»
Kwokwo, kwo Nahano adesiri.
25 «Yabo baleevi, keera nayiyuvwirwa kwo bali mu deta kwokuno: “Yuvwagwi, nimùbwire ibirooto byo nalonga imwa Rurema bigingo bushigi!” Kundu bagweti bagaadeta mbu kuli kwiꞌziina lyani, si biri bya kinyoma! 26 Aahabi! Ibibeesha mwene yibyo, bagagenderera ukubideta halinde mangoki? Si ubuleevi bwabo, bulyagagi bwa kuyihalangira naaho! 27 Bali mu koleesa ibibeesha, mu kulooza kwaꞌbandu baani banyibagire, nga kwo bashokuluza baabo bakanyibagira, banakizi gendi yikumba umuzimu Baali.»
28 Nahano adetaga kwokuno: «Ka ndaalwo lubibi ha kati keꞌbyula neꞌngano?
Si luli ho! Aahago! Bwo baloziizi ukuyihalangira ibirooto byabo,
leka abaleevi baani boꞌkuli, nabo bamenyeese abandu amagambo gaani, nga ngiisi kwo gali.»
29 Nahano adetaga kwokuno: «Igambo lyani, ka litalyagagi nga muliro?
Ka litanali nga nyundo ígweti igajajagula inyaala?
30 «Yabo baleevi, ngabahaga. Si bagweti bagazimbana amagambo mbu bwo galyosiri imwani.» Kwokwo, kwo Nahano adesiri.
31 Nahano ashubi detaga kwokuno: «Yabo baleevi beꞌbibeesha, bali mu yihalangira amagambo boonyene, mbu: “Kwokwo, kwo Nahano adesiri”. Ku yukwo, ngabahana. 32 Ee! Ngabahana ngana-ngana, bwo bagweti bagatanga ubuleevi bweꞌbibeesha. Neꞌkyanya bali mu buyigiriza, bali mu habura abandu baani. Ndanali nie kabatuma, mbu babudete. Ku yukwo, ndaabwo butabaazi bwo bangatanga imwaꞌBayuda.» Kwokwo, kwo Nahano adesiri.
33 Nahano anambwiraga, ti: «Ngeeka mu bandu, kandi iri mu baleevi, kandi iri mu bagingi, hali úwangakubuuza, ti: “E Yeremiya! Indumwa nyiki yo Nahano akutumaga leero, ibe nga muteekerwa gwo ugatubetuza?” Haaho, ubashuvye kwokuno: “Nahano adesiri kwokuno: Si mwehe mulyagagi muteekerwa muzito bweneene, munagweti muganduhya! Kwokwo, ngola ngamùnyanyaga haashi.”
34 «Yabo baleevi beꞌbibeesha, kandi iri bagingi, kandi iri gundi mundu yeshi, hali ikyanya bangakubwira, mbu: “Yaga magambo galyosiri imwa Nahano!” Nanga maashi! Balya bandu, umenye kwo ngabahaniiriza, kuguma neꞌmbaga zaabo zooshi.
35 «Mwehe, mukwiriiri mukizi buuzania, ti: “Aahago! Kuti kwo Nahano ashuvya? Na kuti kwo aloziizi ukudeta?” 36 Halikago, lirya igambo “Yaga magambo galyosiri imwa Nahano”, mutakolwe mbu mushubi lideta. Si ngiisi byo muli mu deta, galyagagi magambo go mwayihalangira mwenyene naaho. Muli mu hindula amagambo ga Rurema witu, úli mugumaana, ye Nahano woꞌbushobozi bwoshi.
37 «Yabo baleevi, mukizi babuuza kwokuno: “Kutagi kwo Nahano akushuvya? Kuti kwo adesiri?” 38 Si mugweti mugaadeta, ti: “Yaga magambo galyosiri imwa Nahano!” Ndanali nie nꞌgamùtuma, mbu mukizi gadeta. Mutakizi beesha, mbu: “Yaga magambo galyosiri imwa Nahano.”
39 «Kwokwo, kano kaaya keꞌYerusaleemu, kundu nꞌgakaheereza bashokuluza biinyu, haliko, ngola ngakalahira. Ngamùyimula imbere lyani. 40 Abandu bagakizi mùhonyoleza, iri banamùteeza ishoni. Yizo ishoni zigaaba zoꞌkuyama ho, zitaganayibagirwa halinde imyaka neꞌmyakuula!»