46
Indumwa hiꞌgulu lyeꞌMiisiri
1 Nahano anashubi bwira Yeremiya hiꞌgulu lyeꞌbinyamahanga.
2 Ku kyanya mwami Yoyakimu mugala Yosiya âli koli hisiizi imyaka ina atwaziri mu Buyuda, lyo mwami Nebukandeneza weꞌBabeeri akagenda i Karikemishi, hoofi noꞌlwiji Hefuraati, gira agendi teera Neko, mwami weꞌMiisiri, anamúhima. Ku yikyo kyanya, Nahano anadetaga hiꞌgulu lyaꞌBamiisiri kwokuno:
3 «Mulingikanie isiribo ziinyu, ziba niini kandi iri mbamu,
gira mugende mwiꞌzibo.
4 Mwe muli mu gendera ku fwarasi,
muziyaje kweꞌbyajo, munazishonere kwo.
Muyambalage ingofeera zeꞌbyuma, munayibiike ibiringiini.
Munatyaze naꞌmatumu giinyu, munayambale ibihazo biinyu byeꞌbyuma.
5 «Aahago! Biki byo mbwini? Si abasirikaani beꞌMiisiri bakoli humiirwi!
Keera bahimwa, banakolaga mu tibita.
Kiri neꞌbikalage byabo, bikola mu puumuka,
buzira kukebaanuka.
Iri bali mu gira mbu balangiize ngiisi luhande, banateerwe neꞌkyoba.
6 Kundu bangatibita mulindi, banabe bali bikalage byeꞌndwani,
haliko batagafuushuka.
Bali mu bambaajira, banayami gwa haashi iyo munda imbembe, ha lwiji Hefuraati.
7 «Banyandi baliira ábali mu heema ngoꞌlwiji Niire?
Si bagweti bagasavya hooshi mu kihugo!
8 Abasirikaani beꞌMiisiri, bakoli kwiziri hooshi mu kihugo, banagweti bagayihaya mbu:
“Ngakwira mu kihugo kyoshi nga mwijulire gwaꞌmiiji.
Ngayami shereeza utwaya twoshi, kiri na ábatutuuziri mwo.
9 Aahago! Mwe muli mu gendera ku fwarasi, na mu magaare giꞌzibo!
Mugendi teera abagoma.
Si mwe ndwani zeꞌMiisiri!
Na niinyu mwe biira baabo ukulyoka i Hendyopiya neꞌPuuti!
Ngahwe! Si mulyagagi bikalage mu kukoleesa isiribo!
Kiri naꞌBaluudi, muli bikalage mu kufwora imiheto.”
10 Kundu kwokwo, luno lusiku lulyagagi lweꞌmwa Nahano Rurema woꞌbushobozi bwoshi!
Yabo booshi, mu siku ízigayija, agabayihoola.
Agahaniiriza abagoma baage, halinde anabaminike ku ngooti.
Abagoma baabo, bagabajiga, halinde abasirikaani bingi banayitwe.
Abandu ábatuuziri uluhande lweꞌmbembe, hoofi noꞌlwiji Hefuraati,
bagaaba ngiꞌtuulo íryatangwa imwa Nahano woꞌbushobozi bwoshi.
11 E Bamiisiri, kundu mwangazamuukira i Giryadi,
mbu mugendi leeta yoꞌmuti gwoꞌkulunga mweꞌnguma, ndaagwo úgwangamùkiza.
Mugasigala naaho balwazi.
12 Ibinyamahanga, keera bikayuvwa ngiisi kwo mukayagagala bweneene neꞌshoni!
Si indwani ziinyu, zikayipukulana kwo, zanayami yibumbulika haashi.»
13 Mwami Nebukandeneza weꞌBabeeri, ikyanya akashungika ukuteera Abamiisiri, Nahano anabwira Yeremiya kwokuno:
14 «Ugenderage balya Bamiisiri ábali i Migidoli,
na ábali i Mefiisi, na ábali i Tapaneshi, unababwire kwokuno:
“Ábamùsokaniini bakola mu mùteera!
Aahago! Muyibiike ibiringiini, gira mugendi lwa.”
15 E Bamiisiri, kituma kiki ibikalage biinyu biri mu yibumbulika haashi?
Íbitumiri bali mu gwa haashi, bwo nie gweti ngabahirika.
16 Bali mu kizi hirimana kwo, boonyene ku boonyene.
Banashubi bwirana: “Muvyuke, maashi! Tugalukire imwitu, mu beene witu.
Yabo bagoma, tubaleke, gira batakengeere batuyita.”
17 Bagayinika mwami weꞌMiisiri yiri iziina: Ihongo lya busha!
Mukuba keera akateera ubulyo bwoꞌkugenduukirwa!
18 «Nie Nahano woꞌbushobozi bwoshi, nie na Mwami, nabiika indahiro:
Nga kwo nyamiri ho, umugoma akola agayiji mùteera.
Alyagagi mula ngoꞌmugazi Taboori,
anali nga kwoꞌmugazi Karimeeri guli ku nyaaja.
19 «E Bamiisiri, mumenye kwo mukola mugatwalwa imbohe.
Kwokwo, mushwekage ibindu biinyu.
Akaaya keꞌMefiisi kakola kagashereezibwa.
Ikihugo kyabo kinasigale biguuka.
20 «Ikihugo kyeꞌMiisiri, kiryagagi nga nyana íshishiri.
Kundu kwokwo, ikibugu ukulyoka imbembe, kigayiji kiteera.
21 Abasirikaani beꞌMiisiri, bali ba kuhembwa naaho,
banakoli shishiri nga nyana.
Balya booshi, bagakebaanuka, banayami tibita.
Bakola bagahanirizibwa,
halinde banahanyagale lwoshi.
22 Abagoma bakola mu yegeera, bafumbiiti isheenyo ngaꞌbatemi beꞌbiti.
Lyeryo, Abamiisiri bagalooza ukunyombooka, nga mujoka.
23 Yabo bagoma baabo, bagaaba kandaharuurwa nga nzige.
Kundu Abamiisiri balyagagi bingi, si baganyanyagwa haashi nga lubako luhamu úlutangatulwa.»
Kwokwo, kwo Nahano adesiri.
24 «Balya Bamiisiri, ikyanya bagabiikwa mu maboko gaꞌbandu beꞌmbembe,
lyo bagateezibwa ishoni.»
25 Nahano woꞌbushobozi bwoshi, Rurema waꞌBahisiraheeri adetaga kwokuno: «Ngola ngaahana Hamooni, umugisi gwa mu kaaya keꞌTebeesi. Ngaahana Abamiisiri neꞌmigisi yabo, kiri naꞌbaami baabo. Na ngiisi ábagaaba bayibiisiri kuꞌyo mwami, nabo ngabahana. 26 Balya Bamiisiri, ngababiika mu maboko gaꞌbagoma baabo, mwami Nebukandeneza weꞌBabeeri, naꞌbasirikaani baage, gira bayitwe.
«Kundu kwokwo, mu siku ízigayija, Abamiisiri bagashubi tuula bwija mu kihugo kyabo, nga kwo bâli tuula.» Kwokwo, kwo Nahano adesiri.
Abahisiraheeri, Nahano agabaguluula
27 «E bakozi baani, mwe beene Hisiraheeri! Mutayobohage, mutanavunike indege.
Kundu mukatwalwa hala mu mbohe, kiri naꞌbaana biinyu,
haliko ngaki mùkiza, ninamùlyose yo.
Ikyanya mwâye galuke, lyo mugajeberera.
Ndaanaye úgashubi kizi mùkakaza.
28 E beene Yakobo! Si muli bakozi baani!
Tunayamiinwi. Aaho! Mutakizi yoboha!
Kundu nꞌgamùshaabula mu bihugo bingi-bingi,
haliko, ngaki bishereeza lwoshi-lwoshi.
Si mwehe, ndagamùminika lwoshi.
Ukumùhana, ngamùhana. Ndanganaleka ukumùhana.
Haliko, kugaaba naaho ku lugero úlumùkwiriiri.» Kwokwo, kwo Nahano adesiri.