47
Indumwa imwaꞌBafirisiti
1 Ikyanya mwami weꞌMiisiri atâli zaazi teera akaaya keꞌGaza, Nahano anabwira Yeremiya hiꞌgulu lyaꞌBafirisiti kwokuno:
2 «Abagoma bakola mu kuumana uluhande lweꞌmbembe.
Bali ngoꞌlwiji úlukoli heemiri.
Bagaaba ngoꞌlwiji úlugweti lugasavya ngana-ngana!
Bagalenga mu ngiisi kaaya, banakumbulule íbiri mu kihugo byoshi.
Abandu bagakizi yidehereza mu nduulu,
ikihugo kyoshi kinayijule ikimombo.
3 Ifwarasi zigakizi girigimba.
Naꞌmagaare giꞌzibo, ganalase amapine.
Ababusi bagaabula ubulyo bwoꞌkutabaala abaana baabo,
banayami tibita, buzira kushubi balola.
4 Ikyanya kyoꞌkuminika kwaꞌBafirisiti, keera kyahika.
Abandu beꞌTiiro naꞌbeꞌSidooni, kundu bali mu bashiga,
si nabo booshi bagaminikirwa kuguma.
Ee! Yabo Bafirisiti booshi, Nahano agabaminika ngana,
kiri na ábasigiiri mu kalira keꞌKereete.
5 Balya bandu beꞌGaza bagateezibwa ishoni,
banakizi begwa imishaku hiꞌgulu lyoꞌmwizingeerwe.
Kiri naꞌbeꞌHashikelooni, batagaki hulusa izu.
Mwe musigiiri mu ndekeera! Mugayama mujengiirwi halinde mangoki?
6 Mukola mu banda induulu, ti:
“E Nahano! Ingooti yawe igakizi tuteera halinde mangoki!
Ugirage ugigalulire mu kyubati kyawe, unatuuze, maashi!”
7 Iyo ngooti, kutagi kwo yangatuuza,
na Nahano aki gihangwiri kwo ikole?
Akiri mu gibwira kwo igendi teera akaaya keꞌHashikelooni,
naꞌbandi booshi ábatuuziri ku nyaaja.»