48
Nahano atumira Abamohabu indumwa
1 Ino ndumwa, iryagagi hiꞌgulu lyeꞌkihugo kyeꞌMohabu. Nahano woꞌbushobozi bwoshi, Rurema waꞌBahisiraheeri, agitangaga kwokuno:
«Ali yayewe, imwaꞌbandu baꞌkaaya keꞌNebo!
Si bagashereezibwa lwoshi-lwoshi!
Kiri naꞌbandu beꞌKiryatayimu, nabo akaaya kaabo kagagwatwa, banateezibwe ishoni.
Kiri neꞌnzitiro zaako, abagoma bagazihongola.
2 Yabo Bamohabu, abandu batagaki bahuuza.
Mukuba Abaheshibooni bakola mu bagirira igambi, ti:
“E balya! Tugire tugendi baminika,
gira batakizi ki yimbwa mu milala.”
E bandu ba mu kaaya keꞌMadimeni! Na niinyu, bagamùguujika ingooti mu migongo,
mutanâye ki shubi deta.
3 Yuvwagwi! Abahoronayimu bakola mu shereezibwa,
banakola mu bululuka ku kimombo,
iri banayamuluka.
4 Yabo Bamohabu, bakola bagaminikwa.
Amalira gaabo gagayuvwikana halinde mu kaaya keꞌSowari.
5 Balya Bamohabu, akaaya kaabo keera kayihongoleka haashi.
Kyanatuma bagazamuukira i Luhiti, mu njira yoꞌkugenda i Horonayimu,
iri banabululuka ku kimombo.
6 E balya! Mutibitage, gira muyikize.
Mugendi yibisha mwiꞌshamba.
7 E Bamohabu, si mwâli kizi biika umulangaaliro ku bugale bwinyu,
na ku bukalage bwinyu!
Buno, abagoma bakola bagamùgwata imbira,
banamùtwale imbohe, kuguma noꞌmugisi gwinyu Kemooshi,
kiri naꞌbagingi baagwo, naꞌbakozi baagwo.
8 Utwaya twinyu twoshi tugaminikwa, ndaanako ákagafuuka.
Indekeera zigashereezibwa, kiri noꞌtugangazi kwakundi.»
Kwokwo, kwo Nahano adesiri!
9 Ku kasiisa, yikyo kihugo kyeꞌMohabu, kigashereezibwa ngana-ngana!
Ku yukwo, munakihumbire ishinda, kinasigale ishamba limaata,
ndaanaye mundu úgaki kituula mwo.
10 Umundu, iri atangakoleesa ingooti yage mu kuminika Abamohabu, akwaniini adaakwe!
Ee! Byo Nahano adesiri, ngiisi úgabiyolohera akwiriiri adaakwe.
11 «Yabo Bamohabu, ukulyokera keera, bâli jeberiiri.
Balyagagi nga divaayi íri mu ndango imyaka mingi, buzira kutwangwa.
Ndaakyo kyanya bakatwalwa imbohe.
Kwokwo, bakiri mu ba noꞌmuhongolo mwija,
banakiri mu simiisa.
12 Kundu kwokwo, Nahano adetaga:
“Mu siku ízigayija, ngamùlungikira abagoma,
bayiji mùyonera kweꞌdivaayi yinyu mwenyene.
Ha nyuma, banasige bavungula-vungula indango.
13 Abahisiraheeri bâli kizi tabaaza umuzimu gwa mu kaaya keꞌBeteeri.
Neꞌkyanya gutakabatabaala, banagwatwa neꞌshoni.
Kwo na kwokwo, Abamohabu nabo bagateezibwa ishoni, hiꞌgulu lyoꞌmuzimu gwabo Kemooshi.”
14 «E bandu beꞌMohabu, kuti kwo mwangakizi yihaya, mbu:
“Tulyagagi bikalage byeꞌndwani!
Neꞌkyanya tulyagagi mwiꞌzibo, tuli mu zibiiriza.”
15 Ehee! Si abagoma biinyu bakola bagayiji mùshereeza!
Utwaya twinyu, tugahongolwa, kiri neꞌmisore yinyu inayitwe.»
Kwokwo, kwo Mwami adesiri. Niꞌziina lyage, ye Nahano woꞌbushobozi bwoshi!
16 «E Bamohabu, ulwinyu lukola lugaahika.
Ee ma! Mukolaga mugaminikwa.
17 E batuulani baꞌBamohabu!
Na niinyu mwe mubayijiriiri! Mubalirire, ma!
Mukizi deta, ti: “Kino kihugo, kundu kishubi lumbuusiri,
haliko abagoma keera bakiyogogoza.
Ubulangashane bwakyo, noꞌbushobozi bwakyo, ndaakibyo!”
18 «Na niinyu, mwe batuulaga beꞌDibooni! Mukizi yibiika haashi,
munayibodeke mu luvu.
Si ngiisi ábagaminika Abamohabu, na niinyu, bagayiji mùteera!
Inzitiro ziinyu, bagaasiga bazishereeza.
19 Na niinyu, mwe batuulaga beꞌHaroweri!
Mukizi yisunga ha butambi lyeꞌnjira, iri munaloleera.
Yabo bandu ábagweti bagatibita ukulyoka i Mohabu, mugendi babuuza:
“E balya! Bikagi íbyaba?”
20 Nabo, ti: “Si ikihugo kyeꞌMohabu keera kyashereezibwa!
Abandu baamwo, bakoli teziibwi ishoni.”
E Bamohabu, mulirage ku kimombo.
Mugendi yimangira ha lwiji lwinyu Harinooni,
iri munamenyeesania kwo keera mwasherebera lwoshi-lwoshi!
21 Abatuulaga ba mu ndekeera ya ha lugulu, keera bahanirizibwa,
kiri naꞌkaaya keꞌHolooni, naꞌkeꞌYahasa, naꞌkeꞌMefaati,
22 naꞌkeꞌDibooni, naꞌkeꞌNebo, naꞌkeꞌBeeti-Dibilatayimu,
23 naꞌkeꞌKiryatayimu, naꞌkeꞌBeeti-Gamuli, naꞌkeꞌBeeti-Mehoni,
24 naꞌkeꞌKeryoti, naꞌkeꞌBosira.
Abandu booshi beꞌMohabu keera bakahanirizibwa,
ngiisi ábatuuziri mu twaya twa hala, na ábatuuziri hoofi-hoofi.
25 Yabo Bamohabu, imisi yabo ikoli maziri.
Ee! Ukuboko kwabo, keera kwavunika.»
Kwokwo, kwo Nahano adesiri.
26 «Balya Bamohabu, bâli kizi yigereera Nahano.
Kwokwo, mukizi bahaniiriza, halinde banabambaajire nga balalwe.
Bagayibulaga haashi, banayivuruguuze mu bishazi byabo,
halinde abandu banakizi bahonyoleza, ti honyo!
27 E Bamohabu, si mwâli kizi honyoleza Abahisiraheeri!
Mwanakizi baharuura nga bakagwatwa mu biso byaꞌbanyazi, mwanabazuugiza amatwe.
28 «Mwe batuulaga beꞌMohabu! Mushaagage mu twaya,
munagendi tuula mu nyaala.
Ee! Mugendi tuula nga mahumba, bwo go gali mu yubaka ingisha mu nyaala.
29 «Twâli yuvwiti kwaꞌBamohabu bâli kizi yikangaata bweneene.
Ee ma! Ubwikangaate bwabo bwâli leeziri ulugero.
Bâli kizi yiheemya bweneene mu mitima yabo,
mbu bo bali naꞌkamaro.
30 Nahano ashubi detaga kwokuno: “Ubwikangaate bwabo, mbuyiji-yiji.
Kundu kwokwo, ndaako kamaro buhiiti.
Kundu bagweti bagayihuuza,
ndaabyo bashobwiri ukukola.”
31 «Kwokwo, ngola mu geraniza Abamohabu booshi.
Ngolaga bu lira hiꞌgulu lya ábali mu kaaya keꞌKiiri-Heresi.
32 E bandu beꞌShibima! Mwâli riiri nga mizabibu íjabusiri Inyaaja yoꞌMuunyu, halinde i Yazeeri.
Kundu kwokwo, irya mizabibu, umushereeza agamùnyaga yo,
kiri neꞌbindi bitumbwe.
Kwokwo, ngamùlirira bweneene,
ukuhima kwo njuba mu lirira balya bandu beꞌYazeeri.
33 Mwe Bamohabu, mwâli neꞌndalo zeꞌnagiira.
Kundu kwokwo, ibikandiro biinyu bitakiri mu lyosa idivaayi.
Mutanakiri noꞌbushambaale, kandi iri malega.
Ndaanaye úkiri mu kizi kanda imizabibu, iri anabanda akabuuli.
Kundu mukola mu yamiza, kutakiri ku bushambaale.
34 «Yabo Bamohabu, bakola mu bululuka mu twaya twabo, ukulyokera i Heshibooni, halinde i Heryari neꞌYahasa, noꞌkulyoka i Sowari halinde i Horonayimu, neꞌHegulaati-Sherishiya. Emwe! Kiri naꞌmiiji geꞌNimurimu, keera gakama. 35 Yabo Bamohabu, bwo bali mu yokera imizimu umubadu ku marango, ngabazimiiza.» Kwokwo, kwo Nahano adesiri.
36 «Umutima gwani, gukola mu lirira Abamohabu, kiri na beene Kiiri-Heresi. Gushushiini na gwoꞌmundu úkola mu lasa umuteera-teera ku kigandaaro. Mukuba ibindu byoshi byo bâli koli singwiri, keera babishahulwa. 37 Yabo bandu, mu kuyerekana kwo bajengiirwi, keera bakakunguulwa umushaku ku matwe, kiri neꞌnyanwa. Keera banashaakirwa ku maboko, banakoli kenyiiri amasuuzu.
38 «Balya Bamohabu, keera nabavungula, nga kirugu kizira kamaro. Kwokwo, mu ngiisi nyumba, na mu ngiisi njira yabo, abandu bakola mu liruuka ku kimombo.» Kwokwo, kwo Nahano adesiri.
39 «Yabo Bamohabu, keera bavunika. Bakola mu bululuka. Mulolage ngiisi kwo bagweti bagateezibwa ishoni. Abandu bakola mu bahonyoleza, keera banateteerwa ngana!»
40 Nahano adetaga kwokuno: «Lolagi!
Abagoma baꞌBamohabu bakola bagayija nga nyunda úli mu yihwika mu kihugo kyabo.
41 Utwaya twamwo tugagwatwa, kiri noꞌtwaya tuzitire.
Ku yikyo kyanya, ibikalage byeꞌndwani bigahuumirwa, ngoꞌmukazi úgweti úgaabuta.
42 Bwo bâli kizi yidundulika imbere lya Nahano,
bagashereezibwa, halinde batanaki be mulala.
43 E Bamohabu, buno, ikihuumula kikoli mùlindiriiri, kuguma neꞌbishimo bila, neꞌmibashu.»
Kwokwo, kwo Nahano adesiri.
44 «Ikyanya abandu bagakizi puumuka hiꞌgulu lyeꞌkyoba,
bagakizi yami yihongoleka mu buhya.
Neꞌkyanya bagalooza ukubushaaga mwo,
bagakizi yami bashwa noꞌmubashu.
Keera nashungika ngiisi kwo ngahaniiriza Abamohabu.»
Kwokwo, kwo Nahano adesiri.
45 «Abandu keera bakabatibita,
banagendi looza umutuula i Heshibooni.
Kundu kwokwo, yaho i Heshibooni, umuliro gwanahulukira mu kaaya, mu kajumiro ka Sihooni,
gwanasingoola ikihugo kyoshi kyeꞌMohabu,
kiri na balya banabwikangaate booshi.
46 E Bamohabu, yayewe imwinyu!
Bwo mwâli kizi yikumba umuzimu Kemooshi, keera mukashereezibwa.
Bagala biinyu na banyere biinyu, keera bakagwatwa,
banatwalwa imbohe.
47 «Kundu kwokwo, yabo Bamohabu, mu siku ízigayija, ngashubi bagenduusa.»
Kwokwo, kwo Nahano adesiri.
Ubuleevi hiꞌgulu lyaꞌBamohabu, kwokwo kwo bumaziri.