49
Nahano atumira Abahamooni indumwa
1 Nahano adetaga hiꞌgulu lyaꞌBahamooni kwokuno:
«Abahisiraheeri, bakolaga hayi?
Ka ndaaye úsigiiri, mbu ahyane ikihugo kyabo?
Aahago! Kituma kiki bakaleka Abahamooni bayabiire ikihugo kyeꞌGiryadi?
Yabo Bahamooni, bagweti bagayikumba umuzimu Mirikomu,
bo banakoli tuuziri mu twaya twaꞌBagaadi!»
2 Nahano anashubi detaga kwokuno:
«Mu siku ízigayija, kiri naꞌBahamooni ba mu kaaya keꞌRaba bagayuvwa akaluulu kiꞌzibo.
Ikyanya ligaamala, hagasigala ibiguuka naaho.
Kiri noꞌtwaya tweꞌbutambi, tugasingoolwa ku muliro.
Yabo bandu, kundu bakayimula Abahisiraheeri mu kihugo kyabo,
halikago leero Abahisiraheeri bo bagabayimula.»
Kwokwo, kwo Nahano adesiri.
3 «E bandu beꞌHeshibooni, mutondeere ukuliruuka.
Si akaaya keꞌHayi keera kashereezibwa!
E bandu beꞌRaba! Niinyu mubululukage!
Muyambale amasuuzu mu kuyerekana umwizingeerwe.
Mutibitage iyo munda neꞌyo munda mu luzitiro lwinyu.
Si umuzimu gwinyu Mirikomu, gugatwalwa imbohe,
kiri naꞌbagingi, naꞌbandi bakulu baagwo.
4 Mugweti mugayiyuvwa hiꞌgulu lyeꞌndekeera ziinyu, mbu zikoli yeziri bweneene.
Kundu kwokwo, mulyagagi nga baana ábatatwaziizi Rurema,
iri munalangaalira kweꞌbindu biinyu bigamùkiza.
Munadete, ti: “Nyandagi úgayiji gira mbu andeere?”
5 Kwokwo, ngamùteera ikyoba imbande zooshi.
Abatuulani biinyu bagakizi mu mùyimula mu kihugo kiinyu,
ndaanaye úgashubi mùkuumania.»
Kwokwo, kwo Nahano Rurema woꞌbushobozi bwoshi adesiri.
6 «Haliko, mu siku ízigayija, yabo Bahamooni, ngashubi bagenduusa.»
Kwokwo, kwo Nahano adesiri.
Nahano atumira Abahedoomu indumwa
7 Nahano woꞌbushobozi bwoshi, adetaga hiꞌgulu lyaꞌBahedoomu kwokuno:
«Mu kaaya keꞌTemaani, ka ndaaye mwitegeereza úli mwo?
Abitegeereza baamwo, ka batakiri mu hanuulana?
Koꞌbwitegeereze bwabo bukamala lwoshi-lwoshi?
8 E kibusi kya Hesahu, mwe naꞌbatuulaga beꞌDedaani! Mutibitage, mugendi yibisha mu nyaala.
Kikolaga kyanya kyoꞌkumùhaniiriza.
9 Abimbuzi beꞌmizabibu, ikyanya bali mu yiji yimbula,
bali mu siga imisigala ku mulandira.
Kiri naꞌbazimba, ikyanya bali mu yiji zimba bushigi,
bali mu yabiira naaho ngiisi íbyangabatabaala.
10 Haliko abandu beꞌkibusi kya Hesahu boohe, ngabanyaga ibindu byoshi-byoshi.
Kiri na ngiisi ho bali mu yibisha, ngababishuula,
gira batalonge ukuyibisha imwani.
Yabo Bahedoomu, abandu baabo booshi bagaminikwa.
Ndaanaye kiri noꞌmuguma úgasigala.
11 Mundekere ifuuvi ízimùtuuziri mwo,
naani, ngakizi zikuya-kuya.
Kiri na banamufwiri biinyu, mbe nie bagakizi langaalira.»
12 Nahano adetaga kwokuno: «Abandu baguma, bâli kizi hanwa, kundu ndaabwo buhube bahiiti. Aahago! Mwe Bahedoomu, ka itali yo haahe, kwo niinyu mugaahanwa? Ukuhanwa, mugaahanwa ngana!»
13 Nahano adetaga kwokuno: «Ngweti ngabiika indahiro kwiꞌziina lyani, kwaꞌkaaya keꞌBosira kagahongoka, kanasigale kilundo kyaꞌmabuye. Ikyanya abandu bagaabona ngiisi kwo kashereezibwa, bagasoomwerwa, banatondeere ukukahonyoleza, iri banakadaaka. Kiri noꞌtundi twaya tweꞌbutambi, natwo tugashereezibwa, tunasigale biguuka, halinde imyaka neꞌmyakuula!»
14 E Bahedoomu! Nahano akambwira kwo keera akalungika indumwa yage mu mahanga,
kwo igendi bwira abandu kwokuno:
«Mukuumanie abasirikaani biinyu, gira mugendi teera Abahedoomu.»
15 «E Bahedoomu, ngamùniihya kwo, mube bagerwa ukuhima abandu beꞌbihugo byoshi.
Yabo bandi, banakizi mùnegura.
16 We bwatiiri mu nyaala za mu migazi,
we na twaziri amarango!
Kundu wangayubaka inyumba hiꞌgulu bweneene, nga ngisha yoꞌtushuuta,
ngaki kumanula ho.
Keera mukayingiza abandu beꞌbindi bihugo mweꞌkinyukura.
Kundu kwokwo, ubwikangaate keera bwakuteba.»
Kwokwo, kwo Nahano adesiri.
17 Nahano anadetaga kwokuno: «Ikihugo kyeꞌHedoomu kigashereezibwa lwoshi.
Ikyanya abandu bagakizi lenga hoofi lyakyo, banabone ngiisi kwo kyasigala biguuka,
bagahuumirwa, banasoomerwe.
18 Nga kweꞌSoodoma neꞌGomora noꞌtwaya tweꞌbutambi bikashereezibwa,
kwo na kwokwo i Hedoomu nayo igashereezibwa.
Ndaanaye mundu úgaki tuula yo kandi.»
Kwokwo, kwo Nahano adesiri!
19 «Nga kweꞌndare iri mu vuvunyuka mu kishungu-shungu hoofi noꞌlwiji Yorodaani,
inayilale mu bibuzi i bungere, kwo naani ngayami yimula Abahedoomu mu kihugo kyabo.
Ha nyuma, na ndoole ugundi mutwali, ninamúyimike mwo.
Aaho! Nyandi úshobwiri ukunyigereera?
Na nyandi úwangambuulania?
Na nyandi mutwali úwangagira mbu tuhagane?»
20 Yuvwagwi ngiisi kwo Nahano akoli shungisiri ukugira hiꞌgulu lyaꞌBahedoomu,
naꞌbatuulaga beꞌTemaani.
Ku kasiisa, kiri naꞌbaana baabo bato, bagayimulwa, banabululirwe hala.
Emwe! Utwaya twabo, ngiisi mundu agakizi tuhumirirwa.
21 Ikyanya bagaagwa, ikihugo kigajugumbana.
Ikyanya bagayidehereza mu nduulu, igayuvwikana halinde ku Nyaaja Ndukula.
22 Lolagi! Abagoma baꞌbandu beꞌBosira bakola bagayija
nga nyunda úli mu yami yihwika mu kaaya kaabo.
Yulwo lusiku, abasirikaani beꞌHedoomu bagateerwa neꞌkyoba,
nga mukazi úkola mu yuvwa umukero.
Nahano atumira abandu beꞌDamasiki indumwa
23 Nahano adetaga hiꞌgulu lyeꞌDamasiki kwokuno:
«Abandu beꞌHamaati naꞌbeꞌHaripaadi, bakayuvwa umwazi mubi,
banakoli tetiirwi.
Bakoli shengusiri hiꞌgulu lyeꞌkyoba,
banakoli hanamiri imitima, nga nyaaja íri mu birinduka.
24 Abandu beꞌDamasiki, keera bateerwa neꞌkyoba,
neꞌndege zikoli teziri bweneene.
Bakoli yuvwiti ubulyaniirwe, ngoꞌmukazi úkola úgaabuta.
Banakoli loziizi ukutibita.
25 Balya bandu, bâli kizi shambaala ngiisi kyanya!
Kundu kwokwo, buno akaaya kaabo kakola kagajandwa.
26 Imisore yabo, igaagwa mu njira, inayitwe.
Yulwo lusiku, abasirikaani baamwo booshi bagayitwa.»
Kwokwo, kwo Nahano woꞌbushobozi bwoshi adesiri.
27 «Inzitiro zeꞌDamasiki, ngaziduulika kwoꞌmuliro,
halinde inyumba nyiija za mwami Beni-Hadaadi zinasingooke.»
Nahano atumira abandu beꞌKedaari naꞌbeꞌHazoori indumwa
28 Mwami Nebukandeneza weꞌBabeeri akahima beene Kedaari. Kiri neꞌbihugo byeꞌHazoori âli bitwaziri. Yibyo bihugo, Nahano adetaga hiꞌgulu lyabyo kwokuno:
«Yabo bandu beꞌKedaari, batuuziri uluhande lweꞌsheere.
Aaho! Mugendi bateera, munabazimiize.
29 Mugendi gwata amaheema gaabo, na byoshi íbigali mwo.
Mukizi gwata neꞌbitugwa byabo, kiri neꞌngamiya.
Mugendi bateerera induulu, ti: “Tukola mweꞌkihuumula ngiisi luhande!”»
30 Nahano adetaga kwokuno: «E batuulaga beꞌHazoori,
nie Nahano namùkengula kwo mutibitire hala, mugendi yibisha.
Mukuba, mwami weꞌBabeeri Nebukandeneza keera akagira igambi libi hiꞌgulu liinyu,
anakola agamùzimiiza.
31 «Yabo bandu baki jeberiiri mu kati koꞌmutuula.
Aaho! Yimukagi, tugendi bashereeza.
Yabo bandu, batuuziri haabo-haabo.
Akaaya kaabo, katahiiti inyiivi, kandi iri migaliro.
32 Aahago! Mugendi shahula ingamiya zaabo, kiri na ngiisi bindi bitugwa byo bagweti.
Balya bandu, ábali mu kunguula imishaku yabo,
ngabashabulira hooshi mu kihugo.
Ngiisi ho bagakizi genda, ngabaleetera ubuhanya.»
Kwokwo, kwo Nahano adesiri.
33 «Akaaya keꞌHazoori kagasigala ishamba limaata.
Ndaaye umundu úwâye ki katuule mwo,
si ligaaba igomberano lyeꞌmirunga.»
Nahano atumira abandu beꞌHelamu indumwa
34 Ikyanya Zedekiya akayima abe mwami weꞌBuyuda, haaho-haaho, indumwa ya Nahano yanahikira umuleevi Yeremiya hiꞌgulu lyeꞌkihugo kyeꞌHelamu.
35 Nahano woꞌbushobozi bwoshi anadeta kwokuno: «Ikihugo kyeꞌHelamu, kundu kikoli sikamiri bweneene hiꞌgulu lya ábali mu fwora imiheto,
haliko iyo miheto yoshi, ngagivungula-vungula.
36 Ngaleetaga abagoma ukulyoka imbande zooshi,
banabashabulire ngiisi heꞌmbuusi iri mu huusa.
Bagagendi twalwa imbohe mu mahanga gooshi.
37 «Yabo Bahelamu, ngabajungumbania imbere lyaꞌbagoma baabo.
Yabo bagoma, kwo baloziizi ukubayita, bagagendi balandiriza bafumbiiti ingooti,
halinde banaminike booshi imbere lyani.»
Kwokwo, kwo Nahano adesiri.
38 Nahano ashubi detaga kwokuno:
«Iyo munda i Helamu, yo ngabiika ikitumbi kyani, mu kuyerekana kwo nie mwami,
na nzimiize mwami wabo, kiri naꞌbakulu baabo.»
39 Nahano ashubi detaga kwokuno:
«Balya bandu beꞌHelamu, iri hagalenga isiku,
ngashubi bagenduusa, nga ngiisi kwo bâli tuula.»