50
Nahano atumira Abababeeri indumwa
1 Nahano anabwiraga umuleevi Yeremiya, hiꞌgulu lyeꞌBabeeri, naꞌbatuulaga baayo kwokuno:
2 «Mukizi menyeesa ibinyamahanga indumwa, buzira kubibisha umwazi.
Muyimusagye irembera,
mu kubamenyeesa kwaꞌBababeeri bagwatwa imbira.
Imigisi yabo igateezibwa ishoni,
halinde inavungulwe.
Iyo migisi yabo Beeri, na Merodaaki, igateteerwa,
inahuumirwe bweneene.
3 Yikyo kihugo kyeꞌBabeeri, abandu bakola mu yija ukulyoka imbembe,
gira bayiji kiteera, banakishereeze,
kinahinduke ishamba lizira bandu.
Abandu neꞌbitugwa byoshi bigakitibita,
ndaanaye úgaki tuula mwo.»
Abahisiraheeri bâye ki galukire Rurema
4 Nahano Rurema, adetaga kwokuno:
«Ku yikyo kyanya, Abahisiraheeri naꞌBayuda bagayija bali mu ndooza,
iri banalira bweneene.
5 Bagabuuza injira yoꞌkugenda i Sayuni.
Neꞌkyanya bagabwirwa, bagayami tondeera ukugenda yo.
Tuganywana ikihango twe nabo, batanâye ki kihongole.
Ngaaba nie Nahamwabo, halinde imyaka neꞌmyakuula!
6 Abandu baani bâli riiri nga bibuzi íbikateereka.
Ibirongoozi byabo, bikabahabura,
halinde banayibagira ho bâli tuuziri, banakizi genda bagajeba-jeba mu migazi.
7 Ikyanya abagoma bâli kizi bagwana, banakizi bateera.
Banakizi deta, ti: “Balya bandu, mu kubateera, tutahubiri.
Si keera bakahubira Nahano yenyene!
Kundu bashokuluza baabo bâli kizi langaalira Nahano,
haliko, abaana baabo banakizi múhubira!”
8 «Mutibitage Abababeeri! Muhuluke mu kihugo kyabo.
Mukizi ba nga bihebe íbiri mu genda imbere lyeꞌkiso.
9 Ngola ngaleeta abandu bingi ukulyoka imbembe, bayiji teera i Babeeri,
banagigwate.
Balyagagi bikalage mu kufwora imiheto,
batanâye galuke maboko mamaata.
10 Yabo bagoma bagagenda mu Babeeri,
banashahule mwo ngiisi byo baloziizi.»
Kwokwo, kwo Nahano adesiri.
11 «E Bababeeri, ikyanya mukagendi shahula abandu baani ibindu,
mwanaba mukoli shambiiri bweneene.
Mwanasimba-simba nga nyana íri mu ndagiriro.
Izu liinyu, likola nga lyeꞌfiizi yeꞌfwarasi.
12 Kundu kwokwo, ikihugo kiinyu kigaki teezibwa ishoni bweneene,
kinasigale mwaꞌbandu bagerwa bweneene ukuhima ibindi byoshi,
kinahinduke ishamba íriyumagusiri.»
13 Na bwo Nahano agaaba akoli shavwiri,
yikyo kihugo, ndaaye mundu úwâye kituule mwo.
Si kigasigala biguuka.
Ngiisi úgakizi kilenga mwo, agahuumirwa.
Ikyanya abandu bagaabona ngiisi kwo kyashereezibwa, bagasoomerwa ngana-ngana!
14 «Mwe mufumbiiti imyambi mweshi! Musookanane akaaya keꞌBabeeri, gira mukateere.
Na mu kulasha imyambi, mutasige kiri noꞌmundu muguma.
Mukuba keera bambubira, na ndi nie Nahano.
15 Mubandage akashiba ngiisi luhande!
Lolagi! Balya Bababeeri keera bakayibiika mu maboko gaꞌbagoma.
Inzitiro zaabo zooshi, keera zikayihongoleka haashi.
Balya bandu, Nahano keera akabahaniiriza, nga ngiisi kwo bibakwiriiri.
Aaho! Muyihoolage!
Ngiisi kwo bakagira abandi, kube kwo na niinyu mugabagira.
16 Yabo Bababeeri, mubahangirire batashubi byala imbuto, batanayimbule.
Mu balya basirikaani, ngiisi muguma agagwatwa neꞌkyoba,
halinde anayami tibitira imwabo.
17 «Abahisiraheeri balyagagi nga bibuzi.
Indare zigweti zigabahiiva, iri zinabashaabula.
Ubwa mbere, bakashaabulwa na mwami weꞌHasuriya.
Noꞌbuzinda, mwami Nebukandeneza weꞌBabeeri, ye kabavungula amavuha.»
18 Nahano woꞌbushobozi bwoshi, Rurema waꞌBahisiraheeri adetaga kwokuno:
«Nga kwo keera nꞌgahaniiriza ulya mwami weꞌHasuriya,
kwo na kwokwo, ngahaniiriza mwami weꞌBabeeri, kiri neꞌkihugo kyage.
19 Ha nyuma, na ngalulire Abahisiraheeri mu kihugo kyabo.
Bagakizi lya imimbu ukulyoka ku mugazi Karimeeri, na ku Bashaani,
kiri neꞌbya mu migazi ya Hifurahimu neꞌGiryadi.
20 Mu yizo siku, kundu abandu bangalooza ukubona amabi mu kihugo kyeꞌHisiraheeri, batagagabona.
Neꞌri bangalooza ukubona ibyaha mu kyeꞌBuyuda, batagabibona.
Mukuba, ngaasiga abandu baani bagerwa, na mbakejeerere.»
Kwokwo, kwo Nahano adesiri.
21 Nahano ashubi deta kwokuno:
«Muzamuuke, mugendi teera ikihugo kyeꞌMeratayimu,
mugendi teera naꞌBapekodi.
Mubalandirize, halinde mubaminike lwoshi-lwoshi!
Ngiisi byo ngola mu mùbwira, mubigirage.
22 Bakola mu shereeza ikihugo kyoshi,
akaluulu kiꞌzibo kayuvwikiini hooshi.
23 Ubwa mbere, Abababeeri bâli gweti bagahooja-hooja amahanga gooshi.
Halikago buno, nabo keera bahirikwa, banatwika.
Mu bihugo byoshi, i Babeeri yo ikoli sherebiiri bweneene.
24 E Bababeeri, mwâli kizi mbagala kwo, nie Nahano.
Kwokwo, nanamùtega, mwanayami gwatwa.
25 «Keera nꞌgayigula ikihinda kyani kyeꞌbilwaniiso,
nanabilyosa, gira ngoleese uburaakari bwani.
Nie Nahano woꞌbushobozi bwoshi,
ngola mu gendi teera ikihugo kyeꞌBabeeri.
26 E basirikaani, mulyokage ngiisi luhande, gira muyiji teera Abababeeri.
Muhongolage ibihinda byabo byeꞌbyokulya.
Munabashahule ibindu, munabilunde indundo mbamu.
Kino kihugo, muyiji kishereeza lwoshi-lwoshi,
hatanagire umundu ye mugaasiga!
27 Muminikage abasirikaani baamwo booshi.
Mubayite nga kwo muli mu yita ibitugwa.
Yayewe imwabo! Si ulwabo keera lwahikaga!
Kikola kyanya kyoꞌkubahaniiriza.
28 Yuvwagwi! Abahisiraheeri ábafuushuka i Babeeri, keera bayija i Sayuni,
banakola mu menyeesa ngiisi kwo Rurema Nahamwitu, keera akayihoola Abababeeri.
Si bâli mali shereeza inyumba yage!
29 Ngiisi ábayiji ukufwora umuheto, mubabwire kwo bayiji teera akaaya keꞌBabeeri.
Mukasokanane, hatagire umundu úgafuushuka mwo.
Ngiisi kwo bâli kizi gira abandi, kube kwo nabo mugabagira.
Yabo Bababeeri bâli kizi hagana na Nahano, Umutaluule waꞌBahisiraheeri, ku bwikangaate bweneene.
30 Ku yukwo, imisore yabo igayitirwa mu njira.
Abasirikaani baabo booshi, bagaminikwa ku lwolwo lusiku luguma.»
Kwokwo, kwo Nahano adesiri.
31 «E bandu boꞌbwikangaate! Niehe, nie Nahano woꞌbushobozi bwoshi.
Na buno, ngola ngamùlwisa.
Ee! Kikola kyanya kyoꞌkumùhaniiriza.
32 Kundu mugweti mugayikangaata,
si mugasiitara, munagwe, ndaanaye úgamùvyula.
Ngayasa umuliro mu twaya twinyu,
halinde byoshi bisingooke ngiisi luhande.»
33 Nahano woꞌbushobozi bwoshi, adetaga kwokuno:
«Abahisiraheeri naꞌBayuda, bakola baja.
Abagoma keera bakabagwata imbohe, banalahira kwo batagabaliika.
34 Kundu kwokwo, niehe, iziina lyani nie Nahano woꞌbushobozi bwoshi.
Nie gaguluula abandu baani ku bushobozi bwani,
halinde ndeete umutuula mu kihugo kyabo.
Halikago, Abababeeri boohe, ndaagwo mutuula gwo bagalonga.»
35 Nahano ashubi detaga kwokuno:
«Balya Bababeeri bayitwe ku ngooti,
kuguma naꞌbakulu baabo, naꞌbanabwenge baabo!
36 Yizo ngooti, leka ziyite naꞌbaleevi baabo beꞌbibeesha,
halinde bahinduke bahwija.
Zeezo ngooti, ziyite naꞌbasirikaani baabo,
halinde bahuumirwe.
37 Yizo ngooti, zikizi yita neꞌfwarasi zaabo,
bashereeze naꞌmagaare gaabo giꞌzibo,
kiri naꞌbasirikaani baabo beꞌmahanga, ábali mu hembwa.
Babe booba nga bakazi!
Zeezo ngooti, zikizi teera ibihinda byabo byoshi,
halinde ibindu íbiri mwo bishahulwe, binatwalwe i mahanga.
38 Zeezo ngooti, zikizi teera invula ihangame,
halinde amiiji gaamwo gakame.
Ikihugo kyeꞌBabeeri, si kiyijwiri mweꞌmigisi!
Iyo migisi ikola mu teera abandu ikyoba bweneene, halinde banabe nga basire.
39 Ikyanya i Babeeri igaashaka, imirunga neꞌhotirishe,
kiri neꞌzindi nyamiishwa, bigayiji tuula mwo.
Haliko abandu boohe, ndaaye úgaki yiji tuula mwo, halinde imyaka neꞌmyakuula!
Ikihugo kyeꞌBabeeri kigasigala biguuka naaho.
40 Ngiisi kwo nꞌgaminika i Soodoma neꞌGomora noꞌtundi twaya tweꞌbutambi,
i Babeeri nayo, kwokwo kwo ngagishereeza.
Ndaanaye mundu úgaki tuula yo kandi.»
Kwokwo, kwo Nahano adesiri.
41 «Lolagi! Abasirikaani bakola mu lyoka imbande zeꞌmbembe.
Bali mulala úguhimbiri, kiri naꞌbaami bingi, bakola mu yiji teera ukulyoka mu mbeka zeꞌkihugo.
42 Abasirikaani baabo, bahagasiri imiheto, naꞌmatumu.
Balyagagi balangi, batanali mu yuvwirana indengeerwa.
Ikyanya bali ku fwarasi zaabo,
bali nga midunda mu nyaaja.
E Babeeri! Yabo bagoma bakola ibiringiini, kwo bayiji kuteera.
43 Yabo basirikaani, mwami weꞌBabeeri keera akayuvwa imyazi hiꞌgulu lyabo,
anayoboha, halinde amaboko gaage gakoli lebiiri.
Akoli shengusiri, anakola mu lyanirwa,
ngoꞌmukazi úgweti úgaliibwa noꞌmukero.
44 Nga kweꞌndare iri mu vuvunyuka mu kishungu-shungu hoofi noꞌlwiji Yorodaani,
inayilale mu bibuzi i bungere,
kwo naani ngayami yimula Abababeeri mu kihugo kyabo.
Ha nyuma, na ndoole ugundi mutwali, ninamúyimike mwo.
Aaho! Nyandi úshobwiri ukunyigereera?
Na nyandi úwangambuulania?
Na nyandi mutwali úwangagira mbu tuhagane?»
45 Yuvwagwi ngiisi kwo Nahano akoli shungisiri ukugira hiꞌgulu lyeꞌkihugo kyeꞌBabeeri,
naꞌbatuulaga baamwo.
Ku kasiisa, kiri naꞌbaana baabo bato, bagayimulwa, banabululirwe hala.
Emwe! Utwaya twabo, ngiisi mundu agakizi tuhumirirwa.
46 Ikyanya ikihugo kyeꞌBabeeri kigagwatwa, abandu booshi bagateerera induulu bweneene,
neꞌkihugo kinajugumbane.
Abandu ba mu mahanga gooshi bagayuvwa ngiisi kwaꞌBababeeri bakola mu bululuka ku kimombo.