51
1 Nahano adetaga kwokuno:
«Ngaleeta abashereeza, bayije nga mbuusi,
banashereeze ikihugo kyeꞌBabeeri, naꞌbandu baamwo.
2 Ngalungika ibinyamahanga, biyiji shereeza i Babeeri,
nga kweꞌmbuusi iri mu yehuula ibyasi.
Ku lusiku abagoma bagakishereeza,
bagahuluka imbande zooshi, banayiji kiteera.»
3 «Utalekage kwaꞌbasirikaani beꞌBabeeri bafwore imiheto yabo,
utanabaleke mbu bayambale ibihazo byabo.
Utakejeerere imisore yabo,
si uyami minika abasirikaani baabo lwoshi-lwoshi!
4 Yabo Bababeeri, bagateerwa mu kihugo kyabo,
banayitirwe mu mitalimbwa yabo.
5 Nie Nahano woꞌbushobozi bwoshi, na ndi nie Rurema waꞌBahisiraheeri naꞌBayuda.
Yabo bandu baani, ndakabajanda, kundu bâli kizi mbubira,
na ndi nie Mutaluule waꞌBahisiraheeri.»
6 Ngiisi mundu ashaagage i Babeeri,
gira alonge ukuyikiza.
Mutasigalage yo, mbu muyitirwe kuguma naꞌbanabyaha.
Mukuba, kikola kyanya kyoꞌkubahaniiriza.
Ee! Nahano agabahaniiriza, nga ngiisi kwo bibakwiriiri.
7 Ikihugo kyeꞌBabeeri, kyâli riiri nga rusoozo lweꞌnooro mu maboko ga Nahano,
lwanâli kizi lalusa amahanga gooshi.
Ibinyamahanga byâli kizi nywa idivaayi yamwo,
byanakizi sireha.
8 Halikago buno, Babeeri naye keera akagwa, anavunika.
Ku yukwo, mumúlirire!
Mugendi leeta umuti, munamúlunge inguma.
Hali ikyanya angaki kira.
9 Ibinyamahanga byanashuvya:
«Tukagira mbu tukize i Babeeri, haliko shoobe!
Muleke, tuyigendere, ngiisi muguma mu kihugo kyabo.
Si Abababeeri, ibihano byabo bikoli luziri bweneene,
binahisiri mu kibungu!»
10 Abayuda bagweti bagaadeta:
«Nahano Rurema adesiri kwo ndaago mabi tugweti.
Aaho! Tugendage i Sayuni,
gira tugendi menyeesania ngiisi kwo âli kizi gira.»
11 Nahano akoli shungisiri ukushereeza i Babeeri,
kyo kitumiri akashigika abaami beꞌMediya.
Yabo Bababeeri, bo bakashereeza inyumba yage.
Ku yukwo, agabayihoola, nga kwo bibakwaniini.
Aahago! Mutyaze imyambi yinyu! Muyabiire neꞌsiribo!
12 E bagoma beꞌBabeeri! Mushonie irembera liꞌzibo,
gira abasirikaani bateere inzitiro zeꞌBabeeri.
E Bababeeri! Muleetage abandi balaliizi, lyo mumenya ikihe kyo bagamùteera kwo ku bumbishwa.
Kundu mwangagira kwokwo, Nahano akoli shungisiri kwo agamùshereeza,
lyo akwiza ishungi zaage.
13 E Bababeeri! Ikihugo kiinyu kiyegiiri inyiiji nyingi-nyingi,
keera mwanagala bweneene.
Kundu kwokwo, ulwinyu keera lwahika.
Leero, mukola mugaamala.
14 Nahano woꞌbushobozi bwoshi, keera akabiika indahiro kwiꞌziina lyage kwokuno:
«E Babeeri, utwaya twawe, ngatuyijuza mwaꞌbasirikaani baꞌbagoma nga nzige,
banakubandire akabuuli, kwo bakuhimiri.»
15 Nahano ye kabumba ikihugo ku bushobozi bwage.
Ye kanakisikamya ku bwitegeereze bwage.
Anakoleesa ubwenge bwage mu kuyanuula igulu.
16 Ikyanya ali mu kyula, amiiji mwiꞌgulu, gali mu yami yigusha haguma.
Ali mu kuumania ibibungu hooshi mu kihugo.
Ku kyanya kyeꞌnvula, analyamuze ikiryamu.
Anahuuse neꞌmbuusi ukulyoka mu bihinda byage.
17 Si abandu boohe, biri bizeeze, ndaanabyo bayiji!
Abatuzi, bali mu yagagala ngana mu kutula imigisi.
Si iri ya bibeesha ngana!
Ndaabwo bugumaana ihiiti.
18 Ndaako kamaro ko ihiiti.
Si iri ya kuhonyoleza naaho.
Ikyanya Nahano agagihana, igaahera lwoshi.
19 Haliko, Rurema wa Yakobo, yehe atali nga yo.
Si ye kalema ibindu byoshi,
anatoola Abahisiraheeri kwo babe bo bandu baage!
Iziina lyage, ye Nahano woꞌbushobozi bwoshi.
20 Nahano adetaga kwokuno:
«E Bababeeri, muli nyundo yani, yo ndi mu koleesa mu kulwa.
Ngweti ngamùkoleesa, gira nvungule ibinyamahanga,
halinde na njereeze kiri naꞌmaami gaabo.
21 Ngamùkoleesa mu kuvungula ifwarasi, na ábali mu zigendera kwo.
Munavungule naꞌmagaare goꞌkubululwa, na ábali mu garongoora.
22 Munavungule abashosi naꞌbakazi, kiri naꞌbashaaja neꞌmisore.
Mugavungula abatabana naꞌbanyere.
23 Ngamùkoleesa mu kuvungula abangere neꞌbitugwa byabo,
naꞌbahiizi, neꞌbitugwa byabo byoꞌkulimiisa,
kiri naꞌbakulu na baguvuruneeri.»
24 Nahano ashubi detaga kwokuno: «Mwe Bababeeri, ngamùhana, kuguma naꞌbandu biinyu booshi, bwo mwâli kizi girira i Sayuni amabi.»
25 Nahano adetaga kwokuno: «E Babeeri,
uli mugazi gwoꞌbushereeze. Mukuba, ugweti ugashereeza amahanga gooshi.
Kundu kwokwo, ndyagagi mugoma wawe.
Ngakuhaga, na ngunyanyage haashi.
Hanatame, unasigale ugasingoolwa noꞌmuliro.
26 Mu kati kaawe mutagaboneka kiri niꞌbuye lyoꞌkuyubaka ulutaliro.
Si ugasigala ishamba, halinde imyaka neꞌmyakuula!»
Kwokwo, kwo Nahano adesiri.
27 Mugirage mushonie irembera lyoꞌkumenyeesa izibo!
Mulasagye neꞌkibuga, gira ibinyamahanga byoshi bikiyuvwe.
Mukuumanie Abahararaati, naꞌBamini, naꞌBahashikenaazi,
gira bayiji teera Abababeeri.
Mutoolage umukulu woꞌkurongoora abasirikaani.
Muleete ifwarasi kandaharuurwa nga nzige.
28 Mukuumanie abasirikaani beꞌmahanga,
gira bayiji teera i Babeeri.
Muleete abaami beꞌMediya, naꞌbatwali baabo, na baguvuruneeri baabo,
kuguma naꞌbasirikaani booshi ba mu butwali bwabo.
29 Nahano ashungisiri kwo agahindula ikihugo kyeꞌBabeeri libe ishamba,
ndaanaye mundu úgakituula mwo.
Kyo kitumiri kikola mu jungubana, iri kinagaaya-gaaya noꞌbulyanirwe.
30 Abasirikaani beꞌBabeeri batakiri mu lwa.
Si bakoli sigiiri mu nyumba zaabo nzitire.
Ubuhagarusi bwabo bwamala,
banakolaga booba nga bakazi.
Inyumba zaabo zikola mu singoolwa.
Neꞌnyiivi zaꞌkaaya zikola mu hongolwa.
31 Indumwa zigweti zigakulikirana muguma-muguma,
mu kugendi menyeesa mwami kwaꞌkaaya kaage keꞌBabeeri keera kagwatwa.
32 Ngiisi haꞌbasirikaani bangalenga mu kutibita, abagoma keera bahagwata,
banahasingoola kuguma neꞌnzitiro.
Buno, abasirikaani bakola mu lenga mweꞌkinyukura.
33 Nahano woꞌbushobozi bwoshi, Rurema waꞌBahisiraheeri, adetaga kwokuno:
«Abababeeri, abagoma bakola mu bahinyata-hinyata,
nga kwo bali mu yeluula ingano ku kyanya kyeꞌmimbu.
Ee! Ikyanya kyoꞌkuyimbula i Babeeri kikola kigaahika.»
34 «Twe bandu beꞌYerusaleemu, mwami Nebukandeneza weꞌBabeeri akatuhima, anatushereeza.
Akatushahula ibindu, twanasigala nga nyungu maata,
anayami bimira nga mujoka muhamu.
Anayabiiraga ngiisi byo âli loziizi,
anabuli tuyimula mu kihugo kiitu.»
35 Ee! Abandu beꞌSayuni badeta na kwokuno:
«Nga kwaꞌBababeeri bakatuleeza mu malibu,
kwokwo nabo ubaleezagye mu go.
Si bakayita abandu biitu bingi! Aaho! Nabo ubahaniirize.»
36 Nahano adetaga kwokuno:
«E Bayuda, ngamùbulanira, na nyihoole abagoma biinyu.
Ngayumya inyaaja zeꞌBabeeri, kiri neꞌshyoko zaazo.
37 Akaaya keꞌBabeeri, ngakahindula bibe biguuka,
halinde linabe igomberano lyeꞌmirunga.
Ikyanya abandu bagaabona kwokwo, bagakanguka.
Ndaanaye úgaki katuula mwo.
38 Buno, baki gweti bagalunduma nga ndare,
iri banamoka nga baana beꞌndare.
39 Na bwo baki nyotiirwi,
ngabagirira ulusiku lukulu.
Emwe! Ngabalalusa,
halinde banalembwe niꞌro lyaꞌkahondo-hondo, batanâye ki vyuke.»
Kwokwo, kwo Nahano adesiri.
40 «Balya Bababeeri, ngabayabiira, gira bagendi tongeerwa.
Bagabatongeera nga byanabuzi, neꞌbipanga, neꞌbihebe.
41 Yayewe! Akaaya keꞌBabeeri, kundu kâli kizi huuzibwa mu mahanga gooshi,
haliko buno, keera kagwatwa!
Ikyanya abandi bali mu bonaga ngiisi íbyakakoleka kwo, banakanguke.
42 Inyaaja, keera zikaheema, zanabwikira i Babeeri.
Na buno, imidunda ikola mu kundula hiꞌgulu lyayo.
43 Utwaya tweꞌBabeeri, bikola biguuka,
tunakoli ba ishamba íriyumagusiri, ndaanaye mundu úki tuuziri mwo,
kandi iri woꞌkulenga mwo.
44 «Gulya mugisi Beeri gweꞌBabeeri, ngaguhaniiriza.
Ngiisi byo gwâli kizi mira-mira, gugabishala.
Ibinyamahanga bitanâye ki guyijire.
Kiri neꞌnzitiro zeꞌBabeeri, zigahongoka.
45 E bandu baani, si ubute bwa Nahano bukoli kayiri!
Aahago! Muhuluke mu kaaya keꞌBabeeri.
Mutibitage, lyo mufuuka.
46 Ikyanya mugayuvwa kwo mwami muguma agendi teera uwabo,
mutakanguke, mutanatwike indege.
Mukuba, umwazi mwene yugwo, guli mu kizi yija ngiisi mwaka.
47 Ku kasiisa, ngola ngahaniiriza imigisi yeꞌBabeeri,
halinde ikihugo kyoshi kinateteerwe.
Ibirunda byaꞌbandu baamwo, bigalambama hooshi.»
Kwokwo, kwo Nahano adesiri.
48 Nahano ashubi detaga kwokuno:
«Ha nyuma, igulu neꞌkihugo, na byoshi íbibiri mwo, bigabanda akabuuli.
Mukuba, mu mbande zeꞌmbembe, mugahuluka abasirikaani,
banayiji shereeza i Babeeri.
49 «Balya Bababeeri, keera bakayita Abahisiraheeri,
kiri naꞌbandi bandu mu mahanga gooshi.
Kwokwo nabo, bakwaniini bayitwe.
50 Mwehe keera mukafuushuka, mutanayitwa.
Aaho! Mugirage mulyoke i Babeeri!
Mutanaki tindiirize!
Kundu mukoli tuuziri i mahanga, mukengeere Nahano,
mukengeere naꞌkaaya keꞌYerusaleemu.
51 «Mugweti mugaadeta, ti: “Twe Bayuda,
ibinyamahanga keera bikayifunda ahandu hataluule mu nyumba ya Nahano,
binali mu kizi tuhonyoleza.
Tukoli teziibwi ishoni, tunakoli tetiirwi bweneene.”»
52 Nahano adetaga kwokuno:
«Mu siku ízigayija, ngahaniiriza imigisi yeꞌBabeeri.
Abandu baayo, ikyanya bagakomeereka, bagabululuka ku bulyanirwe.
Amazu gaabo ganayuvwikane hooshi mu kihugo.
53 Akaaya keꞌBabeeri, kundu kanganunga halinde mwiꞌgulu,
banagire mbu basikamye inzitiro zaako, zibe ngomu,
halikago ngaki balungikira abagoma, bagendi kashereeza.» Kwokwo, kwo Nahano adesiri.
54 «Yuvwagwi! Mu kihugo kyeꞌBabeeri, abagoma bagweti bagashereeza bweneene.
Kyo kitumiri Abababeeri bakola mu bululuka!
55 Kalya kaaya keꞌBabeeri, ngola mu kashereeza,
halinde akaluulu kamale.
Ikyanya abagoma bagweti bagakateera,
bali mu lunduma nga midunda mikayu.
56 Ee! Abagoma bagweti bagateera i Babeeri.
Abasirikaani baamwo keera bagwatwa imbohe, banavunirwa imiheto yabo.
Nie Nahano Rurema. Ikyanya abandu bagweti bagaagira amabi, ndi mu bahana.
Kwokwo, ngabahana ngana, ukukulikirana naꞌmabi gaabo.
57 Yabo Bababeeri, ngalalusa abakulu baabo, naꞌbanabwenge baabo,
kiri naꞌbatwali baabo, na baguvuruneeri naꞌbasirikaani baabo.
Yabo booshi, bagagwejera mwiꞌro lyeꞌmyaka neꞌmyakuula, batanâye ki vyuke.»
Kwokwo, kwo Mwami adesiri, anali ye Nahano woꞌbushobozi bwoshi!
58 Nahano woꞌbushobozi bwoshi, ashubi detaga kwokuno:
«Yabo Bababeeri, kundu inzitiro zaabo ziryagagi mbamu,
haliko zooshi zigaki hongolerwa haashi,
neꞌnyiivi zaabo, nazo zinasingoolwe lwoshi!
Ehee! Kundu abandu beꞌbihugo bingi, bâli kizi kayubaka mwo, keera bahomba.
Kundu bâli kizi kayiluhya kwo, haliko, kagasingoolwa naaho.»
Yeremiya atuma indumwa ya Nahano imwa Bababeeri
59 Ku kyanya mwami Zedekiya akahisa imyaka ina atwaziri, anabalamira i Babeeri kuguma noꞌmulemberezi wage Seraya mugala Neriya, mwijukulu Mahiseya. Kwokwo uyo Seraya, nie Yeremiya nanamúheereza indumwa, kwo agindwalire iyo munda. 60 Iyo ndumwa yâli yandisirwi mu kitaabo. Na mu yikyo kitaabo, nâli yandisiri mwoꞌbuhanya bwoshi úbwâye koleke ku Bababeeri. Amagambo gooshi go nâli looziri hiꞌgulu lyeꞌBabeeri, go ganâli yandisirwi mwo.
61 Nꞌgabwira Seraya kwokuno: «Ino ndumwa, ikyanya ugaahika i Babeeri, ukwaniini ukugisomera abandu booshi. 62 Ha nyuma, unahuunage Rurema kwokuno: “E Nahano! Ukagwanwa wadeta kwo ugashereeza hano handu, halinde hataki tuule abandu, kandi iri bindi biremwa. Si kino kihugo kigajandwa, kinasigale ngiꞌshamba halinde imyaka neꞌmyakuula!”
63 «Kino kitaabo, mango wayusagya ukubasomera kyo, ugakishwekera kwiꞌbuye, unakitibulire mu lwiji Hefuraati, 64 unababwire kwokuno: “Ikihugo kyeꞌBabeeri, kigaazika kuguma naꞌbandu baamwo, kitanâye ki shubi yulubuka. Mukuba ubuhanya bwo ngakileetera, bugaaba buhamu ngana-ngana!”»
Amagambo ga Yeremiya, hano ho gamaliiri.