3
Hayubu agania
1 Iri hakatama, Hayubu anadaaka ulusiku lwo akabutwa kwo, 2 anadeta kwokuno:
3 «Bulya bushigi bakadeta: “Umukazi aheeka inda yoꞌmwana mutabana.”
Aahabi! Bulya bushigi buhotolwe, kuguma noꞌlusiku lwo nꞌgabutwa kwo.
4 Yulwo lusiku, luzingwe neꞌkihulu.
Rurema, kwo ayamiragi mwiꞌgulu, ataki lutwaze.
Hatanabe kiri neꞌhikeera íhigalumolekera.
5 Yulwo lusiku, luyizingage mweꞌkihulu kya namudidi.
Ikibungu kiiru kilubishe, halinde ikihulu kilubwikire.
6 «Ee! Yubwo bushigi bwo nꞌgabutwa kwo, ikihulu kilubwikire.
Lutanâye ki haruurirwe mu siku zoꞌmwaka.
Kiri na mu muharuuro gweꞌsiku zoꞌmwezi, lutâye ki boneke mwo.
7 Yubwo bushigi, bubulage abaana.
Batanakizi banda akabuuli hiꞌgulu lyabwo.
8 Ngiisi ábali mu daakana, bakizi ludaaka.
Yago madaaki, gakizi vyula ikingisho-ngisho Levyataani.
9 Yulwo lusiku, indonde zoꞌmukyo, zibeerage mu kihulu.
Kundu lwangayifwija ukubona ulukeera, haliko lubulikage.
Lutabonage ngiisi kwo lukula agaatema.
10 Yulwo lusiku, si lukambanguula kwo mbutwe.
Lwanahanguula kwo mbone yaga makuba gooshi-gooshi.
11 «Ikyanya nꞌgahuluka mu nda, kituma kiki ndakayami fwa?
Si nangabutwa, ngoli fwiri!
12 Kituma kiki maawe akandengeteera ha kambokwa?
Na kituma kiki âli gweti agakizi nyoza?
13 Íngifwe mu kubutwa, nangayigwejeriiri i kuzimu ku mutuula.
Nangabiiri ngwejeriiragi bwija, na nduhuuke.
14 Nangabiiri nduhuusiri kuguma naꞌbaami, bo naꞌbagingi ba mu kihugo.
Kundu bâli yubasiri inyumba mbamu, haliko buno bikolaga biguuka.
15 Nangabiiri ngwejiiri kuguma naꞌbatwali.
Bâli hiiti inooro katundu, banâli kizi lunda iharija mu nyumba zaabo.
16 Kituma kiki ndakaziikwa ngoꞌmwana úkabutwa akoli fwiri,
atanatami bona ulukeera?
17 «Banangora-mabi, ikyanya bali mu ba keera bafwa,
batakiri mu libuzania.
Kiri na ábagweti bagahimbukira ku mukolwa gwabo,
bali mu longa ukuluhuuka.
18 Abashweke nabo, ikyanya bali mu fwa, bali mu ba baluhuuka.
Abimangizi baabo, batakiri mu bamamira.
19 Abakulu naꞌbato, booshi bagwejiiri kuguma.
Kiri naꞌbaja, basheebuja batakiri mu bakoleesa ku kahaati.
20 «Ikyanya umundu ali mu makuba,
kituma kiki yulwo lusiku buli mu múkyera.
Ábayuvwiti ubululu mu mutima, kituma kiki bangabona umulengeerwe?
21 Yabo bandu, kundu bayifwijiri ulufu, haliko batali mu lubona.
Bagweti bagalooza ukufwa, ukuhima ho bangalonga ibindu biija íbibishamiri.*3.21 Bwigule 9.6.
22 Ikyanya bali mu fwa, banaziikwe,
lyo bali mu shambaala.
23 Aahago! Kituma kiki umundu angabutwa, atanabe noꞌbulyo bwoꞌkugenduukirwa?
Si Rurema yenyene agweti agamúhanga-hanga!
24 «Niehe, ho nangalya, ndi mu gongeera naaho.
Yikyo kigongeero, kigweti kigajalabanda nga miiji.
25 Ngiisi byo nâli yobohiri, byebyo byo bikangoleka kwo.
Na íbiri mu tuma ngapaapa, byo binali mu koleka.
26 Ndakiri mu tuuza, ndanaki hiiti umutuula.
Ikyanya nangaluhuusiri, ingerania naaho, zo ziri mu ndeera.»