Ikitolo kya mbere kyeꞌMiganuulo
4
(4.1–14.22)
Amagambo ga Herifaazi
1 Iri hakatama, Herifaazi wa mu kihugo kyeꞌTemaani anashuvya Hayubu kwokuno:
2 «Nakuhuuna unyigenderere, gira ngubwire igambo.
Nyandi úwangayizibira, mbu atadete?
3 We wâli kizi yigiriza abandu bingi.
Aaho! Naawe, uyuvwirizagye.
Si ikyanya abandu bâli yiyuvwiti ubukaholwe,
wanakizi bakania indege.
4 Neꞌkyanya bâli kola bagaagwa, amagambo gaawe ganabasikamya.
Neꞌkyanya bakatwika indege, wanabakania zo.
5 Si wehe, ikyanya walonga amakuba, wanayami vunika umutima.
Yago makuba, bwo naawe gakuhuma kwo, wanayami yoboha.
6 Aahago! Ikyanya usimbahiri Rurema, ka utangayikania mu mutima gwawe?
Ikyanya ugweti ugakulikira ukuli, ka kutangakubiika mwoꞌmulangaaliro?
7 Kengeeraga bwija! Abandu bazira buhube, ka bali mu yitwa?
Kandi iri abandu ábatungiini, ka bali mu minikwa? Nanga maashi!
8 Keera nꞌgabona kwo ábali mu byala ubuligo, noꞌbubi,
byo na byebyo, bali mu yiji yimbula.
9 Yabo bandu, Rurema ali mu bafuuhira umuuka gwage, banayami fwa,
banakumbululwe noꞌburaakari bwage.
10 Banangora-mabi, kundu bagweti bagalunduma nga ndare,
haliko amiino gaabo, gagaki rohorwa.
11 Iyo ndare, ikyanya igaabula ibyokulya, lyo igaafwa.
Abaana baayo, haaho lyo bagasambarazibwa.
12 «Lusiku luguma, nꞌgayuvwa izu lyoꞌbumbishwa.
Yiryo izu, lyanayingira mu kutwiri kwani, mu kahwehwe.
13 Bwâli riiri bushigi, ikyanya abandu bali mu loota ibirooto,
ikyanya iro lyaꞌkahondo-hondo liri mu bahuniza.*4.13 Hayubu 33.15.
14 Haaho, nanayami gwatwa neꞌkyoba, nanatondeera ukujuguma.
Amavuha gaani gooshi, ganalenga mweꞌkinyukura.
15 Hanayija umuzimu, gwanandenga i malanga,
kyanatuma ulwoya lwaꞌmagala gaani lugayami yimanga.
16 Yugwo muzimu, gwanayimanga imbere lyani.
Haliko, iri nꞌgaguyitegeereza, ndanatami gumenya.
Injusho yagwo yanabeera imbere lyani.
Hanatee ba umunyerere, nanabuli yuvwa izu, ti:
17 “Abandu boꞌkufwa, ka bangaboneka kwo bali noꞌkuli imbere lya Rurema?†4.17 Kandi iri ukukinga Rurema.
Ikyanya bakola imbere lyoꞌMulemi wabo, ka bangaboneka kwo bayeruusiri?
18 Rurema atayemiiri kiri naꞌbaganda baage.
Si ali mu balega ku mahube gaabo.
19 Aahago! Ka itali yo haahe kwo atangamùyemeera mwe bandu ngana,
munali ba kufwa naaho?
Abandu bali mu bumbwa mu luvu,
banali mu vungulwa nga hishumbugulu.
20 Shesheezi, abandu bali mu ba bakiri bagumaana.
Haliko kabigingwe, banabe keera bafwa.
Yabo bandu, bali mu ba bazimiiri lwoshi-lwoshi.
21 Imigozi íshubi gwasiri amaheema gaabo,
iri mu ba keera yashwekuulwa, banayami fwa mu buhwija.”»