5
«E Hayubu, kundu wangalooza ukuberangira, si ndaaye úgakuyakula!
Kiri naꞌbaganda, batangakushuvya.
 
«Umuhwija, ikyanya ali mu yuvwa inzigo, iri mu múyita.
Neꞌbizeeze, ikyanya biri mu yuvwa uluugi, luli mu yami baminika.
Yabo bahwija, keera nꞌgabona ngiisi kwo bakatee genduukirwa.
Kundu kwokwo ha nyuma, idaaki liri mu baleetera inguuke ho batuuziri.
Abaana baabo, batali mu tabaalwa.
Ikyanya bali mu yibulanira, bali mu bonerwa naaho,
ndaanaye mundu woꞌkubadetera.
Ikyanya bali mu longa imimbu, abanamwena bali mu yami gimirangusa,
kundu iri mu kula mu mishuugi.
Kundu bangaba bali noꞌbugale, abanabwifwije bali mu yiji banyaga bwo.
 
«Nga kwo bituula, amalibu, naꞌmagoorwa,
bitali mu mera mu luvu.
Halikago abandu boohe, bali mu butwa hiꞌgulu lyaꞌmalibu,
nga kweꞌshashala ziri mu yilasha hiꞌgulu.
 
«Íngibe nie wehe, njuba ngatabaaza Rurema.
Igoorwa lyani, Rurema ye nangalilubuliiri.
Ye mu kola ibya kahebuuza,
binali kandaharuurwa.
10 Ali mu niekeza idaho invula,
ananywise neꞌndalo.
11 Ngiisi ábali bakeni, ali mu bakuza.
Na ábali mu kimombo, ali mu balanga mu mutuula.
12 Ikyanya abandu babi bali mu gira ishungi, ali mu zihongola,
gira imikolezi yabo, itakengeere yabagenduukira.
13 Abanabwenge, ali mu bagwakiza mu bulyalya bwabo,
Ishungi zaabo, ali mu yami zihangirira.* 5.13 1 Bakorindo 3.19.
14 Yabo banabwenge, bali mu zingwa neꞌkihulu, munakiri mwiꞌzuuba.
Bali mu mamaata mu kalenge-renge, nga kwo bangamamaata bushigi.
15 Ikyanya abakeni bali mu gambirirwa, Rurema ali mu bakiza.
Anali mu balyosa mu maboko gaꞌbanamisi.
16 Banakahuku bali mu ba noꞌmulangaaliro.
Si ábali mu lyalyania, boohe, ali mu bafumba akanwa.
 
17 «Bahiriirwi, ngiisi bo Rurema woꞌBushobozi Bwoshi ali mu yerekeza.
Ku yukwo naawe, ikyanya ali mu kuyerekeza, utamúgayirize. 5.17 Migani 3.11; Baheburaniya 12.5, 6.
18 Mukuba, kundu ali mu komeresania, haliko, ali mu shubi buka.
Na kundu ali mu leeta ubulyaniirwe, haliko anashubi kiza. 5.18 Hosheya 6.1.
19 Ikyanya walonga amakayu, agakizi kukiza ubugira kalindatu.
Agakulanga, kiri ubugira kalinda.
20 Ikyanya kyoꞌmwena, agakufuusa mu lufu.
Neꞌkyanya kiꞌzibo, utagaki gujikwa neꞌngooti.
21 Ikyanya abandu bagakugamba, ugalangwa ngana-ngana.
Na kundu bangayiji kuteera, wehe, utagaki yoboha.
22 Kundu bagateerwa noꞌmwena, banashereezibwe,
haliko wehe, ugaasheka naaho.
Ikyanya inyamiishwa ndangi zigazunguluka, utagaki yoboha.
23 Kundu amabuye gangabiiri mu ndalo, utagagooka.
Kiri neꞌnyamiishwa ndangi, mugabeeranwa mu mutuula.
24 Inyumba yawe, itagateerwa.
Neꞌkyanya ugakizi tanduula ibindu byawe, ugagwana byoshi biri ho.
25 Ugaabuta abaana bingi,
banaluguuke nga byasi kwiꞌdaho.
26 Ikyanya ugaafwa, unaziikwe, ugaaba ukola mushaaja weꞌmyaka íkwiziri.
Ugaaba ngoꞌmuhuli gweꞌngano, ku kyanya guli mu yimbulwa.
 
27 «Yibyo byoshi, keera tukayitegeereza, twanabona kwo biri kwokwo.
Aahago! Yago mahano gaani, ugayuvwirize bwija, unagendi gakulikiriza.»

*5:13 5.13 1 Bakorindo 3.19.

5:17 5.17 Migani 3.11; Baheburaniya 12.5, 6.

5:18 5.18 Hosheya 6.1.