6
Ishuvyo lya Hayubu
1 Ha nyuma, Hayubu anashuvya Herifaazi kwokuno:
2 «Ubulyanirwe bwani, iri bangabulingaania,
banabubiikage ku lugero,
3 bwangabiiri buzito bweneene, kiri ukuhima umushenyu gwoshi úguli ku nyaaja.
Kyo kitumiri nꞌgadeta amagambo mazira kamaro.
4 Rurema woꞌbushobozi bwoshi, imyambi yage keera yamberuuza mwo
yanandula-ndula mu mutima gwani.
Amakenya gaayo, keera gahika mu mutima gwani, na ngoli kangusiri.
5 «Aaho! Punda wa mwiꞌshamba, kiri neꞌngaavu,
ikyanya biri mu bula ibyasi, ka bitali mu yana?
6 Na kwakundi, ibyokulya íbitaheshiri, bitangaliibwa, buzira kutee bilunga.
Kiri neꞌkihande kyeru kiꞌgi, abandu batali mu kisara.
7 Ibyokulya mwene yibyo, imwani gukola muziro.
Biri mu yagazania bweneene.
8 «Aahago! Ikyanya ndi mu huuna Rurema, bwangabiiri buhiirwa, ndonge ishuvyo.
Ngiisi byo ndi mu biika kwoꞌmulangaaliro, angabimbiiri.
9 Emwe! Nangaloziizi kwo anganvuta-nvuta.
Angagolwiri ukuboko, anayami nyita.
10 Kundu ngoli lyaniirwi, nangaholeziibwi mu kumenya
kwo ndazi nana amagambo ga Rurema, ulya Mutaluule.
11 «Halikago buno, ndaki hiiti imisi yoꞌkugenderera.
Na bwo ndahiiti umulangaaliro, kutagi kwo nangalonga ukugooyera?
12 Imisi yani, si itali mikomu nga mabuye!
Kiri naꞌmagala gaani, si gatali makomu ngoꞌmulinga!
13 Buno ndahiiti ubushobozi bwoꞌkuyitabaala,
ndaki hiiti ubulyo bwoꞌkuyigenduusa.
14 «Umundu, ikyanya ashenguka, mwira wage akwiriiri amúgirire bwija.
Halikago mwehe, mugweti mugandega kwo ndasimbahiri Rurema woꞌbushobozi bwoshi.
15 E biira baani, si mugweti mugandeba naaho!
Mulyagagi nga lwiji úluli mu yijulira,
16 ku kyanya kyoꞌmunjogi-njogi
hiꞌgulu lyoꞌlukungu úluli mu tumuuka ku migazi.
17 Halikago, ikyanya kyeꞌkikamo, lwolwo lwiji luli mu yami kama.
Kiri neꞌkyanya kiꞌzuuba likayu, luli mu yumaguka.
18 Ababalama, bali mu yiji looza amiiji,
haliko, ikyanya bali mu gwana amiiji ndaago, banayami fwa.
19 Yago miiji, ababalama beꞌTema bali mu galooza-looza,
Ababalama beꞌSheeba balindiriiri ukugabona.
20 Kundu kwokwo, yugwo mulangaaliro gwabo, gulyagagi gwa busha.
Ikyanya bali mu hika ho, bali mu yinyanyaga haashi.
21 «Kiri na niinyu, ndaabwo butabaazi bwo namùlonga kwo.
Keera mwabona ubuhanya bwani, munakoli yobohiri.
22 Aahago! Si ndaayo mbembo yo namùhuuna!
Ndamùhuuniri kwo mutange ku bindu biinyu, gira munguluule.
23 Ndanamùhuuna kwo mungize mu maboko gaꞌbagoma,
kandi iri mbu munguluule mu maboko gaꞌbiitani.
24 Aaho! Munyigirizagye, halinde lyo mbulika.
Munyereke ngiisi kwo nꞌgahuba.
25 Amagambo goꞌkuli, kundu gali mu lyaniisa,
haliko gali mu tabaalana.
Si imikambo yinyu, ndaabyo iri mu gira!
26 Amagambo gaani, si mugweti mugagabona nga mbuusi naaho!
Aahago! Ka munaloziizi ukugagolola?
27 Si mwehe, mwangaguliisa ifuuvi mu buja!
Mwanganaguliisa kiri na mwira winyu.
28 «Aahago! Mundole kwo, mwe mukongwa.
Ka nangayami beesha imbere liinyu?
29 E maashi! Mulekage ukutona kwo nagira ubuligo.
Si ndaabwo nagira.
30 Ka mutoniri kwo nabeesha?
Aahago! Ka ndasobanukiirwi noꞌkuli, neꞌbibeesha?»