7
1 «Ngiisi mundu ahiiti amagoorwa mingi mu kihugo.
Tugweti tugayitubanula ngoꞌmukozi weꞌmbembo.
2 Tunali nga baja ábayifwijiri ikimbehwa,
na ngoꞌmukozi úgweti úgalindirira kwo ahembwe.
3 Naani, keera nahisa imyezi mingi ndyagagi mu makuba.
Nyamiri ndi mu libuuka ubushigi ku bundi.
4 Ikyanya ndi mu gwejera, na nyitoneese, ti:
“Ngavyuka kyanya kiki?”
Kundu kwokwo, yubwo bushigi buli mu tinda ngana.
Ngweti ngagaaya-gaaya ku ngingo halinde umukyo.
5 Amagala gaani, gayijwiri mweꞌbitwera.
Uluhu lwani, keera lwagaaguka, lunakola mu hunguluka mwaꞌmasira.
6 Isiku zaani, ziri mu lenga duba-duba,
ukuhima umulindi gwoꞌtuti twoꞌkuluka mweꞌmirondo.
Ee! Isiku zaani, ziri mu mala duba.
Noꞌmulangaaliro, ndaakigwo.
7 «E Rurema, kengeera kwoꞌburambe bwani guli muuka naaho.
Ndagaki bona isiku nyiija.
8 Kundu abandu bakiri mu mbona, haliko batagaki shubi mbona.
Kundu mundooze, haliko ndagaaba ngiri ho.
9 Nga kweꞌkibungu kiri mu fwifwitira, kinazimiire,
kwo na kwokwo, ngiisi ábagaafwa, batagaki shubi galuka.
10 Yabo bafwiri, batâye ki galuke, batanâye ki boneke.
11 «Ku yukwo, ndangaki hulika.
Si ngayerekana naaho ngiisi kwo ngoli shengusiri.
Bwoꞌmutima gwani gukoli lyaniirwi, ngagenderera ukuyidodomba.
12 Ndali kihuume kyeꞌnyamiishwa, ndanali kingisho-ngisho kyoꞌmujoka.
Aahago! Kituma kiki mugweti mugambiikira umulaliizi?
13 Ngweti ngayitoneesa, ti: “Ingingo, igamboleeza.
Ikyanya ngahunira, lyo ndagaki libuuka.”
14 Kundu kwokwo, ugweti ugandeera ikyoba mu birooto,
Neꞌkyanya uli mu nyereka amabone,
uli mu ndeeza mweꞌkinyukura.
15 Ho nangagenderera ukulibuuka kwoku,
ngoli bwini kwo nangamanisirwi, ninayami fwa.
16 Ngoli shombiri uburambe bwani, ndanaki loziizi kwo nduule ho.
Mundeke, maashi! Si isiku íziki nzigaliiri, ziri nga ndaakizo!
17 «Twe bandu, kituma kikagi uli mu tutwaza?
Kituma kiki uli mu tuhahalira?*7.17 Zaburi 8.4; 144.3.
18 Si ugweti ugayiji tutanduula ngiisi shesheezi,
iri unatugeza ngiisi kyanya!
19 Aahago! Kituma kiki utangandekeerera?
Utee ndeka, ndonge ukumira amate.
20 E mulaazi waꞌbandu, nga nangakoziri ibyaha, bikugooziri biki?
Kituma kiki uli mu hidika mu kukizi ndibuza?
Aaho! Ka ukoli yuvwiti kwo keera nakuzidohera?
21 Kituma kiki utangangejeerera ibyaha byani,
unayami koga ubuligo bwani?
Hinyerere hiniini naaho, ngayifwira, na mbiikwe i kuzimu.
Ikyanya ugandooza, ndagaki ba ho.»