10
1 «Ngoli shombiri uburambe bwani.
Kwokwo, leka nyidodombe buzira kuhangirirwa.
Bwoꞌmutima gwani gukola mwoꞌbululu, ngwiriiri ndetage.
2 Ngabwira Rurema: “Utalunguli ndwira ulubaaja kwo nahuba.
Haliko, utee mmenyeesa ngiisi byo wandega kwo.
3 Ikyanya uli mu ndibuza, uli mu yunguka biki?
Kituma kiki uli mu ndahira, na wenyene we kambumba?
Si banangora-mabi boohe, ikyanya bali mu gira igambi libi, uli mu siima!
4 Amasu gaawe, ka gali mu ba ngaꞌmasu goꞌmundu?
Ka uli mu bona naaho, nga kwoꞌmundu ali mu bona?
5 Isiku zaawe, ka ziri nyoofi ngeꞌzeꞌmwitu?
Neꞌmyaka yawe, ka iri myofi kwakundi?
6 Aaho! Kituma kiki uki gweti ugakulikiriza ubuligo bwani?
Si ugweti ugabuloleekeza bweneene!
7 Uyiji-yiji kwo ndagweti buhube.
Kundu kwokwo, ndaanaye úwangangiza mu maboko gaawe.
8 «“Yago maboko gaawe, go gakandema.
Kundu kwokwo, buno, ukola mu njereeza lwoshi-lwoshi.
9 We kongwa we! Ukengeere kwo ukandema mu luvu.
Aaho! Ka ugalunguli ngalulira mwo duba-duba?
10 Si we kambumba mu nda ya maawe,
nga ábali mu tunda amavuta mu mata?
11 We kananika amavuha gaani, neꞌmisi yani.
Yago mavuha, wanagabwikira neꞌminyofu noꞌluhu.
12 We kanambiika mwoꞌbugumaana, wanakizi ngunda.
Wanakizi ndanga, iri unanguya-nguya.
13 «“Kundu kwokwo, wâli njungikiiri agandi-gandi magambo.
Ee! Kwokwo, kwo ukagwanwa watona.
14 Wâli kizi lindirira ulole iri ngaagira ibyaha.
Neꞌkyanya nꞌgagira buligo, utanalooza ukungoga.
15 Iri nangaba ndi nangora-mabi, yayewe imwani.
Kandi iri nangaba ndi woꞌkuli, ndashobwiri ukuyihuuza.
Mukuba, nyijwiri mweꞌshoni, na ngola mu libuuka bweneene.
16 Iri nangayinamula itwe naaho, uli mu yami mbiiva nga ndare,
unakoleese ubushobozi bwawe bweꞌkitangaaza mu kumbangirira.
17 Uli mu leeta utumasi twoꞌkukizi ndega.
Unali mu nyonera kwoꞌburaakari bwawe,
iri unaleeta abasirikaani bahyahya boꞌkuyiji ndeera.
18 «“E Rurema, kituma kiki ukandyosa mu nda ya maawe?
Nangasiimiri kwo nvwe, abandu bátazi mbona.
19 Nâli ngatwalwa iwa shinda,
na mbe ngoꞌmundu útaba ho.
20 Ngoli hiiti isiku niini naaho, mbuli fwa.
Aaho! Undekage, ndee longa ukuholeezibwa.
21 Ngola ngalyoka, ngende mu kihugo kyeꞌkihulu kya namudidi.
Ndanâye ki shubi galuka.
22 Yikyo kihugo, kiyidisiri mweꞌkihulu ngana-ngana.
Kiri mwoꞌmwizingeerwe naꞌkalugi.
Iyo munda, kiri ulukeera lwayo luli kihulu namudidi.”»