11
Amagambo ga Sofaari
1 Haaho, Sofaari weꞌNahama anashuvya Hayubu kwokuno:
2 «Bwo ugweti ugalomboojera bweneene, tukwiriiri ukukushuvya.
Aaho! Koꞌmundu angayerekana kwo atahiiti ubuhube, mbu bwo ali mu lomboojera?
3 Bwo ugweti ugalomboojera, ka kyo kitumiri ngahulika?
Ikyanya ugweti ugashekeereza Rurema, abandu bakwiriiri bakubonie ishoni.
4 Si wadeta, ti: “Ngiisi go nyemiiri, gakwaniini.
Na ndi mweru imbere lya Rurema.”
5 «Ewe! Bwangabiiri buhiirwa Rurema akubwire igambo,
anakubwire ngiisi kwo atoniri.
6 Angakumenyesiizi ngiisi kwoꞌbwitegeereze bubishamiri.
Mukuba, ubwitegeereze nirizina, buli mu ba bubishamiri bweneene.
Yuvwagwa! Kundu Rurema agweti agakuhana buniini,
haliko kutali kwa bweneene, nga kwo ukwaniini.
7 «Ngiisi byo Rurema abishiri, ka wangabibishuula?
Ka wangasobanukirwa hiꞌgulu lya Rurema woꞌbushobozi bwoshi?
8 Wehe uli nyandagi?
Ubumenyi mwene yubwo, buleeziri igulu bweneene,
bunayisiri neꞌkuzimu bweneene.
Aaho! Naawe, uyijagi biki?
9 Yubwo bumenyi bwage, buli noꞌbula-bula ukuhima bulya bweꞌkihugo.
Buli noꞌbutambi-tambi ukuhima bulya bweꞌnyaaja.
10 «Nga Rurema angatuyijira, analashe umundu mu mbohe,
kandi iri amúlegere imbere lyaꞌbatwi beꞌmaaja,
nyandi kandi úwangamúhangirira?
11 Si Rurema ayiji ngiisi ábali balyalya,
anabwini ibyaha byabo byoshi.
12 Punda wa mwiꞌshamba, bitangaziga kwo angabuta umundu.
Kwo na kwokwo, bitagaaziga kwaꞌbahwija bahinduke bitegeereza.
13 «E Hayubu, ukwaniini usikiirize umutima gwawe imwa Rurema,
unalengeze amaboko gaawe, mu kumúhuuna.
14 Ulashe ibyaha byawe hala,
halinde binasigale mu mbinga.
15 Lyoki, lyo wangayinamula amalanga gaawe buzira shoni,
unabe ujingiriiri, buzira kuteerwa neꞌkyoba.
16 Haaho, ugayibagira amakuba gaawe gooshi,
si gagakizi ba nga migezi keera íkalenga.
17 Uburambe bwawe, bugalangashana ukuhima izuuba lya kalenge-renge.
Kiri neꞌkihulu, kigatanguula nga mukyo.
18 Bwo ugaaba ukoli hiiti umulangaaliro, ugaaba ukaniziizi umutima.
Ugakizi langwa, iri unakizi luhuuka mu mutuula.
19 Neꞌkyanya ugakizi gwejera, utagateerwa noꞌmundu yeshi.
Abandu bingi bagakizi yiji kutabaaza.
20 Si banangora-mabi boohe, amasu gaabo gagaahuma.
Banabule ubulyo bwo bangatoloboka mwo.
Umulangaaliro gwabo naaho, mbu bafwe ngana.»