12
Ishuvyo lya Hayubu
1 Haaho, Hayubu anashuvya kwokuno:
2 «Si mutoniri kwo mwe muyiji byoshi!
Mbu neꞌkyanya mugaafwa, lyoꞌbwitegeereze nabwo bugaaba bwahera lwoshi.
3 Kundu kwokwo, naani nyiji amagambo maguma-maguma.
Si mutali biija ukumbima!
Aaho! Yaga gooshi go mwadeta, si ngoli gayiji.
4 «Kundu kwokwo, abiira baani bagweti baganjekeereza.
Mukuba, ikyanya ndi mu huuna Rurema,
ndi noꞌmulangaaliro kwo ngalonga ishuvyo.
Ndi mundu woꞌkuli. Ndaanabyo byaꞌbandu bangandega kwo.
Kundu kwokwo, bagweti baganjekeereza naaho.
5 Abandu ábakoli jeberiiri, bali mu gayiriza abanamakuba.
Ikyanya abaabo bali mu tyerera, bali mu basindikira, mbu bagwe haashi.
6 Kiri naꞌbanyazi, batuuziri mu mutuula.
Kundu bali mu shomboroza Rurema, si bakiri noꞌbutoge.
Batoniri kwo Rurema ali mukozi wabo naaho.
7 «Abandu, bagweti bagaadeta kwokuno: “Ubuuzagye inyamiishwa, gira zikuyigirize.
Ubuuze noꞌtunyuni, tukuganuulire.”
8 Udese neꞌfwi mu nyaaja, zinakumenyeese.
Kandi iri, ubuuze ikihugo, kinakuyerekeze.
9 Mukuba, yabo booshi, bayiji-yiji kwo Nahano andeetera amakuba.
10 Si Rurema naaho ye hiiti ubulamu bwa ngiisi kiremwa mu maboko gaage,
kuguma noꞌmuuka gwa ngiisi mundu.
11 «Ikyanya umundu ali mu yuvwa igambo, ali mu ligeza,
nga kwoꞌlulimi luyamiri luli mu labula ibyokulya.
12 Abashaaja, bo bahiiti ubwitegeereze,
banali mu sobanukirwa naꞌmagambo mingi.
13 Kundu kwokwo, ubwitegeereze noꞌbushobozi nirizina biri byeꞌmwa Rurema naaho.
Ye mu hanuula ku njira nyija, anali mu sobanukirwa.
14 Ngiisi byo Rurema ali mu hongola, ndaaye úwangashubi biyubakulula.
Neꞌri angalasha umundu mu mbohe, ndaaye úwanga múshwekuuza.
15 Nga angahangika invula, itangaki nia.
Neꞌri angagihangamula, ikihugo kinalonge imigezi.
16 Rurema, ye mwene imisi noꞌbwitegeereze.
Abatebani, na ábali mu tebwa, ye mwene bo booshi.
17 Kundu abandu bangaba bali bahanuuzi,
ali mu batwala mu mbohe.
Kiri naꞌbatwi beꞌmaaja, ali mu bahindula babe bahwija.
18 Ali mu hogola abaami amakanju gaabo malimbiise,
akabuli bashweka imigozi mu bibuno, noꞌkubatwala mu buja.
19 Ali mu hogola ibyambalwa byaꞌbagingi, banalyosibwe bali bukondwe.
Na kundu abakulu bangaba batwaziri imyaka mingi,
haliko ali mu bashaaza mu butwali bwabo.
20 Umuhanuuzi naye, kundu angayemeerwa, haliko Rurema ali mu múhulisa.
Kiri naꞌbashaaja, ali mu bashaaza ubwitegeereze bwabo.
21 Kundu umundu angaba ali mukulu, ali mu mútetereza.
Kiri naꞌbanamisi, ali mu banyaga isiribo zaabo.
22 Kundu amagambo gangabishama mu kihulu, ali mu gabishuula.
Kiri naꞌmabanga, ali mu gabiika ha bweruula.
23 Ali mu tee yubaka ibihugo, anashubi bishereeza.
Ali mu tee bihamya, anashubi bishaabula.
24 Kundu abaami bangasobanukirwa, ali mu bagira bahwija,
anabasige bali mu jeba-jeba mwiꞌshamba lizira njira.
25 Yabo baami, bali mu mamaata mu kihulu, buzira kubona umulengeerwe.
Anakizi bajugumbania nga balalwe.»