13
Ishuvyo lya Hayubu lyagenderera
1 «Yuvwa! Yago magambo gooshi, keera nꞌgagabona naꞌmasu gaani,
nanagayuvwa naꞌmatwiri gaani. Na buno, ngoli gasobanukiirwi.
2 Ngiisi byo muyiji, naani mbiyiji ma!
Mutanzumbiri kiri neꞌhiniini.
3 Nangaloziizi ukuganuuza Rurema woꞌbushobozi bwoshi.
Nanganasiimiri ukuyibulanira imbere lyage yenyene.
4 Kundu kwokwo, mugweti mugabeesha hiꞌgulu lyani.
Si mweshi muli mifoolwa yaꞌbafumu.
5 Nga mwangatee hulisiri,
lyoki, mwangabiiri bitegeereza nirizina.
6 «Yuvwirizagi ngiisi kwo ngweti ngayibulanira,
munyuvwirize ngiisi kwo ngaadeta naꞌkanwa kaani nienyene.
7 Mutakwiriiri ukudeta íbitali nga byo, kwiꞌziina lya Rurema.
Mutangadeta ukuli kwage, mu kukizi deta ibibeesha.
8 Mutakwiriiri ukukundirira Rurema.
Mutanakwiriiri ukumúbulanira.
9 Iri angayiji mùloleekeza, hali ikyanya mutangaki gashaanirwa.
Mutangahenda Rurema, nga kwo muli mu henda abandu.
10 Iri mwangamúkundirira ku bumbishwa,
si mugayiji yikululira umwama!
11 Ubulangashane bwage, ka butamùteeziri ikyoba?
Ka mutangagwatwa neꞌkihuumula hiꞌgulu lyage?
12 Imigani yo muli mu tyabiriza, iri neꞌkishingo nga kyoꞌmunyota-kiiko.
Ukuyibulanira kwinyu, kwangayami yibumbulika nga luzitiro luyubake neꞌbidaka.
13 «Muhulikage maashi, gira naani ndete.
Ngiisi íbigangoleka kwo, kwo na kwokwo.
14 Ngiisi kwo ndoniri, kwo nganadeta,
kundu kwangaba kuhebuura uburambe bwani.
15 Kundu Rurema anganyita, ngamúbiika kwoꞌmulangaaliro.
Ngayitanga, mu kuyibulanira imbere lyage.
16 Ee! Bwo ndaaye nangora-mabi úwangayimuka imbere lyage,
kwokwo, kwo ngakizibwa.
17 Yuvwirizagi amagambo gaani ku bwitonde.
Mundegage amatwiri, gira munyuvwe bwija.
18 Keera nalingaania amagambo gaani, nga kwo bikwiriiri.
Nyiji kwo bagaatwa ulubaaja kwo ndaabyo byaha nagira.
19 Nyandi ye tugabuulana twe naye?
Iri wangayerekana kwo nahuba, ngahulika, na nvwe.
20 «E Rurema wani, we kongwa we! Iri wangambeereza naaho gano magambo gabiri,
haaho ndagaki bishama imbere lyawe:
21 Bwoꞌkuboko kwawe kugweti kuganjulika, ukundyokeze,
utanakizi ki nyobohya ku bulangi bwawe.
22 Unganuuze, naani ngakushuvya.
Kandi iri, uleke mbe nie gakuganuuza, halinde naawe unjuvye.
23 Umbwirage ngiisi kwo nahuba.
Unanyereke ubuhube bwani neꞌbyaha byani.
24 Utakizi mba ingoto.
Utanakizi ngolera nga mugoma wawe.
25 Si ndi naaho nga kyasi íkiri mu yehuulwa neꞌmbuusi!
Aaho! Ka wangalandiriza ihikere íhikoli yumiri?
26 Ugweti ugandega ku birego bilangi,
iri unashubi vyula ibyaha byoshi bya mu busore bwani.
27 Ugweti uganjweka iminyororo ku magulu,
unagweti ugaloleekeza ngiisi ho ndi mu genda,
mu kubiika akalangikizo ku shando zaani.
28 Na ngweti ngaahera nga kiti íkiri mu bola,
na nga mulondo keera úgwaliibwa naꞌkashwa.»