16
Ishuvyo lya Hayubu
1 Ha nyuma, Hayubu anashuvya kwokuno:
2 «Yago magambo gaawe gooshi, keera nagayuvwa.
Si ukuholeezania kwinyu kulyagagi kwa busha!
3 Ka mutâye yuse ukulomboojera ulundatwika?
Aahago! Biki íbitumiri muki gweti mugaadeta?
4 «Múkibe nga ngiisi kwo ngoli ba,
naani nangashobwiri ukudeta gaago magambo giinyu.
Nangashobwiri ukumùshokoora, iri nanjagania itwe.
5 Kundu kwokwo, niehe, njuba ngamùkania umutima.
Nangamùholeziizi, mu kumùluhuusa.
6 «Haliko, iri nangadeta, amalibu gaani gatali mu mala.
Neꞌri nangahulika, ngiri mu gaago-gaago malibu.
7 E Rurema, si keera wanvungula,
wanashereeza imbaga yani yoshi!
8 Keera wanjebeesa, ndanaki kaniri.
Kwokwo, kwo uli mu ndangira ubumasi kwo ndi muhubi.
9 Rurema, agweti agandeera ngana, anali mu njanganula-njangaula ku buraakari.
Agweti aganjigira amiino, iri anangonolera amasu.
10 «Abandu bagweti baganjekeereza, iri banambonyoleza, wa honyo!
Bakoli nzokaniini, iri banammota imbi mu matama.
11 Rurema keera ambiika mu maboko gaꞌbanabyaha,
banali banangora-mabi.
12 «Kundu nâli jeberiiri, haliko buno keera anvuna-nvuna.
Anandakamira, ananvungula-vungula.
Anayabiira imyambi yage, anagindungaania.
13 Ee! Ábagweti bagaalasha imyambi, bakoli nzungulusiri.
Imyambi yabo, keera yambera amafiko buzira kungejeerera.
Indulwe yani, keera bagiyonera haashi.
14 Agweti agandeera-ndeera.
Anagweti agandwisa nga musirikaani.
15 «Ibyambalwa byani, gakoli ba masuuzu.
Keera nꞌgayubika amalanga gaani mu luvu.
16 Bwo nyamiri ndi mu lira, amasu gaani keera gakadukumbuka.
Ingohe zaani, zikoli yidisiri kweꞌkihulu namudidi.
17 Kundu ngweti ngalibuuka kwokuno,
ndaabwo buligo bwo nagira.
Neꞌkyanya ndi mu huuna Rurema,
umutima gwani guli shululu.
18 «E kihugo, bwoꞌmuko gwani keera gwayoneka, utagubwikire.
Leka gukizi ndirira, lyo ndonga ukuli kwani.
19 Kiri na buno, akamasi kaani kagweti kagambulanira mwiꞌgulu.
Ee! Uyo úli mu kizi mbulanira, atuuziri yaho hiꞌgulu bweneene.
20 «Abiira baani, bakoli gweti bagangayiriza naaho.
Kundu kwokwo, ngweti ngahuuna Rurema, mu kati kaꞌmalira.
21 Bwangabiiri bwija, ndongage umundu woꞌkutuhambuula twe na Rurema.
Ee! Atuhambuulage, nga kwoꞌmundu ali mu hambuula biira baage.
22 Mukuba, ha nyuma hiniini, ngaaba keera nafwa,
ndanâye shubi galukira mu kihugo.»