17
1 «Keera nꞌgavunika umutima.
Isiku zaani, zikola bu mala. Ishinda naaho, yo ikoli ndindiiri.
2 Ngoli zungulusirwi na ábali mu njekeereza.
Nabona ngiisi kwo bagweti bagambonyoleza, noꞌkutandooza iro.
3 «E Rurema, si ndaaye gundi úli mu yitanga hiꞌgulu lyani!
Ku yukwo, ube we gambulanira.
4 Keera ukaziba ubwenge bwa biira baani.
Kwokwo, utabalekeerere maashi, mbu bambime.
5 Si bagweti bagasongera abiira baabo, gira lyo balonga ukuyunguka.
Aahago! Uleke ngana abaana baabo bahumaale.
6 «E Rurema, keera waleka abandu bakizi mbonyoleza.
Bagweti bagandwira amate.
7 Bwo nyamiri ngweti ngabululuka, amasu gaani gakoli fwifwitiiri.
Amagala gaani, gataki sikamiri bweneene.
8 Abandu boꞌkuli, ikyanya bali mu mbona, bali mu huumirwa.
Ikyanya babona kwo nagirwa buligo, banayagalwe.
9 Kundu kwokwo, umundu woꞌkuli, akaniziizi injira yage.
Yabo bazira buhube, bo bagenderiiri noꞌkukizi kana ingingwe.
10 «Haliko mwe bandi, mushubi yiji ndega.
Si ha kati kiinyu, ndaaye mwitegeereza ye nabona.
11 Isiku zaani, zikoli maziri. Ishungi zaani, keera zahongolwa.
Ngiisi byo njubi shungisiri mu mutima gwani, bikoli sherebiiri.
12 Yabo bandu, si bagweti bagaadeta mbu bushigi, gwo mulege-rege.
Neꞌkyanya bukola mu yira, banadete mbu mulengeerwe gukola ho.
13 «I kuzimu, iri yangabiiri yo ikola nyumba yani,
na mbe ngoli gwejiiri yo,
14 na mbe ndi mu bwira ishinda mbu: “We daata”,
na mbwire ibitwera mbu: “We maawe”, kandi iri “We mwali wani”.
15 Aaho! Iri byangabiiri kwokwo, umulangaaliro gwani hayagi nangaki gubiisiri?
Yugwo mulangaaliro, nyandagi úwangaki gubona?
16 Yoho wee! Twe noꞌmulangaaliro gwani, tugamalira i kuzimu.
Twembi, tugaluhuukira mu luvu.»