18
Amagambo ga kabiri ga Biridaadi
1 Ha nyuma, Biridaadi weꞌShuha, anashuvya kwokuno:
2 «Ewe! Yuku kulomboojera kwawe, ugakutwikira kwo mangoki?
Tee detage amagambo ágayuvwikiini, gira lyo tulonga ukuganuula bwija.
3 Aahago! Ka utoniri kwo tuli nga bitugwa naaho?
Ka utubwini kwo tulyagagi bahwija?
4 «Kundu wangayikuula invwi,
keꞌkihugo kigaasigwa kimaata hiꞌgulu lyawe naaho?
Kaꞌmabuye gangakoli jungubana hiꞌgulu lyawe?
5 «Si itara lyaꞌbandu babi, ligaki zima.
Neꞌngulumira yalyo, inahote.
6 Mu nyumba yabo, umulengeerwe gugahinduka kihulu.
Kundu itara lishubi teresirwi ha butambi lyabo, ligaki zima.
7 «Yabo babi, batagaki yiyeneneka.
Na kundu bagweti bagaagira igambi libi, si ligabagwata boonyene.
8 Bagagwatwa mu mubashu,
batanâye ki gushaage mwo.
9 Ee! Umubashu guli mu bagwatira ku kasiizira.
Ulusinga, luli mu bananiira ngana-ngana.
10 «Yulwo lusinga, lukoli bishamiri kwiꞌdaho,
mu njira yabo, bali mu batega umubashu.
11 Bagweti bagateerwa neꞌkyoba ngiisi luhande,
Banagweti bagahambirizibwa.
12 «Kundu bâli koli kaniri, haliko buno keera bateerwa noꞌmwena.
Ubuhanya naaho, bukoli balindiriiri.
13 Uluhu lwabo, lukola mu bungwa noꞌbulwazi bukayu,
halinde kiri naꞌmaboko, naꞌmagulu, bikola mu liibwa.
14 «Bakola mu kuusibwa mu nyumba zaabo,
banagendi twalwa imbere lyeꞌkihuume kyoꞌmwami.
15 Inyumba zaabo, zikola zigajigiivibwa.
Umuliro gwaꞌmakala, gugaziyaka kwo.
16 Bagaaba ngeꞌkiti keera íkyayuma imizi,
amatavi gaakyo, ganayumaguke.
17 «Mu kihugo, ndaaye úwâye ki bakengeere.
Ndaanaye úwâye ki kengeere amaziina gaabo.
18 Bagasaazibwa mu mulengeerwe, banalashwe mu kihulu,
banabe bakoli yimwirwi mu kihugo.
19 Batâye longe abaana, batanâye longe abijukulu.
Mu kaaya kaabo, ndaaye ye bagaasiga mwo.
20 Abandu boꞌluhande lweꞌmuga,
ikyanya bagaabona íbigabakoleka kwo, bagashenguka.
Naꞌbandu boꞌluhande lweꞌsheere, bagahuumirwa.
21 Bwobwo, bwo buhanya, banangora-mabi bagakizi longa.
Mukuba, batatwaziizi Rurema.»