19
Ishuvyo lya Hayubu
1 Ha nyuma, Hayubu anashuvya kwokuno:
2 «Mugagendereraga ukundibuza halinde mangoki?
Si yaga magambo giinyu, gagweti gaganvungula-nvungula!
3 Si keera ukandukiiriza ubugira kali ikumi!
Aaho! Ka mutayuvwiti ishoni mu kundeera kwoku?
4 «Kundu nangabiiri keera nꞌgayifunda mu byaha,
yibyo bindoziri nienyene naaho.
5 Iri mwangaloziizi ukuyerekana kwo mwe mumbimiri,
mwangadesiri ngiisi kwo mbubiri, halinde ndibuuke kwoku.
6 Munamenyage kwo Rurema yenyene ye kambubira,
anangwasa mu lushenga lwage.
7 «Ngweti ngayamiza, ti: “Undabaale, maashi!”
Kundu kwokwo, ndaaye úgweti úganyitaba.
Na kundu ngweti ngabanda akashiba, mbu ndabaalwe,
si ndaaye úli mu mbeereza ukuli kwani.
8 Rurema keera akambangirira mu njira,
ndanaki bwini ho nangalenga.
Ee! Injira yani, keera agibiika mweꞌkihulu.
9 Keera akandeeza ishoni bweneene,
anandyosa ulushembe lwani kwiꞌtwe.
10 «Agweti aganjulika-njulika imbande zooshi, halinde nahererekera.
Umulangaaliro gwani, keera anagukuula, nga úwakuula ikiti.
11 Agweti agandakarira bweneene,
anagweti agambona kwo ngola mugoma wage.
12 Abasirikaani baage, bagweti baganyijira duba-duba,
banabe bagweti bagalunda uluvu ku luzitiro, gira balonge ukundeera.
Ishumbi zaabo, zikoli sokaniini inyumba yani.
13 «Rurema, keera anjombania na beene witu.
Kiri naꞌbiira baani, keera bambuumuka lwoshi-lwoshi.
14 Yabo beene witu naꞌbiira baani, keera bakanyibagira.
15 Abageezi ba mu nyumba yani, bakola mu mbona nga mundamenywa.
Abaja-kazi baani, bakola mu mbona nga kinyamahanga.
16 Ikyanya ndi mu tumira umukozi wani, atakiri mu nyitaba.
Kundu nangamúyinginga bweneene, ali mu yigira nga atayuvwiti.
17 «Mukaanie akola mu yuvwa kwoꞌmuuka gwani gukola niꞌbaya libi.
Beene witu bo tukabutanwa, bakola mu mbona nga kyagaza.
18 Kiri naꞌbaana baanuke, bagweti baganneena.
Ikyanya ndi mu shoshokera ho baliiri, banambeereze ingoto.
19 Abiira baani ba vyuka-ngwejere, bakoli nnenuusiri.
Kundu nâli bakuuziri, haliko boohe, keera bakambinduka.
20 Amagala gaani, gakola naaho luhu naꞌmakangara.
Keera nateera byoshi-byoshi, na ngoli lindiriiri ulufu.
21 «E biira baani, munyuvwirwe indengeerwa maashi! Munyuvwirwe indengeerwa.
Si Rurema keera akandumuula uluhi.
22 Aahago! Bwo Rurema agweti agandibuza,
ka na niinyu mugandibuza kwakundi?
Yukwo kundibuza kwinyu, ka kutazi mala?
23 «Amagambo gaani, gakwiriiri gatee yandikwa.
Ee ma! Gangayandisirwi mu kitaabo.
24 Bwangabiiri bwija gayandikwe neꞌkyuma kiꞌsongo,
ganahokoororwe kwiꞌbuye, gira lyo gatuula ho.
25 «Kundu kwokwo, nyiji bwija. Ulya woꞌKumbulanira, alyagagi ho.
Na ku mbeka, agayimanga mu kihugo.
26 Kundu amagala gaani gakoli boziri,
haliko ku gaagano magala, ngaki bona Rurema.
27 Ngaki múbona naꞌmasu gaani nienyene.
Umutima gwani, mu kumúlindirira, gugweti gugamúyidula bweneene.
28 «Aaho! Kutagi mwangaki kolwa mbu muyidese, ti:
“Si wayikululira umwama wenyene!”
29 Si na niinyu, mukwiriiri muyobohe ikihano.
Bwo mukoli jinikiiri abiinyu, niinyu mukwiriiri muyitwe.
Kwokwo, lyo mumenya ngiisi kwaꞌbandu bali mu twirwa ulubaaja.»