23
Ishuvyo lya Hayubu
1 Ha nyuma, Hayubu anashuvya kwokuno:
2 «Zeene, ngi gweti ngayidodomba mu kati koꞌbululu.
Na íbitumiri ngagongeera, bwo Rurema akola mu ndibuza bweneene.
3 Bwangabiiri bwija, nimenye ho ngabonera Rurema,
gira ngendi múganuuza.
4 Nangagendi yibulanira imbere lyage,
mu kukoleesa amagambo goꞌbwitegeereze.
5 Kwokwo, lyo nangamenya ngiisi kwo aganjuvya,
niꞌshuvyo lyage ninalisobanukirwe.
6 «Aaho! Ka Rurema angakoleesa ubushobozi bwage, mu kuhambanwa?
Nanga, maashi! Si anganyuvwiriza mu kati koꞌbutuudu.
7 Mukuba, abandu boꞌkuli, bo bangamúganuuza bwija.
Kwokwo, bwo Rurema ali mutwi weꞌmaaja zaani,
agazindwira kwo ndagweti buhube, ndanâye ki legwe.
8 «Iri nangamúloogeza uluhande lweꞌsheere, ndaaye.
Neꞌri nangamúloogeza lweꞌmuga, atali yo.
9 Na kundu nangamúloogeza uluhande lweꞌmbembe, ndagamúbona.
Neꞌri nangahindukira lweꞌkisaka, shoobe!
10 «Kundu kwokwo, Rurema ayiji-yiji ulugeezi lwani.
Neꞌkyanya agangeza, agambona kwo ndi shululu, ngeꞌnooro muguuhya.
11 Ee! Ngweti ngakizi múkulikiriza ngana-ngana.
Na bwo nganiziizi injira zaage, ndangaki yahuka ibutambi.
12 Ngiisi byo ali mu ndegeka, ndali mu bibambala.
Amagambo gaage, ngweti ngagasingula mu mutima.
13 «Kundu kwokwo, ikyanya ali mu ba keera ashungika,
nyandi úwangaki múhangirira?
Ngiisi kwo aloziizagi, kwo anali mu gira.
14 Ku yukwo, ngiisi kwo akagwanwa ashungika, kwo aganangirira.
Na kwakundi, anaki singwiri izindi shungi nyingi mu mutima gwage.
15 Kyo kitumiri ngweti ngalenga mwoꞌmusisi imbere lyage.
Yizo shungi, ikyanya ngweti ngazisalira kwo,
ngweti ngayami shenguka.
16 Rurema keera ajugumya umutima gwani.
Na bwo ali Rurema woꞌbushobozi bwoshi, ngola mu yoboha ngana.
17 Ngoli ziizirwi neꞌkihulu.
Na bwo kiri kya namudidi,
ndaabyo ngi bwini, kiri neꞌhiniini.»