24
1 «Nangaloziizi kwo Rurema woꞌbushobozi bwoshi angashungisiri ikyanya kyoꞌkutwa kweꞌmaaja za banangora-mabi.
Kundu kwokwo, yikyo kyanya, si abandu ba Rurema batagweti bagakiyitoneesa kwo!
2 Abanabyaha, bali mu tyeza amabuye
goꞌkuyerekana imbibi zaꞌmatongo.
Banali mu zimba ibitugwa,
banabitunge mu ngo zaabo.
3 Banali mu nyaga ifuuvi bapunda baabo.
Banakizi yabiira ishuuli za banamufwiri, zibe ngwati.
4 «Banali mu shemya abakeni, mbu bashaagage mu njira,
halinde yabo bakeni banabishame.
5 Yabo bakeni balyagagi nga punda wa mwiꞌshamba,
bali mu shiiba bagweti bagalooza byo bagaalya.
Bali mu loogeza ibyokulya byabo kiri na mwiꞌshamba,
gira bakizi shaluula mwaꞌbaana baabo.
6 «Yabo bakeni, iri bangalooza ingano, kandi iri imizabibu,
bakwaniini bagendi bikaza mu ndalo za banangora-mabi.
7 Bali mu laala ubushigi bwoshi, balyagagi bukondwe.
Batahiiti kyambalwa, kiri noꞌmulondo gwoꞌkuyibwika.
8 Ikyanya invula iri mu nia ku malambo, bali mu yami loba.
Na bwo babuziragi inyumba, bali mu ba bayifuuziri mu nyaala.
9 «Yabo babi, bali mu yongoola abaana beꞌfuuvi ku bifuba bya banyina.
Bali mu bayabiira, babe ngwati.
10 Yabo bakeni bali mu bagendeesa bukondwe, buzira mirondo.
Banakizi babetuza imimbu, iri banashalisiri.
11 Banakizi yenga amavuta mu mizehituuni ya banangora-mabi,
na boonyene batali mu galabula kwo.
Banagweti bagakizi kanda idivaayi,
banaki nyotiirwi.
12 «Ikyanya bakola bagaafwa, bali mu gongeera.
Neꞌkyanya bali mu komeresibwa, bali mu tabaazania kwiꞌzu lihamu.
Kundu kwokwo, Rurema atali mu batwaza.
13 «Yabo banangora-mabi, bali mu hagana noꞌmulengeerwe.
Batanayijagi ngiisi ho guli mu genda, batanali mu siima ukugukulikira.
14 Umwitani ali mu vyuka shesheezi kare-kare,
gira agendi yita abakeni, na banakahuku.
Na bushigi, ali mu genda luto-luto nga muzimba.
15 Umushule naye, ali mu lindira izuuba litee sooka,
iri anadeta, ti: “Ndaaye úgambona!”
Ha nyuma, anayibishe amalanga, gira abandu batayiji múmenya.
16 Abazimba, bali mu tula inyumba bushigi,
haliko, mu mulege-rege, banayiyigalire mu mwabo.
Bataloziizi mbu baboneke mu mulengeerwe.
17 «Ikyanya buli mu yira, imwabo yo shesheezi.
Bali mu yijibana neꞌkihulu, gira bakizi teerana ikyoba.
18 «Kundu kwokwo, bali mu nyerera duba
ngiꞌfulo íriri mu yami twalwa noꞌlwiji.
Na ngiisi byo bagweti hano mu kihugo, bikoli daasirwi.
Banakoli yobohiri kiri noꞌkugenda mu ndalo zaabo zeꞌmizabibu.
19 Yabo banangora-mabi, nakuzimu ali mu banyereza,
nga kwoꞌlugungu luli mu yami nyota mwiꞌzuuba.
20 Ndaaye úwâye ki shubi bakengeera.
Kiri na banyina, bali mu bayibagira.
Ibitwera bigakizi lya ibirunda byabo.
Yabo banangora-mabi, bali mu vunika, nga kiti.
21 Umukazi, iri angabula ibuta,
yabo banangora-mabi bayamiri bali mu múlyalyania.
Kiri na namufwiri, batali mu mútabaala.
22 Yabo bandu babi, kundu bangaba bali banabushobozi, banasikamiri,
haliko Rurema ali mu bashereeza ku misi yage.
Batanayiji ulusiku lwo bagaafwa kwo.
23 Kundu Rurema angabaleka bakizi tuula mu mutuula,
haliko amasu gaage gayamiri gali mu baloleekeza.
24 Na kundu bakiri bakulu,
si bagayami yitwa, banaziikwe.
Bagaaba nga mihuli yeꞌngano, íri mu yami nongolwa.
25 Aahago! Ka hali umundu úwangadeta kwo bitali kwokwo?
Nyandagi úganyereka kwaꞌmagambo gaani gatali goꞌkuli?»