25
Ishuvyo lya Biridaadi
1 Ha nyuma, Biridaadi weꞌShuha anashuvya kwokuno:
2 «Rurema ahiiti ubushobozi bweneene,
anakwaniini ukusimbahwa.
Halinde kiri na mwiꞌgulu, ye mu tegeka byoshi.
3 Aaho! Nyandi úwangaharuura abasirikaani baage?
Si umulengeerwe gwage, guli mu moleka hooshi mu kihugo!
4 «Kwokwo, ndaaye úwangakwanana imbere lya Rurema.
Mu booshi ábakabutwa naꞌbakazi, ndaaye úwangayihumeera kwo ali mweru.
5 Rurema ali noꞌbulangashane ukuhima umwezi.
Analangashiini bweneene ukuhima indonde.
6 Si abandu boohe, bali mu ba nga bitwera.
Bali mu fwa naaho, nga bizimu.»