26
Ishuvyo lya Hayubu
1 Ha nyuma, Hayubu anashuvya kwokuno:
2 «Si abandu ábatashobwiri, utali mu batabaala!
Ee! Utagweti ugabatabaala, kiri neꞌhiniini.
3 Kundu uli mu hanuulana, haliko uki buziri ubwitegeereze.
Kiri na wenyene, utali mu sobanukirwa.
4 Aahago! Yago magambo goꞌbwitegeereze, ukagashaaza hayi?
Nyandagi úli mu kudesa?
5 «Abafwiri, kwo batuuziri mwiꞌdako lyaꞌmiiji,
bagweti bagajuguma.
6 Mukuba, iyo munda i kuzimu ndaabyo íbibishamiri imbere lya Rurema.
Si byoshi biri ha bweruula imbere lyage.
7 Rurema ye kabiika ikyanyaanya, uluhande lweꞌmbembe,
ananagania ikihugo áhatali kindu.
8 Ashwesiri amiiji mu bibungu, lyo biba bizito.
Kundu kwokwo, yubwo buzito butali bwo butumiri biri mu bereka.
9 Ali mu bwikira umwezi,
mu kutabika ikibungu imbere lyagwo.
10 «Ngiisi ho akahandula amiiji, anahabiika umuziizi,
gira gukizi yerekana ulubibi ha kati koꞌmulengeerwe neꞌkihulu.
11 Ikyanya Rurema ali mu kanukirana,
lyeꞌnguliro ziꞌgulu ziri mu soomerwa, zinakizi juguma.
12 «Ku bushobozi bwage, akahoohya inyaaja.
Na ku buhinga bwage, anavungula Rahaabu, kirya kihuume kyeꞌfwi.
13 Ku muuka gwage, anatuma ikyanyaanya kigalangashana.
Noꞌkuboko kwage, anagujika umujoka kundu gwâli mu limya-limya.
14 Mu mikolezi yage, iyo iri miniini naaho.
Iri mu hwehwetezania naaho.
Si ubushobozi bwage bwonyene, buli buhamu bweneene.
Aaho! Nyandi úwangamenya ngiisi kwoꞌbushobozi bwage buli mu kungula?»