28
Ubwivuge bwoꞌbwitegeereze
1 «Abandu bayiji-yiji ngiisi ho bali mu humbira iharija,
bayiji na ngiisi kweꞌnooro ziri mu shukwa.
2 Bayiji na ho bali mu humbira ibyuma mu kuzimu,
na ngiisi kwo bali mu jongolola imiringa mu mabuye.
3 «Bayiji kwakundi ngiisi kwo bali mu leeta itara mu kihulu,
gira balonge ukuhumba mu kuzimu, áhali ikihulu,
halinde banalonge amabuye geꞌkishingo.
4 Abandu bali mu humba ibishimo i kuzimu,
mwiꞌdako bweneene lyaꞌkaaya kaꞌbandu.
Bali mu yikira ku mugozi mu kugunagana kwo.
5 «Kwiꞌdaho, bali mu meza imbuto mu luvu,
gira balongage ibyokulya.
Mwomwo mu kuzimu, byoshi biri mu babulwa kwiꞌduutu.
6 Mu yago mabuye, mwo muli mu lyoka amabuye madukula geꞌsafiiri.
Noꞌlukungu lweꞌnooro luli mu boneka yo.
7 Injira yoꞌkugenda i kuzimu, ndaako kanyuni ákangagibona.
Kiri amasu ga nyunda, gatazindi gibona.
8 Ndaayo nyamiishwa ndangi ízindi fina yo.
Ndaanayo ndare ízindi lenga yo.
9 «Abandu bayiji ukufuluula amabuye makomu bweneene,
banakizi humba-humba áhali indaliro zaꞌmalambo.
10 Bali mu bera ingera mu kati kaꞌmabuye mahamu,
halinde banabishuule amabuye geꞌkishingo bweneene.
11 Bali mu honga ishalalo, gira zitahinge,
halinde banalonge ubulyo bwoꞌkubishuula íbishubi bishamiri mwo.
12 «Yibyo byoshi, abandu bayiji-yiji ukubigira.
Kundu kwokwo, ka bayijagi ngiisi kwo bangalonga ubwitegeereze?
Hayagi ho bagalonga ukusobanukirwa?
13 Ndaaye mundu úwangamenya akamaro koꞌbwitegeereze,
mukuba butali mu boneka mu bakiri bagumaana.
14 Inyaaja mbamu, iri mu deta, ti: “Ubwitegeereze, ndaabwo hano.”
Igindi nyaaja, inashubi deta, ti: “Butanali hano.”
15 «Yubwo bwitegeereze, umundu atangabugula ku njira yeꞌnooro,
kandi iri ku yeꞌharija.
16 Bitagaaziga kwo babugule ku nooro zeꞌHofiiri,
kandi iri ku mabuye geꞌhonikisi, kandi iri geꞌsafiiri.
17 Ubwitegeereze buhiiti ikishingo bweneene, ukuhima inooro,
kandi iri ikilolero íkiri mu keyengana bweneene.
Bitanazige ukubugula noꞌbungeni-ngeni úbukatulwa mu nooro.
18 Ubwitegeereze butangagulwa naꞌmabuye miija ágadukumbusiri na ágakeyengiini.
Ikishingo kyabwo, kihimiri ikishingo kyoꞌbuhembe.
19 Bitagaaziga kweꞌtopazi yeꞌHendyopiya yangatangwa hiꞌgulu lyabwo.
Emwe! Buhiiti ikishingo bweneene ukuhima inooro muguuhya.
20 «Aahago! Yubwo bwitegeereze, kuti kwaꞌbandu bangabulooza?
Na kuti kwo bangalonga ukubusobanukirwa?
21 Yibyo byombi, bibishamiri bweneene mu bandu booshi.
Kiri naꞌmasu goꞌtunyuni twa mu kyanyaanya, gatangabibona.
22 Ubushereeze, kuguma na Narufu, bali mu deta, ti:
“Twayuvwa naaho umwazi, ngiisi hoꞌbwitegeereze bwangaboneka.”
23 Rurema naaho, ye yiji injira yoꞌkulonga ubwitegeereze.
Yehe naaho, ye yiji ngiisi ho bwangabonekera.
24 Mukuba, ali mu langiiza hooshi mu kihugo,
anabwini byoshi íbiri mwiꞌdako lyeꞌkyanyaanya.
25 Ye kashungika ngiisi kweꞌmbuusi igakizi huusa,
anashungika kwakundi ngiisi kweꞌnvula igakizi nia.
26 «Ye kabiika imaaja hiꞌgulu lyeꞌnvula,
anayerekana injira yoꞌmulavyo gugakizi lenga mwo.
27 Haaho, lyo akaloleekeza ubwitegeereze, anayiga ikishingo kyabwo.
Anabubiika ahandu haabwo, iri anabutanduula bweneene.
28 Ha nyuma, Rurema anabwira abandu booshi, ti:
“Ikyanya mugweti muganzimbaha, lyo muli mu ba noꞌbwitegeereze nirizina.
Neꞌkyanya muli mu yiyeka naꞌmabi, lyo muli mu busobanukirwa.”»