29
1 Ha nyuma, Hayubu anashubi deta kwokuno:
2 «Nangasiimiri njubi bona isiku za keera.
Mukuba, mu yizo siku, Rurema âli kizi ndanga.
3 Itara lyage lyâli kizi mmolekera.
Kundu nâli riiri mu kihulu, haliko nanakizi genda mu mulengeerwe gwalyo.
4 «Mu yizo siku, nâli kaniri bweneene.
Na bwo Rurema âli mwira wani, âli kizi gashaanira inyumba yani.
5 Rurema woꞌbushobozi bwoshi, âli ki riiri kuguma na naani,
naꞌbaana baani, bâli kizi nzokanana.
6 Amagulu gaani, nâli kizi gakaraba, na ngashiige amakaavwe.
Neꞌbiti byani byeꞌmezehituuni, byâli kizi jalabanda mwaꞌmavuta.
7 «Nanakizi humaanana naꞌbashaaja kwiꞌrembo lyaꞌkaaya,
nanababeera mwo, mu kati koꞌlushaagwa.
8 Ikyanya nâli kizi gwanana imisore mu njira, yanakizi ginzigira.
Kiri naꞌbashaaja, banakizi yimanga, mu kumbeereza ulushaagwa.
9 Abatwali, mbu bambonage, banayami leka ukuganuula,
banabiike umunwe ku kanwa, mu kuhuuna abandu kwo bahulike.
10 Ee ma! Abanalushaagwa, banayimanga imbere lyani, shee!
Banatee leka ukupupiriza-pupiriza ululimi.
11 «Ngiisi mundu úkayuvwa amagambo gaani, anakizi nyivuga.
Ikyanya bakambona, banakizi nyivuga imbere lyaꞌbaabo.
12 Ikyanya abakeni bâli kizi ndabaaza, nanakizi batabaala,
nanakizi tabaala kiri neꞌfuuvi ízitâli hiiti imbere neꞌnyuma.
13 Ábâli kekeriiri, ikyanya nꞌgabatabaala, banakizi ngashaanira.
Kiri na banamufwiri, nanakizi bashambaaza.
14 «Ngiisi byo nâli kizi gira, byâli kwaniini imbere lya Rurema.
Nâli kizi yambala ukuli ngiꞌkanju, na ngoꞌmulondo gwoꞌkusoosa kwiꞌtwe.
15 Nâli kizi kolera imbumi, mu kubayerekeza injira.
Kiri noꞌtundende, nâli riiri magulu gaatwo.
16 Imwaꞌbakeni, nie wâli yishe,
nâli kizi tabaala abageezi ku magoorwa gaabo.
17 Haliko banangora-mabi boohe, nanakizi bavuna imigeka.
Neꞌkyanya bâli gwasiri imbohe, nanakizi zinyugutula mu miino gaabo.
18 «Nâli kizi salira, ti: “Isiku zoꞌburambe bwani,
zigayushuuka bweneene ngoꞌmushenyu kwiꞌbuga.
Neꞌkyanya ngaafwa, abandu beꞌmbaga yani bagaaba banzokaniini.
19 Ngaaba ngeꞌkiti kyeꞌmizi íkalandira mu miiji.
Ubushigi bwoshi, ikimi kigabeera ku matavi gaakyo.
20 Ngakizi simbahwa ngiisi kyanya.
Ngaaba nganiziizi, ngoꞌmusirikaani úfumbiiti umuheto muhyahya.”
21 «Ikyanya nâli kizi hanuula abandu,
banakizi bwatala shee, mu kulindirira amahano gaani.
22 Neꞌri nꞌgayusa ukubahanuula, batâli ki hiiti byo bagayushuula.
Amagambo gaani, bâli kizi gayuvwiriza bwija.
23 «Bâli kizi ndindirira bweneene,
nga kwaꞌbandu bali mu lindirira invula.
Ikyanya bakalonga amagambo gaani, banakizi gayuvwiriza,
nga bandu ábalangaliiri amahona-nvula.
24 Ikyanya bâli kizi yihebuura, nanakizi bakania indege.
Ikyanya bâli kizi bona amalanga gaani, banashagaluke.
25 Bwo nâli riiri kirongoozi kyabo, nâli kizi bayereka byo bagaagira.
Nâli tuuziri mu kati kaabo, nga mwami mu basirikaani baage.
Neꞌkyanya bakahanyagala, nanakizi baholeeza.»