34
1 Uyo Herihu, anagenderera ukudeta kwokuno:
2 «Mwe bitegeereza, yuvwirizi amagambo gaani.
Bwo muhiiti ubumenyi, mundegage amatwiri.
3 Nga kwoꞌlulimi luli mu toma iri ibyokulya biheshiri kandi iri nanga,
kwo na kwokwo amatwiri, nago gali mu yuvwa akamaro kaꞌmagambo.
4 Aahago! Tuyige kuguma ngiisi ágali miija,
halinde tulonge ukugatoola ku bwitonde.
5 «Si Hayubu akadeta mbu: “Niehe Hayubu, ndagweti buhube.
Kundu kwokwo, Rurema atali mu ndwira ulubaaja mu kati koꞌkuli.
6 Kundu ndaabwo buhube ngweti,
halikago bali mu mbwira kwo ndi mubeeshi.
Kundu ndagweti buhube,
si ikihando kyani kyanana ukukira.”
7 «Yoho wee! Si uyo Hayubu aloziizi bweneene ukutukana!
Aahago! Ka hali ugundi mubi úli nga ye?
8 Si akomeriinwi na banangora-mabi.
Bali mu kizi shiibanwa.
9 Keera anadeta mbu: “Kituma kiki umundu angateera ikihe
mu kugira mbu asimiise Rurema?”
10 «Bwo mukoli hiiti ubumenyi, mutee nyuvwiriza.
Si abandu booshi bayiji-yiji kwo Rurema atangagira ubuligo.
Mukuba, ye Rurema woꞌbushobozi bwoshi.
Aahago! Kuti kandi kwo angakizi huba?
11 Rurema woꞌbushobozi bwoshi ali mu hemba abandu,
ukukulikirana na kweꞌmikolezi yabo iri.
12 «Si yenyene, ndaabwo buligo bwo angagira.
Atanganashobania ukuli, kiri neꞌhiniini.
13 Ka hali úkayimika Rurema, mbu akizi twala hiꞌgulu lyeꞌkihugo?
Kandi iri, nyandagi úkamúbiika, mbu abe mukulu hiꞌgulu lyeꞌkihugo kyoshi? Si ndaaye!
14 Nga Rurema angalyosiizi umutima gwage mu kihugo,
halinde gutakizi ki beera mwo,
15 ibiremwa byoshi byangaheziri.
Kiri naꞌbandu nabo, bangagalukiiri mu luvu.
16 «Aaho! Iri mwangaba musobanukiirwi, munyuvwirize.
Mukizi ndega amatwiri.
17 Ka Rurema angatwaziri ikihugo, anabe ashombiri ukuli? Nanga, maashi!
Ka wangatwira Rurema ulubaaja,
anali ye kwaniini, ye na mwene ubushobozi?
18 Si ali mu shaahuza abaami, ti: “Si mulyagagi ba busha!”
Ali mu bwira naꞌbanalushaagwa, ti: “Si muli banangora-mabi!”
19 Yehe atakizi kundirira abakulu,
atanali mu kundirira abagale ukuhima abakeni.
Si yabo booshi, ye kababumba naꞌmaboko gaage.
20 Kundu kwokwo, yabo booshi bangayami fwa ha kati koꞌbushigi.
Bali mu nyanyagwa haashi, banayami seezera ikihugo.
Kundu bali banabushobozi,
si bali mu lyosibwa ngana mu kihugo, buzira kulonga ubutabaazi.
21 Amasu ga Rurema, gayamiri gali mu loleekeza abandu.
Ngiisi byo bali mu gira, abibwini-bwini byoshi.
22 Kiri neꞌkihulu, kundu kyangabiiri kya namudidi,
kitangabisha banangora-mabi mu masu gaage.
23 «Twehe, tutangakyula,
mbu Rurema atutwire ulubaaja ku kyanya kirebe.
24 Si ali mu shereeza abanabushobozi, buzira kuhanuusa umundu yeshi,
anayiji biika abandi ahandu haabo.
25 Yehe, ye yiji-yiji ngiisi byaꞌbandu bali mu gira.
Ha kati koꞌbushigi, ali mu baminika, banabe keera bahererekera.
26 Bwo bakoli bihuusiri,
ali mu yami bahana imbere lyaꞌbandu.
27 Mukuba, bakajanda ukumúkulikira,
batanagweti bagamútwaza.
28 «Yabo bandu, bali mu liza kiri naꞌbakeni,
halinde amalira gaabo, Rurema yenyene ali mu gayuvwa.
29 Nga Rurema angayihulikira, nyandi úwangamúshumuza?
Nga angabisha amalanga gaage, nyandi úwangaki múbona?
Kundu kwokwo, ali mu kizi langa ikihugo, kiri naꞌbandu kwakundi.
30 Ali mu hangirira banangora-mabi, kwo batakizi twala,
na kwo batakizi hubiisania.
31 «Aahago! Kituma kiki abandu batangabwira Rurema, ti:
“Nayemeera kwo nayifunda mu byaha.
Kundu kwokwo, ndagaki shubi bigira.”
32 Kandi iri badete: “Kundu ndashobwiri ukubona amahube gaani,
uganyereke.
Iri nangaba nꞌgakola amabi,
ndagaki shubi gagalukira mwo.”
33 E Hayubu, si keera wajandirira Rurema!
Aahago! Ka Rurema angakizi kugirira nga ngiisi kwo uloziizi? Nanga!
Utwagage uluhango. Si ndali nie gakutwira lwo.
Umbwire ngiisi kwo utoniri.
34 «Abanabwenge, naꞌbitegeereza,
ikyanya bagakizi nyuvwiriza, bagaadeta, ti:
35 “Ulya Hayubu, si ali mu ravwanga ku buhwija!
Amagambo gaage, gayerekiini kwo atasobanukiirwi.”
36 E Hayubu, si washuvya nga mundu mubi!
Unakoli kwaniini ukubulirizibwa.
37 Wâli mali yifunda mu byaha. Na buno, wabiyushuula kwoꞌbuhuni.
Utali mu shaagana,
si uli mu yagaza Rurema ku magambo gaawe mingi-mingi.»