35
1 Ha nyuma, Herihu anashubi deta kwokuno:
2 «E Hayubu, keera wadeta mbu: “Rurema agaki yerekana kwo ndi woꞌkuli.”
Aahabi! Kaꞌmagambo mwene yago, galyagagi miija? Nanga maashi!
3 Wanashubi buuza, mbu: “Mu kuyiyeka ibyaha, biki byo nangayunguka?
Si ndaabwo bunguke!”
4 Kwokuno, ngakushuvya,
kuguma naꞌbiira baawe kwakundi.
5 «Aaho! Ulolage mu kyanyaanya.
Langiizagya ibibungu íbiri hiꞌgulu lyawe bweneene.
6 Kundu wangaba uli mu yifunda mu byaha, si utangagoora Rurema.
Yibyo byaha, kundu wangabiluza, yehe bitangamúlibuza.
7 Na kwakundi, kundu wangagira amiija, ndaabyo wamúheereza.
Unabe ndaabyo wamúgirira.
8 Ikyanya ugweti ugaagira ubuligo, iri wayilibuza wenyene naaho,
kuguma naꞌbiinyu bo mutuliinwi.
9 «Abandu, ikyanya bagweti bagalibuzibwa,
bali mu lira ku kimombo,
banali mu batabaaza abakulu, mu kugongeera bweneene.
10 Kundu kwokwo, ndaaye úli mu naaka, ti:
“Si Rurema ye Mulemi wani! Aaho! Alyagagi hayi?
Si ye kwaniini ukukizi njagalusa bushigi!
11 Rurema ye mu tuyengehya ukuhima inyamiishwa,
halinde tukizi ba bitegeereza ukuhima utunyuni.
Aaho! Buno ali hayagi?”
12 «Abanabwikangaate mwene yabo, ikyanya bali mu tabaaza Rurema,
atali mu bashuvya.
13 Ikyanya umundu ali mu huuna-huuna mu kuyidodomba kwokwo,
Rurema woꞌbushobozi bwoshi, atali mu mútwaza.
14 Ee! Atagakushuvya,
kundu wangadeta kwo ugweti ugamúlindirira, buzira kumúbona.
15 Unabe uli mu yidodomba, mbu atali mu hana abanabyaha ku buraakari bwage,
na mbu atali mu twaza ubuligo bwaꞌbandu.
16 E Hayubu, si ugweti ugafwolomboka.
Wehe, amagambo gaawe gali ga buhwija.»