36
Uyo Herihu anashubi deta kwokuno:
«Unyigenderere hiniini.
Ngaki kuyereka ngiisi kwo twangashubi deta hiꞌgulu lya Rurema.
Ngaki kuyereka ngiisi kwoꞌMulemi wani ali woꞌkuli,
mu kukoleesa amagambo gaꞌkahebuuza.
Yaga magambo go ngola ngaadeta, gooshi gali goꞌkuli.
Ndi munabumenyi bweneene, nganakumenyeesa go.
 
«Yuvwagwa! Kundu Rurema ye mwene ubushobozi,
haliko ndaaye ye ali mu gayiriza.
Ye mwene ubushobozi. Neꞌshungi zaage zisikamiri.
Atali mu lekeerera banangora-mabi, mbu babe ho.
Si ikyanya abandu bali mu libuuka, ali mu baheereza ukuli kwabo.
Yabo beene ukuli, atali mu leka ukubatanduula.
Si ali mu bayimika kuguma naꞌbaami,
banakizi huuzibwa imyaka neꞌmyakuula.
 
«Yabo bandu, iri bangaba bali bashweke neꞌminyororo,
banabe bakoli zingiirwi mu malibu, nga migozi,
Rurema ali mu bayereka ibyaha byabo,
na ngiisi kwo bayijwiri mwoꞌbwikangaate.
10 Ikyanya ali mu bakengula,
ali mu bayigula amatwiri, gira bayuvwe,
anabahamulize kwo batwikire ku mabi gaabo.
 
11 «Kwokwo, iri bangasimbaha Rurema, banabe bagweti bagamúkolera,
lyo bagakizi genduukirwa isiku zaabo zooshi.
Banakizi yama bashagalusiri imyaka yabo yoshi.
12 Haliko, iri bangaba batamútwaziizi, lyo bagayitwa ku ngooti.
Banabe batayiji íbyabayiitisa.
13 Yabo banangora-mabi, bali mu bona Rurema buligo.
Kiri neꞌkyanya ali mu bahana, batali mu mútabaaza.
14 Bayamiri bagweti bagayifunda-funda mu bitalaalwe,
banayami fwa, banakiri misore.
 
15 «Kiziga Rurema ye mu baleeza mu malibu,
halinde balonge ukukebukwa, banagafuushuke mwo.
16 E Hayubu, Rurema agweti agakufuusa mu nguuke,
gira ulonge ukuluhuuka, buzira kukizi hahazibwa.
Keera anakubaliza ibyokulya binunu ku kashasha kaawe.
17 Buno, keera watwirwa ulubaaja kuguma na banangora-mabi.
Yulwo lubaaja lukwaniini.
18 Lolaga! Utakengeere wayanga ulubaaja, mu kuhemukira ubugale.
Utanakolwe mbu ulye ikitulire, mbu lyo ugendi yifunda mu byaha.
19 Kundu wangalonga ubugale bweneene, unabe ukola kikalage,
haliko yibyo bindu, bitali byo byangakulyosa mu makuba.
20 Utakizi yifwija kwoꞌbushigi buyije,
mbu lyo ulonga ubulyo bwoꞌkushaaza abandu mu nyumba zaabo.
21 Utanagendi yifunda mu byaha,
mbu lyo ulonga ukuyibagira amakuba gaawe.
 
22 «Kengeera kwo Rurema ye mwene ubushobozi bwoshi.
Ndaanaye gundi mwigiriza ye uhiiti.
23 Ndaaye úwangashungikira Rurema byo agaagira.
Ndaanaye úgamúbwira, mbu: “Ewe! Si keera wahuba!”
 
24 «Kwokwo, ukizi kengeera ukumúhuuza hiꞌgulu lyeꞌmikolezi yage,
unakizi múyimbira inyimbo zoꞌbwivuge.
25 Abandu booshi, bakoli bwini ngiisi byo Rurema ali mu gira,
kundu byangaba biri ku hala naaho.
 
26 «Ee ma! Rurema ali mukulu bweneene.
Yubwo bukulu bwage, tutangabusobanukirwa.
Ndaaye úwangamenya imyaka yage yoꞌkuba ho.
27 Ali mu yikumaniza amiiji geꞌnyaaja,
akabuli gagira ibe mitonyi yeꞌnvula.
28 Iyo nvula, ali mu giyijuza mu bibungu,
halinde invula ikizi honera haashi.
Kwokwo, lyaꞌbandu bali mu longa invula, banakizi genduukirwa.
 
29 «Ndaaye úsobanukiirwi ngiisi kweꞌbibungu biri mu yajaala,
kandi iri ngiisi kweꞌnguba iri mu lavya kwiꞌgulu.
30 Rurema ali mu tabika imilavyo imúsokanane,
halinde ikizi laviza kiri na mu tulingi tweꞌnyaaja.
31 Kwokwo, kwo Rurema ayamiri ali mu kyula,
halinde abandu banalonge ibyokulya ku bwingi.
32 Ali mu ba afumbiiti imilavyo mu maboko gaage,
anakizi givurumika, inayami rasukira ngiisi ho aloziizi.
33 Iyo milavyo, iri mu menyeesa kweꞌnvula ikola igaania.
Kiri neꞌnyamiishwa, nazo ziri mu ba ziyiji-yiji kwo igaania.»