37
1 «Iyo nguba, ikyanya ndi mu giyuvwa,
umutima gwani guli mu kanguka,
gunabe nga guloziizi ukuhuluka mu kifuba kyani.
2 Muyuvwirize izu lya Rurema, liri nga mikungulo.
Ikyanya liri mu lyoka mu kanwa kaage, liri mu kizi kungula, wa guu!
3 Iyo mikungulo, ali mu yami gikunguza hooshi mu kyanyaanya.
Noꞌmulavyo gwage, ali mu yami gulaviza mu mbande zooshi zeꞌkihugo.
4 «Emwe! Izu lya Rurema, liri mu kungula ngana.
Ikyanya ali mu deta, atali mu ligonera.
5 Ikyanya Rurema ali mu deta, ali mu tulagiza inguba bweneene.
Ubukulu bwage, tutangahasha ukubusobanukirwa.
6 «Rurema ali mu bwira indara: “Yikira mu kihugo!”
Anabwire neꞌnvula: “Udigirire!”
7 Ye mu tuma abandu booshi bali mu tee leka umukolwa gwabo,
gira balonge ukumenya bwija umukolwa gweꞌmwage.
8 Inyamiishwa ziri mu yegama, gira zitalobe,
zinagalukire mwiꞌbundo lyazo.
9 «Imbuusi iri mu huluka imunda iri nzingule.
Neꞌkyanya iri mu huusa, iri mu leeta akagima.
10 Ikyanya Rurema ali mu hulusa umuuka,
indara iri mu hulukira ho,
halinde amiiji mingi ganayami hinduka ibuye.
11 «Rurema ali mu yijuza ibibungu mwaꞌmiiji.
Ye nali mu lyamuza-lyamuza mweꞌbiryamu.
12 Ikyanya ali mu kyula, byoshi biri mu hinda-hinda.
E ma! Biri mu gira nga ngiisi kwo ali mu bihamuliza.
13 Rurema ali mu koleesa ibibungu mu kuhana abandu,
na mu kubayereka urukundo lwage.
14 «E Hayubu, utegage amatwiri.
Utee hulika, unayitoneese hiꞌgulu lyeꞌbitangaaza bya Rurema.
15 Aaho! Ka utayiji kwo Rurema ye mu lungika imbuusi?
Ye nali mu lyamuza ibiryamu mu bibungu byage?
16 Ee ma! Ye mu yoleesa-yoleesa ibibungu mu kyanyaanya.
Ye mu gira ibitangaaza, bwo ye yiji byoshi.
17 «Hali ikyanya imbuusi yeꞌkisaka iri mu leeta iduutu,
halinde unashahe ikyuya bweneene.
Kiri neꞌmirondo yawe, inalobe.
18 Ku yikyo kyanya, Rurema ali mu tabika ibyanyaanya
binaleete ikyengenye nga kilolero kyeꞌmiringa.
E Hayubu, ka wangagira kwokwo?
19 «Aaho! Utuyigirizagye ngiisi kwo tugabwira Rurema.
Si twenyene tulyagagi bahwija, tutanayiji ngiisi kwo tugayibulanira.
20 Ka nimenyeese Rurema kwo ndoziizi ukudeta?
Nanga ma! Si hali ikyanya angayami nyita!
21 «Ikyanya imbuusi iri mu kumuula ibibungu kwiꞌgulu,
ndaaye úwangaki langiiza kwiꞌzuuba,
bwo liri mu yaka bweneene.
22 Rurema ali mu lyoka uluhande lweꞌmbembe, alangashiini ngeꞌnooro.
Ubulangashane bwage buli mu ba bwaꞌkahebuuza.
23 Rurema woꞌbushobozi bwoshi, tutangamenya ngiisi kwo ali.
Ali kikalage bweneene, anali woꞌkuli.
Atanali mu shobania imaaja, mu kutuhana ku njira ítali nga yo.
24 Ku yukwo, abandu ba ngiisi handu bali mu múyoboha.
Si ngiisi ábali mu yidundulika kwo bo bitegeereza,
boohe, atali mu batwaza.»