38
Rurema ashuvya Hayubu
1 Iri hakatama, Nahano anashuvya Hayubu mu kihuhuuta kwokuno:
2 «Ewe! Uli nga nyandagi, we mu deta íbitali nga byo,
mu kugira mbu ushovye ishungi zaani?
3 Aaho! Ukanie umutima, nga mushosi.
Ngola ngakubuuza ibibuuzo, unakwaniini ubinjuvye kwo.
4 «Ikyanya nꞌgabiika indaliro zeꞌkihugo, wâli hayi?
Iri wangaba usobanukiirwi, unjuvye.
5 Nyandagi úkashungika ibigero byeꞌkihugo?
Na nyandi úkagolola umugozi mu kukigera?
6 Yizo ndaliro zeꞌkihugo, ziri njinge ku bikagi?
Na nyandi úkabiika ibuye lyakyo lyaꞌkagongo?
7 Ku yikyo kyanya, indonde za shesheezi zâli kizi yimba kuguma.
Kiri naꞌbaganda ba Rurema banakizi banda akabuuli, awi yiyi yiyi!
8 «Na kwakundi, nyandagi úkahangirira inyaaja,
gira zitatambuke imbibi zaazo?
9 Na nyandi úkatumbikira inyaaja neꞌbibungu,
halinde yanazinga kweꞌkihulu kya namudidi?
10 Si nie kabiika imbibi zeꞌnyaaja,
mu kuzizibira inyiivi neꞌmigaliro yazo.
11 Nanagibwira: “Imbeka yawe, hali haaha. Si utahatambuke.
Imidunda yawe, kundu iri mu yidundulika,
haliko, ikwiriiri ikizi malira haahano.”
12 «E Hayubu, ka keera ukabwira izuuba kwo bukye?
Ka keera ukatwisa izuuba uluhande lweꞌsheere?
13 Ka keera ukagwata ikihugo ku mbeka, wanakishagania,
mu kukishaagiza banangora-mabi?
14 Ku mukyo, ikihugo kiri mu hinduka,
nga kwiꞌbumba liri mu hinduka ku kyanya lyabiikwa kwaꞌkamangu.
Imigazi noꞌtubanda, biri mu boneka nga mifunya yiꞌkooti.
15 Yugwo mulengeerwe, gutali mu haabwa banangora-mabi.
Na kundu bali mu lambuula ukuboko, mbu bakomeresanie,
ehee, kugaavunwa ngana.
16 «Ka keera ukagendi tanduula áhali ishyoko zeꞌnyaaja?
Yizo nyaaja, ka keera ukagendi ziyitegeereza, halinde mwiꞌbenga lyazo?
17 Ka keera ukayerekwa imiryango ya Narufu,
ngiisi áhali ikihulu kya namudidi?
18 Ka uyiji ngiisi heꞌkihugo kihekiiri?
Yago gooshi, iri wangaba ugayiji, umbwire.
19 «Umulengeerwe, hayi hamwagwo?
Neꞌkihulu nakyo, kituuziri hayi?
20 Yibyo byombi, ka wangatuhisa halinde ha kaaya kaabyo?
Ka uyijagi injira yoꞌkugenda yo?
21 Ka wanganabimenya?
Ikyanya bitâli zaazi bumbwa, ka wâli ho?
Ewe! Bikoli bonesiri kwo keera ukalama imyaka mingi bweneene.
22 «Ka keera ukayingira mu bihinda byeꞌndara,
kandi iri ukabona ibihinda byeꞌnvula yoꞌlugungu?
23 (Yibyo byombi, babisingwiri hiꞌgulu lyeꞌsiku zaꞌmazibo.)
24 Ka uyiji ngiisi hoꞌmulengeerwe gulyosiri?
Kandi iri imbuusi yeꞌsheere, ka uyiji ho iri mu lyoka?
25 «Nyandagi úli mu yereka invula ngiisi ho igakizi nia?
Na nyandi úli mu yereka umulavyo ho gugalaviza?
26 Nyandi úli mu niesa invula mwiꞌshamba,
iyo munda ítali umundu?
27 Nyandi úli mu nywisa idaho lyumu,
halinde limeze ibyasi?
28 Iyo nvula, ka ihiiti yishe?
Na nyandi úli mu buta ikimi?
29 Iyo ndara nayo, nyina ye nyandi?
Na nyandi úli mu buta ulugungu úlushaaziri mwiꞌgulu?
30 Si amiiji gali mu hinduka nga mabuye makomu!
Kiri naꞌmiiji ágali hiꞌgulu lyeꞌnyaaja gali mu gwatana.
31 «Langiiza ibiso byeꞌndonde.
Aaho! Ka wangatengeka ikiso kya Kirimya?
Kandi iri ka wangatengeka ikiso kya Horyoni?
32 Ka wangaleeta indonde ikyanya kyeꞌmbondo, kandi iri kyeꞌkikamo?
Ka wangasholera idubu, kuguma neꞌbyana byayo?
33 Ka uyiji íbiri mu tuma indonde ziri ho?
Ka wangazikoleesa, mu kushungika íbiri mu koleka mu kihugo?
34 «Ka wangaberangira ibibungu,
halinde binatondeere ukuleeta invula?
35 Ka wangakizi lyamuza umulavyo,
halinde gunahikire ngiisi ho uloziizi?
36 Nyandi úli mu shoboleesa ukukizi tona?
Na nyandi úli mu shoboleesa ukusobanukirwa?
37-38 Hali ikyanya idaho liri mu yumaguka,
halinde uluvu lunagwatane.
Aaho! Nyandi úwangahasha ukugaaja ibibungu,
halinde invula inanie mu kihugo?
39 «Ka wangahiivira indare ngazi,
halinde unashaluule abaana baayo?
40 Yizo ndare, ka wangazibisha mu mihobo yazo?
Kandi iri, ka wangazigwejeza ha butambi lyeꞌnjira,
gira zitegeere heꞌnyamiishwa?
41 Banamujongo, ikyanya ibyananyuni byabo biri mu ndakira,
iri binajeba-jeba hiꞌgulu lyoꞌmwena, nyandagi úli mu biheereza byo bigaalya?»