39
1 «Imbongo, ka uyiji ikyanya kyayo kyoꞌkubuta?
Kandi iri inzobe, ka keera ukabona ngiisi kwo igweti igaabuta mu kishuka?
2 Yizo nyamiishwa, ikyanya ziri mu ba ziyimiri,
ziri mu hisa imyezi inga, halinde zinabute?
Ewe! Ka uyiji ulusiku lwo bikwiriiri ukubuta kwo?
3 Yizo nyamiishwa, ziri mu juujama mu kubuta.
Na mango zayusa, umukero gunamale.
4 Ibyana byazo biri mu kula mu kishuka, binakanire mwo.
Ha nyuma, binasige banyina, binayigendere byonyene.
5 «Aaho! Nyandi úliisiri bapunda ba mwiꞌshamba?
Nyandagi úkabashwekuula imigozi yabo?
6 Si nie kababiika mwiꞌshamba, ibe nyumba yabo!
Bali mu tuula mwomwo mwiꞌshamba, linali mwoꞌmuloba.
7 Yabo bapunda, bali mu shomba ulubi lwa mu kaaya,
batanali mu rongoorwa noꞌmundu.
8 Bali mu hinda-hinda mu malambo mu kulooza indagiriro.
Bagweti bagalooza ngiisi íkikiri kibishi.
9 «Imbogo itangayemeera ukukizi kukolera.
Itanganayemeera ukukizi laala mwiꞌruli lyawe.
10 Iyo mbogo, utangagishweka, gira ikizi kuhingira indalo.
Itangakizi kulula ifuka yoꞌkuhinga.
11 Iyo mbogo, kundu ihiiti imisi mingi,
haliko utangakizi gilangaalira.
Utangagikoleesa, ikizi kugirira imikolwa yawe.
12 Iyo mbogo, utangagiyegamira kwo igakuseehera imimbu yeꞌngano,
inagileete halinde ho ugagiyeluulira.
13 «Akanyuni hotiriishe, kali mu kizi puupiza-puupiza ibyubi byako ku bushambaale.
Kundu kwokwo, katangabalala mu kyanyaanya nga kabangarara.
14 Iyo hotiriishe, iri mu teerera haashi,
gira amagi gakizi longa iduutu mu mushenyu.
15 Itali mu twaza kwaꞌmagi gaayo gangakizi finwa,
kandi iri gaberwa neꞌnyamiishwa.
16 «Ehee! Iyo hotiriishe iri mu langamira ibyananyuni byayo,
nga bitali byeꞌmwayo,
itanayobohiri kwo hali ikyanya byangakengeera byafwa.
17 Si Rurema yenyene ye kagiyima ubwitegeereze.
Kiri noꞌbwenge, ndaabwo akagiheereza.
18 Kundu kwokwo, ikyanya iri mu tondeera ukutibita,
iri mu kizi hinjuka kiri neꞌfwarasi, kuguma na úli mu gigendera kwo.
19 «E Hayubu, ka we kaheereza ifwarasi imisi? Nanga maashi!
Ka we kanagiyambika ubwoya bula-bula kwiꞌgosi?
20 Ka we kagishoboleesa ukukizi simbuka nga nzige?
Iri mu banda akashiba ka kahebuuza.
21 Ikyanya iri mu ba igatibitira mwiꞌzibo ku bukalage,
iri mu kwalula-kwalula idaho hiꞌgulu lyeꞌbyuja.
22 Iyo fwarasi, iri mu shekeereza umugoma,
itali mu yoboha, itanali mu kangwa.
Kiri neꞌkyanya iri mu ba imbere lyeꞌngooti,
itangagaluka kifudeete.
23 Ibilwaniiso biri mu sekuzania ku mugongo gwayo,
ngeꞌshaho yeꞌmyambi, niꞌtumu íriri mu kyamula, kiri neꞌngooti.
24 Ikyanya ikibuga kiri mu laka, itangaki yimanga.
Si iri mu yami yitunda mwiꞌzibo.
25 E ma! Ikyanya kiri mu laka, iri mu kizi hulusa izu.
Inali mu leha ku hala ibaya liꞌzibo,
inayuvwe ngiisi kwaꞌbakulu bali mu hamuliza,
na ngiisi kwiꞌzibo liri mu kungula.
26 «Aaho! Koꞌbwitegeereze bwawe bwo buli mu balaza nyunda,
halinde anayajuule ibyubi byage mu kulola uluhande lweꞌkisaka?
27 Noꞌkukyula kwawe, ka kwo kuli mu nungeesa nyunda,
halinde agendi tereka ingisha yage mu migazi?
28 Uyo nyunda akizi yubaka ingisha hiꞌgulu bweneene mu maala.
Akabisho kaage, kali haako-haako hiꞌgulu mu maala.
29 Ali mu lyoka yaho mu kuneeka inyamiishwa.
Amasu gaage, gali mu zilangiiza-langiiza ku hala bweneene.
30 Ibyana byage, biri mu miima umuko.
Uyo nyunda, ngiisi hoꞌmutumba guli, ho anali mu yama.»